லஞ்சப் பணத்தை கொடுக்காததால் ஒரு டிரக் ஓட்டுனர் கொலை

கேட்ட லஞ்சப் பணத்தை கொடுக்காததால் ஒரு டிரக் ஓட்டுனர் சாலை போக்குவரத்து அதிகாரிகளால் கொலை செய்யப்பட்ட கொடூர சம்பவம் உத்திரபிரதேசத்தில் நடைபெற்றுள்ளது.


உ.பி.யில் உள்ள செய்யத்ராசா பகுதிக்கு உட்பட்ட நௌபத்புர் என்ற பகுதியில் சாலை போக்குவரத்து அதிகாரிகள் வாகனச் சோதனையில் ஈடுபட்டுள்ளனர். அப்போது அங்கு வந்த ஒரு டிரக்கை அவர்கள் எடை போட்டபோது அது கூடுதல் எடை இல்லாமல் சரியாக இருந்தது. இருந்தாலும் வாகன ஓட்டுனரான ஆனந்தலால் குப்தா ( 50) என்பவரிடம் அங்கிருந்த காவலர் ரூ1000 லஞ்சமாக கேட்டுள்ளார்.

முதலில் கொடுக்க மறுத்த குப்தா பின்பு ரூ 500 தருவதாக சொல்லியிருக்கிறார். இதனால் ஆத்திரமடைந்த காவலர்களும் எடைமேடையில் வேலை செய்து கொண்டிருந்த சிவகுமார் என்பவரும் அவரைக் கடுமையாக தாக்கி உள்ளார்கள். இத்தாக்குதலினால் அவர் அந்த இடத்திலேயே பலியானார். அவரது மகன் அஸ்வினி (23) சம்பவத்தை நேரில் பார்த்துள்ளார்.

இந்த சம்பவத்தினால் கொதிப்படைந்த அந்தப்பகுதி மக்கள் போராட்டத்தில் ஈடுபட்டதோடு காவல்துறையினர் மீது கல்லெறிந்து தாக்குதல் நடத்தினர். இந்த சம்பவத்தில் ஒரு காவலருக்கு காயம் ஏற்பட்டுள்ளது. தடியடி நடத்தி போராட்டம் செய்த மக்களை காவல்துறையினர் கலைத்தனர்.

ஆனந்தலால் குப்தா கொலை செய்யப்பட்டது சம்பந்தமாக முதல் தகவல் அறிக்கை பதிவு செய்யப்பட்டு விசாரணை நடப்பதாக காவல்துறை உயர் அதிகாரி ஷலாப் மாதுர் தெரிவித்துள்ளார்.