தொடரை இழந்தது இலங்கை அணி

தொடரை இழந்தது இலங்கை அணி
ஆஸி. 3 - 1 என முன்னிலை
அவுஸ்திரேலியாவுடனான 4 ஆவது ஒருநாள் போட்டியிலும் இலங்கை அணி 5 விக்கெட் வித்தியாசத்தில் மோசமான தோல்வியை சந்தித்தது. இதன் மூலம் இலங்கை அணி இரு நாடுகளுக்கும் இடையிலான ஒருநாள் தொடரையும் 1 - 3 என்ற கணக்கில் பறிகொடுத்தது.

கொழும்பு ஆர். பிரேமதாச மைதானத்தில் பகலிரவு ஆட்டமாக நேற்று முன்தினம் நடைபெற்ற 4ஆவது ஒருநாள் போட்டியில் நாணய சுழற்சியில் வென்று முதலில் ஆடிய இலங்கை அணி 38.4 ஓவர்களில் 132 ஓட்டங்களுக்கே சுருண்டது.

சிரேஷ்ட வீரர்களான குமார் சங்கக்கார, மஹேல ஜயவர்தன ஆகியோர் அணியை ஸ்திரமான நிலைக்கு கொண்டுவர எடுத்த முயற்சி கைகூடவில்லை. வேகமாக ஓட்டம் பெற முயன்ற சங்கக்கார 56 பந்துகளில் 31 ஓட்டங்களைப் பெற்று ஆட்டமிழந்தார்.

கடைசிவரை போராடிய மஹேல ஜயவர்தன 102 பந்துகளுக்கு 4 பெளண்டரிகளுடன் 53 ஓட்டங்களை பெற்ற நிலையில் வெளியேறினார். தவிர, இலங்கை சார்பில் அணித் தலைவர் டில்ஷான் மாத்திரமே இரட்டை இலக்கங்களை (12) பெற்றார்.

அவுஸ்திரேலியா சார்பில் பிரெட் லீ 15 ஓட்டங்களுக்கு 4 விக்கெட்டுகளை வீழ்த்தியதோடு டொஹர்டி 28 ஓட்டங்களுக்கு 4 விக்கெட்டுகளை பதம்பார்த்தனர்.

இந்நிலையில் இலகுவான இலக்கை நோக்கி பதிலெடுத்தாடிய ஆஸி. அணி 26 ஓட்டங்களுக்கு முதல் இரு விக்கெட்டுகளையும் பறிகொடுத்தது. எனினும் ஆரம்ப வீரர் ஷோன் மார்ஷ¤டன் இணைந்த அணித் தலைவர் மைக்கல் கிளார்க் அணியை வெற்றிவரை அழைத்துச் சென்றார்.

இதில் அபாரமாக ஆடிய மார்ஷ் 80 பந்துகளுக்கு 7 பெளண்டரிகளும் ஒரு சிக்சரும் அடங்கலாக 70 ஓட்டங்களைப் பெற்றார். அத்துடன் மைக்கல் கிளார்க் 60 பந்துகளில் ஆட்டமிழக்காது 38 ஓட்டங்களை பெற்றார். இதில் மார்ஷ், கிளார்க் ஜோடி 3 ஆவது விக்கெட்டுக்காக 97 ஓட்டங்களை இணைப்பாட்டமாக பெற்றது.

இறுதியில் அவுஸ்திரேலிய அணி 28 ஓவர்களில் 5 விக்கெட்களை இழந்து 133 ஓட்டங்களை பெற்று வெற்றியீட்டியது.

இலங்கை சார்பில் தனது கன்னி ஒருநாள் போட்டியில் விளையாடிய சீக்குகே பிரஸன்ன 32 ஓட்டங்களுக்கு 3 விக்கெட்டுகளை வீழ்த்தியதோடு லசித் மலிங்க 2 விக்கெட்டுகளை பதம் பார்த்தார்.

அவுஸ்திரேலியா சார்பில் பந்து வீச்சில் சிறப்பாக செயல்பட்ட டொஹர்டி ஆட்ட நாயகனாக தெரிவானார்.

இரு நாடுகளுக்கும் இடையிலான 5 ஆவதும் கடைசியுமான ஒருநாள் போட்டி இன்று பிரேமதாச மைதானத்தில் நடைபெறவுள்ளது. :!.: :!.:

{)) {))

கிறுப்பயபுள்ள மக்கள் சொதப்பி விட்டார்கள்