அரசுக்கு ஆதரவாக வாக்களிக்க எம்.பிகளுக்கு லஞ்சம் கொடுத்ததாக அமர்சிங் உட்பட மூவர் கைது

அரசுக்கு ஆதரவாக வாக்களிக்க எம்.பிகளுக்கு லஞ்சம் கொடுத்ததாக அமர்சிங் உட்பட
மூவர் கைது




புதுடில்லி;

எம்.பி க்களுக்கு இலஞ்சம் கொடுத்த வழக்கில் மாநிலங்களவை உறுப்பினரும் சமாஜவாதி
கட்சியின் முன்னாள் பொதுச் செயலாளருமான அமர்சிங், பா.ஜ.க முன்னாள் எம்.பிக்கள்
இருவர் ஆகியோர் செவ்வாய்க்கிழமை கைது செய்யப்பட்டு திகார் சிறையில் அடைக்கப்பட்டனர்.
அவர்களது பிணை மனுக்களை தள்ளுபடி செய்த டில்லி நீதிமன்றம், மூவரையும் 14 நாள்
காவலில் வைக்கும்படி உத்தரவிட்டது.
2008ம் ஆண்டு மக்களவையில் நடந்த நம்பிக்கை வாக்கெடுப்பில் ஐக்கிய முற்போக்குக்
கூட்டணி அரசுக்கு ஆதரவாக வாக்களிப்பதற்கு எதிர்க்கட்சி எம்.பிக்களுக்கு இலஞ்சம்
கொடுக்கப்பட்டதாகக் கூறப்படுவது தொடர்பாக டில்லி பொலிஸார் விசாரித்து வருகின்றனர்.
இந்த விசாரணை மந்தமாக நடப்பதாக உச்ச நீதிமன்றம் அதிருப்தி தெரிவித்ததையடுத்து, இந்த
விவகாரத்தில் தொடர்புடையதாக அமர்சிங் உள்ளிட்டோர் மீது டில்லி பொலிஸார்
குற்றப்பத்திரம் தாக்கல் செய்தனர். இந்த வழக்கில் நேரில் ஆஜராக வேண்டும் என்று
அமர்சிங், பாஜக முன்னாள் எம்.பிக்கள் ஃபாக்ன் சிங், குலஸ்தே மகாவீர் சிங் பகோரா
ஆகியோருக்கு நீதிமன்றம் உத்தரவிட்டிருந்தது. இதையடுத்து இவர்கள் மூவரும் டில்லி
நீதிமன்றத்தில் செவ்வாய்க்கிழமை ஆஜராகினர். தமது உடல் நிலையைக் கருத்தில் கொண்டு
தாம் நேரில் ஆஜராவதிலிருந்து விலக்களிக்க வேண்டும் என்று அமர்சிங் சார்பில்
வாதிடப்பட்டது. குலஸ்தே, பகோரா ஆகியோரும் தங்களுக்கு பிணை கோரி மனுதாக்கல் செய்தனர்.
ஆனால் இந்த மனுக்களை நீதிபதி சங்கீதா திங்ரா சேகல் தள்ளுபடி செய்தார்.
டில்லி பொலிஸார் தாக்கல் செய்த குற்றப்பத்திரத்தில் பாஜக மூத்த தலைவர் எல்.கே.
அத்வானியின் முன்னாள் உதவியாளர் சுதீந்திர குல்கர்னியின் பெயரும் இடம்பெற்றிருந்தது.
ஆனால் அவர் வெளிநாட்டில் இருப்பதால் நீதிமன்றத்தில் ஆஜராகவில்லை.
முன்னதாக தமக்கு பிணை கோரிய அமர்சிங், அண்மையில்தான் தமக்கு சிறுநீரக மாற்று அறுவைச்
சிகிச்சை நடந்ததாகவும், தொடர்ந்து தமக்கு தீவிர மருத்துவ கண்காணிப்பு
தேவைப்படுவதாகவும் கூறினார்.
என்னுடைய இரு சிறுநீரகங்களும் செயலிழந்துவிட்டன. இப்போது மாற்றுச் சிறுநீரகங்களின்
துணையுடன் தான் உயிர்வாழ்ந்து வருகிறேன். பொதுவான இடங்களில் பல நச்சு மாசுக்கள்
இருக்கின்றன. எனது சிறுநீர்ப் பாதையில் நோய்த் தொற்றுகள் இருப்பதால், அவை
சிறுநீரகங்களுக்கு ஆபத்தை ஏற்படுத்தும் என்று அவர் வாதிட்டார்.
அமர்சிங்குக்கு இடைக்கால பிணை வழங்க வேண்டும் என்று கேட்டுக்கொண்ட அவரது
வழக்குரைஞர்கள் அமரேந்திர சரண், ஹரிகரன் ஆகியோர், அமர்சிங் மீதான குற்றங்கள்
நிரூபிக்கப்படாமல் போவதற்கான வாய்ப்புகள் அதிகம் இருக்கின்றன. அவர் ஆதாரங்களை
அழிப்பதற்கோ, தலைமறைவாகவோ எந்த முகாந்திரமும் இல்லை என்றனர். ஆனால் இதை நீதிபதி
ஏற்கவில்லை. ‘இந்த மனுக்கள் மீது உரிய நேரத்தில் முடிவெடுக்கப்படும். அமர்சிங்,
குலஸ்தே, பகோரோ ஆகிய மூவரையும் 14 நாள் நீதிமன்றக் காவலில் வைக்க வேண்டும். வரும்
19ம் திகதி நீதிமன்றத்தில் ஆஜர்படுத்த வேண்டும்’ என்று உத்தரவிட்டார். பிணை மனுக்கள்
தொடர்பாக பதிலளிக்குமாறு டில்லி பொலிஸாருக்கு நீதிபதி உத்தரவிட்டார். இதையடுத்து
அவர்கள் மூவரும் திகார் சிறையில் அடைக்கப்பட்டனர்.

:”@: