Puli Vesham(புலி வேஷம்)

கிராமத்திலும், நகரத்திலும் பயணிக்கிற ஒரு வெகுளி இளைஞனின் கதை.

சின்ன வயதில் அனாதையாக நிற்கும் ஆர்.கே.வை வீட்டுக்கு அழைத்து வந்து தன்
மகள் திவ்ய பத்மினிக்கு பாதுகாவலராக வேலைக்கு வைக்கிறார் இளவரசு. பள்ளி,
கோவில் என திவ்ய பத்மினி போகும் இடமெல்லாம் ஆர்.கே.தான் பாதுகாப்பு வளையம்.
திவ்ய பத்மினி - ஆர்.கே. இடையிலான பாச உறவில் இளவரசுக்கு சின்ன சந்தேகம்.
ஆர்.கே.வை அடித்து விரட்டுகிறார் இளவரசு. வீட்டை விட்டு, கிராமத்தை விட்டு
சென்னைக்குப் பயணமாகும் ஆர்.கே.வுடன், திவ்ய பத்மினியும் பஸ் ஏறுகிறார்.
அதன் பிறகு நடக்கும் ஒரு சம்பவம் ஆர்.கே.வை எங்கே கொண்டு நிறுத்தியது?
திவ்ய பத்மினி - ஆர்.கே. இடையிலான அன்பு என்ன ஆனது? என்பதை அசமந்தமாக
விவரித்துச் செல்கிறது திரைக்கதை!

'சின்னதம்பி' கதையை தன் வழக்கமான சென்டிமென்ட் மசாலா பூசி, ஆக்ஷன்
கோட்டிங் கொடுத்திருக்கிறார் இயக்குநர் பி.வாசு., கமர்ஷியல் அயிட்டங்களைப்
பார்த்துப் பார்த்து ஒருங்கிணைத்தவர், லாஜிக்கை மறந்து விட்டார்.
திரைக்கதையில் அவ்வளவு ஓட்டை.

'எல்லாம் அவன் செயல்', 'அழகர்மலை' படங்களுக்குப் பிறகு ஆர்.கே
நடித்திருக்கும் படம் இது. பாசம் நிறைந்த மனிதன், கோபக்கார தாதா என இரண்டு
பாத்திரங்களை நன்றாகவே பேலன்ஸ் பண்ணுகிறார் ஆர்.கே., தன் பாத்திரத்தின்
தன்மை உணர்ந்து நடித்திருந்தாலும், திரைக்கதையில் பேலன்ஸ் இல்லாததால்
படமும் தடுமாறுகிறது. திவ்ய பத்மினியிடம் பாச மழை பொழியும் போதும், இளவரசு
அடித்து வீட்டை விட்டு வெளியே அனுப்பும் போதும் ஆர்.கே.வின் நடிப்பில்
பளிச். தாதாயிஸத்தை முக்கிய கருவாக கொண்ட கதையில் 'இந்த காட்சி செம
மிரட்டல்' என்று சொல்லும் அளவுக்கு ஒரு காட்சிகூட இல்லை.

நடு இரவில் மரத்தின் மேல் நடக்கும் அந்த சண்டைக்காட்சி அசத்தல்.
படத்தில் இரு நாயகிகள் என்றாலும், அதிக ரொமான்ஸ் காட்சிகளை வைத்து
சங்கடப்படுத்தாதது ஆறுதல்.

திவ்ய பத்மினிக்கு நல்ல ஸ்கோப். நன்றாக பயன்படுத்திக் கொண்டிருக்கிறார்.
ஆனால், தன்னை பெண் பார்க்க வருபவர்களிடம் 'திருமணத்துக்குப் பிறகும் இவன்
என் கூடத்தான் இருப்பான்'னு ஆர்.கே.வை கை நீட்டுவது லாஜிக் தடுமாற்றம்.

லூசுப் பெண்ணாக சதா. அவரது குரல் குழைவும், உடல் நெளிவும் பல இடங்களில்
மெய்சிலிர்க்க வைக்கிறது. சில இடங்களில் கிளாமரைத் தவிர வேறேதும் தெரியாதது
போல் இருப்பது ஏன் என்றே தெரியவில்லை. கிளாமர் காட்சிகளில் வந்து
கிளர்ச்சியூட்டுகிறார். ஆர்.கே. மீது காதல் வயப்படுவது மாதிரி நடித்து
கடைசியில் போலீஸ் உடையில் வந்து நிற்கிறார் சதா. சதா சம்பந்தப்பட்ட
காட்சிகள் சாதா காட்சிகளாகவே அமைந்து விட்டன!

சின்சியர் போலீஸ் ஆபீஸராக கார்த்திக், ரொம்ப நாளைக்கப்புறம் கதாநாயகன்
லுக்கில் கலக்கி இருக்கிறார். படத்தின் பெரியபலம் கார்த்திக்தான்.
கிரிக்கெட் பேட்டும் கையுமாக, இளம் பெண்களை கடத்துவதை குலதொழிலாக கொண்ட
மன்சூரலிகான் செம கலக்கல். யார், யாரோ பேசுறாங்க, 20 வருஷமா நிலைத்து
நிற்கும் நான் பன்ச் டயலாக் பேசக்கூடாத என பிய்த்து பெடலெடுக்கும் அவர்
பேச்சில் செம நக்கல்! கார்த்திக் மாதிரியே, கலகலக்கலாக படம் முழுக்க
புலிவேசத்தை காப்பாற்றியிருக்கிறார் மன்சூர், என்றால் மிகையல்ல.

கஞ்சா கருப்பு, லொல்லு சபா ஜீவா, மயிசாமி ஆகியோரது காமெடி காட்சிகள் சில
கடித்தாலும், பல சிரிப்பு வெடியாகிறது. அதிலும் ஆவியாக வரும்
மயில்சாமியின் காட்சிகள் அத்தனையும் சிரிப்பு வெடிதான்.

பல காட்சிகளில் வாசுவின் அனுபவ முத்திரை தெரிகிறது. ஆனால் இத்தனை நீளமாக
படத்தை இழுக்காமல், இன்னும் நச்சென்று, வேகமான படமாகக் கொடுத்திருந்தால்
படத்தோட ரேஞ்சே வேறுமாதிரி இருந்திருக்கும்.

கருணாமூர்த்தியின் ஒளிப்பதிவு படத்துக்கு பிளஸ். ஸ்ரீகாந்த் தேவாவின்
இசையில் ""வர்றேன்... வர்றேன்..." பாடல் நல்ல ரகம். அதே பாடலின் இசைப்
பின்னணியில் கதையை நகர்த்தியிருப்பது சாமர்த்தியம்.

புலிவேசம் - வேசம் எடுபடலை!

நடு இரவில் மரத்தின் மேல் நடக்கும் அந்த சண்டைக்காட்சி அசத்தல்.
படத்தில் இரு நாயகிகள் என்றாலும், அதிக ரொமான்ஸ் காட்சிகளை வைத்து
சங்கடப்படுத்தாதது ஆறுதல். ://:-: ://:-: