அன்னா ஹசாரேவுக்குப் பிரதமர் கடிதம்: பேச்சுவார்த்தைக்கு பிரணாப் நியமனம்

அன்னா ஹசாரேவுக்குப் பிரதமர் கடிதம்: பேச்சுவார்த்தைக்கு பிரணாப் நியமனம்



புதுடில்லி

வலுவான லோக்பால் மசோதா இயற்றக்கோரி உண்ணாவிரதம் இருந்துவரும் சமூக சேவகர் அன்னா
ஹசாரேவுக்குப் பிரதமர் மன்மோகன் சிங் செவ்வாய்க்கிழமை கடிதம் அனுப்பியுள்ளார்.
ஹசாரே குழுவினர் தயாரித்துள்ள ஜன லோக்பால் மசோதாவை நாடாளுமன்ற நிலைக் குழுவின்
பரிசீலனைக்கு அனுப்பி வைக்கும்படி மக்களவைத் தலைவர் மீரா குமாரைக் கேட்டுக்கொள்ள
மத்திய அரசு தயாராக உள்ளது என்று தனது கடிதத்தில் மன்மோகன் சிங் கூறியுள்ளார்.
தனது கடிதத்தில் பிரதமர் கூறியுள்ளதாவது, ஊழலை ஒழிக்க வேண்டும் என்பதில் உங்கள்
நோக்கமும் அரசின் நோக்கமும் ஒன்றுதான். அந்த நோக்கத்தை எவ்வாறு நடைமுறைப்படுத்துவது
என்பதில் நமது வழிமுறைகள் வேறுபடலாம். பரந்த அளவிலான கருத்தொற்றுமையுடன் அரசியல்
சாசனப்படி செல்லத்தக்க வலுவான லோக்பால் சட்டத்தை இயற்ற வேண்டும் என்பதில் அரசு
உறுதியாக இருக்கிறது.
இது குறித்து யாருடனும் பேச்சுவார்த்தை நடத்த நாங்கள் தயாராக இருக்கிறோம். எனினும்
இந்த விடயத்தில் நாடாளுமன்றத்தின் மாட்சிமையையும், சட்டம் இயற்றுவதில் அரசியல் சாசன
வரையறைகளையும் நாம் மனதில் கொள்ள வேண்டும்.
அரசாங்கம் என்ற முறையில், நாடாளுமன்றப் பிரதிநிதிகள் வாயிலாக வெளிப்படுத்தப்படும்
மக்கள் கருத்துக்களுக்கு மரியாதை அளிக்க வேண்டியது எங்கள் பொறுப்பு.
நாடாளுமன்றத்தில் மத்திய அரசு தாக்கல் செய்த லோக்பால் மசோதா ஏற்கெனவே
நிலைக்குழுவின் பரிசீலனையில் உள்ளது. இருப்பினும், ஜன லோக்பால் சட்ட மூலத்தை
நாடாளுமன்றத்தில் தாக்கல் செய்ய வேண்டும் என்ற உங்கள் குழுவினரின் தொடர்ந்த
கோரிக்கையையும் மற்றும் அதைவிடவும் அதிகமாக உங்கள் உடல் நிலையையும் அரசு கருத்தில்
கொண்டுள்ளது. அதனால், ஜன லோக்பால் சட்டமூலத்தை நிலைக்குழுவின் பரிசீலனைக்கு
அனுப்புமாறு மக்களவைத் தலைவரிடம் வேண்டுகோள் விடுக்க அரசு தயாராக உள்ளது. ஜன
லோக்பால் சட்டமூலத்தை மட்டுமல்லாமல், தேசிய ஆலோசனைக் கவுன்சிலைச் சேர்ந்த அருணா
ராய் சமர்ப்பித்துள்ள வரைவு சட்டமூலம் உள்ளிட்டவற்றையும் நிலைக்குழு பரிசீலனை செய்ய
முடியும்.
ஊழல் ஒழிப்புப் பிரச்சினையில் தொடர்புடைய அனைத்து அம்சங்களுடன் ஜன லோக்பால்
