சர்வதேச காபி ஏற்றுமதி 24 சதவீதம் அதிகரிப்பு

கடந்த 2010ம் ஆண்டு, உலக அளவிலான காபி ஏற்றுமதி, மதிப்பின் அடிப்படையில், 24 சதவீதம் அதிகரித்து, 1,650 கோடி டாலராக (75 ஆயிரத்து 900 கோடி ரூபாய்) உயர்ந்துள்ளது. அளவின் அடிப்படையிலான இதன் ஏற்றுமதி, 9.67 கோடி மூட்டைகளாக (1 மூட்டை = 60 கிலோ) வளர்ச்சி கண்டுள்ளது என, சர்வதேச காபி வாரியம் தெரிவித்துள்ளது. கடந்த 2009ம் ஆண்டில், உலகளவிலான காபி ஏற்றுமதி, மதிப்பின் அடிப்படையில், 1,330 கோடி டாலராகவும் (61 ஆயிரத்து 180 கோடி ரூபாய்), அளவின் அடிப்படையில், 9.62 கோடி மூட்டைகளாகவும் இருந்தது. வரும் 2011-12ம் காபி பருவத்தில் (அக்டோபர் - செப்டம்பர்), காபி உற்பத்தி 13 கோடி மூட்டைகளாக இருக்கும் என மதிப்பிடப்பட்டுள்ளது. சென்ற ஆண்டில், சர்வதேச அளவில் காபிக்கான தேவை 13.48 கோடி மூட்டைகள் என்ற அளவில் இருந்தது. கடந்த 2000மாவது ஆண்டில், காபிக்கான தேவை 10.55 கோடி மூட்டைகளாக இருந்தது. இது, 2010ம் ஆண்டில், 13.48 கோடி மூட்டைகளாக அதிகரித்துள்ளது. ஆக, கடந்த பத்து ஆண்டில், காபிக்கான தேவை 28 சதவீதம் உயர்ந்துள்ளது. வளர்ந்து வரும் சந்தைகள் மற்றும் ஏற்றுமதி மேற்கொள்ளும் நாடுகளில், காபிக்கான தேவை, தொடர்ந்து நல்ல அளவில் அதிகரித்து வருகிறது. இதுமட்டுமின்றி, பாரம்பரியமாக காபி இறக்குமதி செய்து கொள்ளும் நாடுகளிலும், காபிக்கான சந்தைகள் விரிவடைந்து வருகின்றன என, சர்வதேச காபி வாரியம் தெரிவித்துள்ளது. குறிப்பாக, 2000 - 2010 ஆண்டு வரையிலான, பத்தாண்டு காலத்தில், காபி ஏற்றுமதி மேற்கொள்ளும் நாடுகளில், காபிக்கான தேவை 56.6 சதவீதம் அதிகரித்து, 2.64 கோடி மூட்டையிலிருந்து, 4.13 கோடி மூட்டைகளாக உயர்ந்துள்ளது. இதே போன்று, வளர்ந்து வரும் நாடுகளிலும், காபிக்கான தேவை 33.3 சதவீதம் உயர்ந்து, 1.37 கோடி மூட்டையிலிருந்து, 1.82 கோடி மூட்டைகளாக அதிகரித்துள்ளது. இதே காலத்தில், பாரம்பரியமாக காபி இறக்குமதி செய்து கொள்ளும் நாடுகளிலும் காபிக்கான தேவை, 15 சதவீத அளவிற்கு வளர்ச்சி கண்டு, 6.54 கோடி மூட்டையிலிருந்து, 7.52 கோடி மூட்டைகளாக அதிகரித்துள்ளது என, சர்வதேச காபி வாரியம் தெரிவித்துள்ளது.

தகவலுக்கு நன்றி