தி.மு.க.வினர் மீதான கைது நடவடிக்கை:எதிர்காலத்தில் போலீசாரும் பதில் சொல்ல வேண்டும்; கருணாநிதி பேட்டி

தி.மு.க. தலைவர் கருணாநிதி சென்னையில் நேற்று நிருபர்களுக்கு பேட்டி அளித்தார்.

நிருபர்கள் கேட்ட கேள்விகளும் அதற்கு கருணாநிதி அளித்த பதில்களும் வருமாறு:-

கேள்வி:-சொத்து
குவிப்பு வழக்கில் ஜெயலலிதா நேரில் ஆஜராகத்தான் வேண்டும் என்று உச்ச நீதி
மன்ற நீதிபதிகள் சொல்லியிருக்கிறார்களே? பதில்:-நீதிபதிகள் அதை மட்டும்
கூறவில்லை. ஜெயலலிதாவுக்காக மூத்த வழக்கறிஞர் அரீஷ்சால்வே ஆஜராகி
இருக்கிறார். அவரை பார்த்து நீதிபதிகள், ஜெயலலிதா இந்த வழக்கிலே எத்தனை
முறை வாய்தா வாங்குவார்? நீங்கள் அந்த அம்மையாருக்கு சொல்லக் கூடாதா? என்று
அறிவுரை சொல்லியிருக்கிறார்கள்.

ஜெயலலிதா இப்படி
எல்லாம் செய்வது நல்லது அல்ல. நேரடியாக சென்று விசாரணையை சந்திக்க
சொல்லியிருக்கிறார்கள். கேள்வி:-தமிழக சட்டப்பேரவையில் தி.மு.க. இன்று
வெளிநடப்பு செய்திருக்கிறார்கள். மாநகராட்சிக்கான திறந்த வெளி
ஒதுக்கீட்டிற்கான காலி இடம் அண்ணா அறிவாலயத்திலே உள்ளதை மீண்டும்
கைப்பற்றுவதற்கான முயற்சி மேற்கொள்ளப்படும் என்று அமைச்சர் பதில்
சொல்லியிருக்கிறார். இதைப்பற்றி உங்கள் கருத்து என்ன?

பதில்:-அண்ணா
அறிவாலயத்தில் உள்ள அந்த இடம் பற்றி ஏற்கனவே பிரச்சினை எழுப்பி ஆணைகள்
எல்லாம் பிறப்பிக்கப்பட்டு உள்ளது. அந்த இடத்திலே அண்ணா சிலை இருப்பதை
நீங்கள் அறிவீர்கள். அந்த சிலை அங்கே இருக்க கூடாது என்று நினைக்கிறார்கள்.
ஏனென்றால் அண்ணா தி.மு.க. அல்லவா? ஆகவே அண்ணா சிலை இருக்கக் கூடாது
என்பதற்கான முயற்சியிலே ஈடுபட எண்ணுகிறார்கள்.

கேள்வி:-தொடர்ந்து
தி.மு.க. கழகத்தை சேர்ந்த முக்கியமானவர்கள் கைது செய்யப்படுகிறார்கள்.
சட்டப் பேரவையிலும் பேசுவதற்கான வாய்ப்பு தரப்படுவதில்லை. இன்றைக்கு கூட
முன்னாள் அமைச்சர் வீரபாண்டி ஆறுமுகம் மீண்டும் ஒரு வழக்கிலே கைது
செய்யப்பட்டு இருக்கிறாரே. பதில்:-முன்னாள் அமைச்சர் வீரபாண்டி ஆறுமுகம்,
உயர் நீதிமன்றத்தினால் ஜாமீனில் வெளியே அனுப்பப்பட்டவரை, திடீரென்று வேறோரு
வழக்கில் கைது செய்கிறார்கள்.

அது எந்த வழக்கிலே
என்றால், ஏற்கனவே வீரபாண்டி ஆறுமுகத்திற்கு சாதகமாக உயர்நீதி மன்றத்திலே
தீர்ப்பு வழங்கப்பட்ட ஒரு வழக்கில் இன்றைக்கு அவரை மீண்டும் கைது
செய்கிறார்கள். இப்படிப்பட்ட சட்டத்திற்கு எதிரான அக்கிரமங்கள், அராஜகங்கள்
இந்த ஆட்சியில் நடைபெற்றுக் கொண்டு இருக்கின்றன. போலீசாரும் சேர்ந்து
கொண்டு செய்கிற காரியங்கள் இவை. இதற்கெல்லாம் எதிர்காலத்தில் போலீசாரும்
பதில் சொல்ல வேண்டும். நான் போலீசாரை மிரட்டவில்லை. அவர்களும் இதற்கு பதில்
சொல்ல வேண்டி வரும்.

இவ்வாறு கருணாநிதி பேட்டி அளித்தார்.