இந்தியாவிற்கு வந்த சுற்றுலா பயணிகள் எண்ணிக்கை 38 லட்சமாக உயர்வு

புதுடில்லி : சென்ற ஆகஸ்ட் மாதத்தில்,
இந்தியாவிற்கு வந்த வெளிநாட்டு பயணிகள் எண்ணிக்கை, 4 லட்சத்து 2 ஆயிரமாக
அதிகரித்துள்ளது. இது, கடந்த ஆண்டின் இதே மாதத்தில் வருகை தந்த சுற்றுலா
பயணிகளை விட, 5.30 சதவீதம் (3லட்சத்து 82 ஆயிரம்) உயர்வாகும். கடந்த
2009ம் ஆண்டு ஆகஸ்ட் மாதம், இந்தியாவிற்கு வந்த சுற்றுலா பயணிகளின்
எண்ணிக்கை 3 லட்சத்து 70 ஆயிரம் என்ற அளவில் இருந்தது குறிப்பிடத்தக்கது.
மத்திய சுற்றுலாத் துறை அமைச்சகம், "ஒளிரும் இந்தியா' திட்டத்தை அறிமுகம்
செய்து, வெளிநாட்டு சுற்றுலா பயணிகளை கவரும் வகையில், சுற்றுலாத் துறையில்
பல புதுமைகளை செய்து வருகிறது. இதையடுத்து, இந்தியாவிற்கு வரும் சுற்றுலா
பயணிகளின் எண்ணிக்கை தொடர்ந்து அதிகரித்து வருகிறது.
நடப்பு 2011ம் ஆண்டு ஜனவரி முதல் ஆகஸ்ட் வரை, இந்தியாவிற்கு வந்த
வெளிநாட்டு பயணிகளின் எண்ணிக்கை, 38 லட்சத்து 19 ஆயிரமாக அதிகரித்துள்ளது.
இது, கடந்த 2010ம் ஆண்டு, இதே காலத்தில் வருகை தந்த சுற்றுலா பயணிகளை விட,
10.20 சதவீதம் (34 லட்சத்து 67 ஆயிரம்) அதிகமாகும்.
சர்வதேச சுற்றுலா பயணிகளின் எண்ணிக்கையுடன் ஒப்பிடும் போது, இந்தியாவிற்கு
வருகை தரும் சுற்றுலா பயணிகளின் எண்ணிக்கை, 0.5 சதவீதம் என்றளவில் தான்
உள்ளது. இதை, வரும் 12வது ஐந்தாண்டு திட்ட காலத்திற்குள், 1 சதவீதமாக
உயர்த்த, மத்திய சுற்றுலாத் துறை அமைச்சகம் பல்வேறு நடவடிக்கைகளை எடுத்து
வருகிறது.