பெரு நாட்டில் பூகம்பம்: கட்டிடங்கள் குலுங்கின

by **நண்பன்** Thu 25 Aug 2011 - 10:14

லிமா, ஆக. 25-

தென் அமெரிக்காவில் பிரேசில்
நாட்டையொட்டி பெரு நாடு உள்ளது. இங்கு நேற்று (இந்திய நேரப்படி நள்ளிரவு)
பயங்கர பூகம்பம் ஏற்பட்டது. தலைநகர் லிமா அருகில் உள்ள புகல்பா நகரை மையமாக
கொண்டு இந்த பூகம்பம் தாக்கியது. அமேகான் சதுப்பு நிலப்பகுதி மற்றும் லிமா
நகரம் பக்கத்தில் உள்ள பிரேசில் நாட்டு எல்லைப் பகுதியில் இந்த நில
நடுக்கம் உணரப்பட்டது.

இது ரிக்டர் அளவில் 7 ஆக
பதிவாகி இருந்தது. 600 கி.மீ. சுற்று வட்டாரப் பகுதியில் பூகம்பத்தின்
தாக்கம் இருந்தது. இதனால் தலைநகர் லிமாவில் கட்டிடங்கள் குலுங்கின.
வீடுகளில் கட்டிடங்களில் இருந்த மக்கள் பீதியில் வெளியே ஓடி வந்து
சாலைகளில் குவிந்து இருந்தனர்.

பூகம்பம் காரணமாக
லிமா நகரில் செல்போன் இணைப்பு துண்டிக்கப்பட்டது. சூப்பர்
மார்க்கெட்டுகளில் பொருள்கள் சிதறி கீழே விழுந்தது. பொருள் வாங்க வந்த
மக்கள் அலறியடித்து ஓடினார்கள்.

மத்திய பெரு
நாட்டில் ரேடியோவில் அபாய எச்சரிக்கை விடுக்கப்பட்டது. இதனால் பள்ளிகளில்
இருந்து மாணவர்கள் வெளியேற்றப்பட்டனர். அரசு கட்டிடங்களில் இருந்த
ஊழியர்களும் அவசரமாக வெளியேறினார்கள். இதையடுத்து லிமாவில் அவசர உதவிக்கு
மீட்பு படையினர் தயார் நிலையில் வைக்கப்பட்டனர். ஆனால் சேதம் விவரம் பற்றி
தகவல் ஏதும் இல்லை என்று புகலிக் காவில் உள்ள அதிகாரி ஒருவர் கூறினார்.

ஆயில்,
கியாஸ் மற்றும் எரிபொருள் விநியோகம் வழக்கம்போல் நடைபெறுவதாக எண்ணை
நிறுவனங்கள் தெரிவித்துள்ளன. நேற்று முன்தினம் அமெரிக்காவில் நிலநடுக்கம்
ஏற்பட்டது.

அதைத் தொடர்ந்து தற்போது தென்
அமெரிக்காவில் நிலநடுக்கம் ஏற்பட்டுள்ளது. இதற்கு முன் 2007-ம் ஆண்டு பெரு
நாட்டில் 7.9 ரிக்டர் அளவில் மிகப்பெரிய அளவில் பூகம்பம் தாக்கியது. இதில்
500-க்கும் மேற்பட்டோர் பலியானார்கள். ஆயிரக்கணக்கான கட்டிடங்கள் இடிந்து
தரைமட்டமானது