பாகிஸ்தானுக்கு எதிரான ஒருநாள் தொடரை தென்ஆப்பிரிக்கா வென்றது

பெனோனி, மார்ச் 24-

தென்ஆப்பிரிக்கா- பாகிஸ்தான் அணிகளுக்கு இடையேயான 5-வது மற்றும் கடைசி ஒருநாள் போட்டி இன்று பொனோனியில் நடைபெற்றது. டாஸ் வென்று பாகிஸ்தான் பேட்டிங் தேர்வு செய்தது. அதன்படி, பர்கத்- ஹபீஸ் தொடக்க ஆட்டக்காரர்களாக களம் இறங்கினார்கள்.

பர்கத் 13 ரன்களிலும், ஹபீஸ் 5 ரன்களிலும் ஆட்டம் இழந்தனர். அதன்பின் வந்த கம்ரான் அக்மல் 49 ரன்கள் எடுத்து அவுட் இழந்தார். அதன்பின் வந்த யூனிஸ்கான் (29), மிஸ்பா-உல்-ஹக் (24), சோயிப் மாலிக் (28) ரன்கள் அடிக்க 49.1 ரன்களில் பாகிஸ்தான் 205 ரன்கள் எடுத்து ஆட்டம் இழந்தது.

206 ரன்கள் எடுத்தால் வெற்றி என்ற எளிய இலக்குடன் தென்ஆப்பிரிக்கா பேட்டிங்கை தொடங்கியது. டி காக் 2 ரன்னில் ஜுனைத் கான் பந்தில் கிளீன்போல்டாகி வெளியேறினார். அடுத்து வந்த இன்க்ராம் 15 ரன்னில் ஹபீஸ் பந்தில் ஆட்டம் இழந்தார்.

3-வது விக்கெட்டுக்கு அம்லாவுடன் கேப்டன் டி வில்லியர்ஸ் ஜோடி சேர்ந்தார். இருவரும் நிதானமாக விளையாடி ரன் சேர்த்தனர். அம்லா 22 ரன்கள் எடுத்த நிலையில் இர்பான் பந்தில் அவுட் ஆனார். அடுத்த வந்த பெஹர்டின், டி வில்லியர்ஸுடன் ஜோடி சேர்ந்தார். இருவரும் சிறப்பாக விளையாடி அணியின் ரன்னை உயர்த்தினர். பெர்ஹர்டின் 35 ரன்னில் இர்பான் பந்தில் அஜ்மலிடம் கேட்ச் கொடுத்து அவுட் ஆனார். இறுதியில் 44 ஓவர்களில் 4 விக்கெட்டுகளை மட்டும் இழந்து 208 ரன் எடுத்து 6 விக்கெட் வித்தியாசத்தில் தென் ஆப்பிரிக்கா வெற்றி பெற்றது.

டி வில்லியர்ஸ் அதிரடியாக விளையாடி 95 ரன் எடுத்தார். மில்லர் 20 ரன் எடுத்தார். ஐந்து போட்டிகள் கொண்ட இந்த தொடரில் 3-2 என்ற கணக்கில் தென் ஆப்பிரிக்கா தொடரை வென்றது.

இதில் ஆட்ட நாயகன் மற்றும் தொடர் நாயகன் விருதை டி வில்லியர்ஸ் பெற்றார்.

:)) :))