சட்டமூலத்தையும் பரிசீலித்து, இச்சட்டத்தில் வேண்டிய மாற்றங்களைப் பரிந்துரைக்க
நிலைக் குழுவுக்கு முழு அதிகாரம் உள்ளது.
மேலும், இந்த நடவடிக்கை துரிதமாக மேற்கொள்ளப்பட வேண்டுமென்று நீங்கள் விரும்பினால்,
அது குறித்தும் நிலைக் குழுவுக்கு அரசு வேண்டுகோள் விடுக்கும். எனது ஆலோசனைகளைப்
பரிசீலிப்பீர்கள் என்றும், அதையடுத்து உண்ணாவிரதத்தை முடித்துக் கொள்வீர்கள்
என்றும் நம்புகிறேன் என்று தனது கடிதத்தில் பிரதமர் கூறியுள்ளார்.
அனைத்துக் கட்சிக் கூட்டம்
ஹசாரேவின் தொடர், உண்ணாவிரதத் தையடுத்து இப்பிரச்சினை குறித்து விவாதிப்பதற்காக
நேற்று மாலை அனைத்துக் கட்சிக் கூட்டம் நடைபெற்றது. அதையடுத்து, இந்த வார
இறுதிக்குள் இப்பிரச்சினையில் சுமுகத் தீர்வு எட்டப்படும் என்று தகவல்கள்
தெரிவிக்கின்றன.
அமைச்சருடன் கேஜரிவால் சந்திப்பு
காங்கிரஸ் நாடாளுமன்ற உறுப்பினர் சந்தீப் தீட்சித்தின் இல்லத்தில் மத்திய
சட்டத்துறை அமைச்சர் சல்மான் குர்ஷித்தை ஹசாரே குழுவின் உறுப்பினரான அரவிந்த்
கேஜரிவால் சந்தித்துப் பேசினார். இந்த 9 நாள்களில், இரு தரப்புக்கும் இடையே
நேரிடையாக நடந்த முதல் பேச்சுவார்த்தை இது.
பேச்சுவார்த்தைக்குப் பிரணாப் நியமனம்
ஹசாரே குழுவினரின் கோரிக்கை குறித்து அவர்களிடம் பேச்சுவார்த்தை நடத்த மத்திய
நிதியமைச்சர் பிரணாப் முகர்ஜியை மத்திய அரசு நியமித்தது. பிரணாப் முகர்ஜியுடன்
பேசுவதற்கு, தனது குழு சார்பில் அரவிந்த் கேஜரிவால், மூத்த வழக்குரைஞர் சாந்தி
பூஷண், முன்னாள் ஐபிஎஸ் அதிகாரி கிரண் பேடி ஆகியோரை ஹசாரே நியமித்துள்ளார்.
முன்னதாக, மத்திய உள்துறை அமைச்சர் ப. சிதம்பரம், பாதுகாப்புத்துறை அமைச்சர் எ.கே.
அந்தோனி, நாடாளுமன்ற நிலைக் குழுத் தலைவர் அபிஷேக் மனு சிங்வி, பிரணாப்
முகர்ஜியுடன் மன்மோகன் சிங் ஆலோசனை நடத்தினார். பிரதமருடன் காங்கிரஸ் பொதுச் செயலர்
ராகுல் காந்தியும் வெகு நேரம் ஆலோசனை நடத்தினார்.

இந்த ஆளுடைய நோக்கமே காங்கிரசை பதவி விட்டு இறக்கும் என்ற எண்ணமே .ஊழல் செய்யும் செய்து வரும் பிஜேபியை ஒரு வார்த்தைக் கூட சொல்லவில்லை என்பதை நடுநிலையாளர்கள்
கவனிக்கணும் .

kalainilaa wrote:இந்த ஆளுடைய நோக்கமே காங்கிரசை பதவி விட்டு இறக்கும் என்ற எண்ணமே .ஊழல் செய்யும் செய்து வரும் பிஜேபியை ஒரு வார்த்தைக் கூட சொல்லவில்லை என்பதை நடுநிலையாளர்கள்
கவனிக்கணும் .