உள்ளாட்சி தேர்தல்: கருணாநிதி பேட்டி

by **நண்பன்** Sat 22 Oct 2011 - 10:44

தி.மு.க. தலைவர் கருணாநிதி நேற்று சென்னையில் இருந்து டெல்லி
புறப்பட்டு செல்வதற்கு முன்னதாக நிருபர்களுக்கு பேட்டி அளித்தார். அப்போது
அவரிடம், நிருபர்கள் கேட்ட கேள்விகளும், அதற்கு அவர் அளித்த பதில்களும்
வருமாறு:-

கேள்வி:- உள்ளாட்சி மன்ற தேர்தல் முடிவுகளைப் பற்றி தங்கள் கருத்து?

பதில்:-
ஆளுங்கட்சி ஆட்சிப் பொறுப்புக்கு வந்த சில மாதங்களில் உள்ளாட்சி மன்றத்
தேர்தல்களை நடத்தி பெரும் வெற்றி பெற்றிருக்கிறது. இதில் ஒன்றும் ஆச்சரியம்
இல்லை. ஏனென்றால், கடந்த காலத்தில் தி.மு.க. ஆளும் பொறுப்பை ஏற்றபோது
உடனடியாக உள்ளாட்சித் தேர்தல்களை நடத்தி, அதில் பெருவாரியான மாநகராட்சி,
நகராட்சி, பேரூராட்சிகளை கைப்பற்றி இருக்கிறோம்.

அதனால்,
இது ஒன்றும் புதுமை அல்ல. உள்ளாட்சி மன்றங்களில் தேர்ந்தெடுக்கப்பட்டுள்ள
நண்பர்கள், உறுப்பினர்கள், தலைவர்கள் எல்லாம் கட்சி சார்பற்ற முறையில்
பொதுமக்களுக்கு அத்தியாவசிய தேவைகளை, அடிப்படை வசதிகளை செய்து ஆவன
செய்யவேண்டும் என்ற வேண்டுகோளோடு அவர்களுக்கெல்லாம் என்னுடைய வாழ்த்துக்களை
தெரிவித்துக்கொள்கிறேன். சோனியாவை சந்திப்பேன்

கேள்வி:- சோனியாகாந்தி வெளிநாட்டில் அறுவை சிகிச்சை முடிந்து வந்திருக்கிறார். டெல்லி செல்லும் நீங்கள் அவரை சந்திப்பீர்களா?

பதில்:- கட்டாயம் சந்திப்பேன்.

கேள்வி:-
தேர்தல் ஆணையம் சரியாக செயல்படவில்லை என்று எல்லாக் கட்சிகளும் புகார்கள்
செய்திருக்கிறார்களே. தி.மு.க. சார்பில் என்ன சொல்கிறீர்கள்?

பதில்:-
அவர்கள் சொன்னதற்கு மாற்றுக் கருத்தே இல்லை. எல்லாக் கட்சிகளும் சொன்ன
கருத்தைத்தான் நானும் சொல்கிறேன். பலமுறை குறைபாடுகளை எடுத்துச்சொல்லியும்
கூட தேர்தல் ஆணையம் எங்கள் குரலை காதில் போட்டுக்கொள்ளவில்லை. நீதிமன்றம்
அச்சுறுத்தியும் கூட தேர்தல் ஆணையம் அதற்குக் கட்டுப்பட்டு நடந்ததாகத்
தெரியவில்லை. கூடங்குளம் பிரச்சினை

கேள்வி:- கூடங்குளம் சம்பந்தமாக பிரதமரிடம் சொல்வீர்களா?

பதில்:-
மத்திய அரசு பெரிய குழு ஒன்றினை அமைத்திருக்கிறார்கள். இதுகுறித்து
விவாதம் நடந்தால் எங்கள் கருத்துக்களை எடுத்துச் சொல்வோம்.

இவ்வாறு தி.மு.க. தலைவர் கருணாநிதி கூறினார்.
மாலை மலர்