கிறீஸ் மனிதனின் செயற்பாடு அரசின் கட்டுப்பாட்டிலேயே இடம்பெறுகிறது: யோகேஸ்வரன் _

by **முனாஸ் சுலைமான்** Thu 25 Aug 2011 - 16:37

மர்ம மனிதனின் செயற்பாட்டினால் பெண்கள்
தனித்திருக்க அஞ்சுகின்றனர். ஆண்கள் வீட்டில் இருப்பதனால் அவர்களின்
தொழில்கள் பாதிக்கப்பட்டிருக்கின்றது. மர்ம மனிதனின் செயற்பாடு
அரசாங்கத்தின் கட்டுப்பாட்டிலேயே இடம்பெறுகின்றது என்று தமிழ் தேசியக்
கூட்டமைப்பின் மட்டு. மாவட்ட எம்.பி.யான எஸ். யோகேஸ்வரன் தெரிவித்தார்.
பாராளுமன்றத்தில் நேற்று புதன்கிழமை நடைபெற்ற இலங்கை ஏற்றுமதி அபிவிருத்தி
சட்டத்தின் கீழ் கட்டளைகள், தேயிலை சிறு பற்று நில அபிவிருத்தி சட்டத்தின்
கீழான பிரேரணை மீதான விவாதத்தில் கலந்து கொண்டு உரையாற்றும் போதே அவர்
மேற்கண்டவாறு தெரிவித்தார்.

அவர் தொடர்ந்து உரையாற்றுகையில், ஏற்றுமதி துறை பற்றி உரையாற்றிக்
கொண்டிருக்கின்றோம். என்றாலும் மக்கள் நிம்மதியாக வேலைகளுக்கு செல்ல
முடியாத நிலைமையே நாட்டில் இன்று நிலவுகின்றது. களுவங்கேணியில் 100
வீதமானவர்கள் மீனவர்கள். அவர்கள் மீன் பிடிக்க செல்ல முடியவில்லை.

வீட்டில் மனைவி மற்றும் பெண்களை தனியாக விட்டுச் செல்ல முடியவில்லை. தனியாக
விட்டு செல்வதற்கு அஞ்சுகின்றனர். மர்ம மனிதனின் செயற்பாட்டை தீர்க்க
வேண்டிய பொறுப்பு அரசாங்கத்திற்கும் எதிர்க்கட்சியினருக்கும் இருக்கின்றது.

பெண்கள் வீதியில் நடமாட முடியவில்லை. மாணவர்கள் பாடசாலைக்கு செல்ல
முடியவில்லை. அச்சம் பீதியிலேயே மக்கள் வாழ்கின்றனர். மட்டக்களப்பு
தாதியர் விடுதிக்குள்ளும் புகுந்து கிறிஸ் மனிதன் தாக்குதல் நடத்துகின்றான்
என்றார்.

யோகேஸ்வரன் எம்.பி. கிறீஸ் மனிதனின் விவகாரம் தொடர்பில் சுட்டிக்காட்டிய
போதெல்லாம் ஆளும் தரப்பு பிரதம கொறடாவும் அமைச்சருமான தினேஷ் குணவர்தன
ஆளும் கட்சியின் எம்.பியான ஏ.எச்.எம். அஸ்வர் மற்றும் பியசேன எம்.பி.
ஆகியோர் நிலையியற் கட்டளைகளை சுட்டிக்காட்டி விடயதானங்களுக்கு ஏற்ப
உரையாற்றுமாறு அடிக்கொரு தடவைகள் ஒழுங்கு பிரச்சினைகளை கிளப்பினர்.

நிலையியற் கட்டளையின் பிரகாரமே தான் உரையாற்றுவதாக தெரிவித்த யோகேஸ்வரன் எம்.பி.,

பொலிஸ் இராணுவத்துடன் எமக்கு பிரச்சினை இல்லை. பல்வேறு பிரச்சினைகளை நாம்
படைத் தரப்பினருடன் கலந்தாலோசித்து தீர்வு கண்டிருக்கின்றோம். எனினும்
கிறீஸ் மனிதன் பிரச்சினை தொடர்பில் எவ்விதமான தீர்வையும் பெற்றுக்கொள்ள
முடியவில்லை. மட்டக்களப்பில் மட்டுமே கிறீஸ் மனிதனின் செயற்பாட்டினால் 16
பெண்கள் பாதிக்கப்பட்டுள்ளனர் என்று கூறிக் கொண்டிருந்த வேளையில் மீண்டும்
ஒழுங்கு பிரச்சினை எழுப்பப்பட்டது.

நான் விடயதானங்களுக்கு ஏற்பவே உரையாற்றுகின்றேன். எனினும் மர்ம மனிதனின்
செயற்பாடு அரசாங்கத்தின் கட்டுப்பாட்டிலேயே நிறைவேறுகின்றது என்று தனது
உரையை இடைநடுவிலேயே இடைநிறுத்திகொண்டார்.