சிர்த் நகரின் 70 வீதமான பகுதி கிளர்ச்சியாளர்கள் வசம்

by *சம்ஸ் Tue 11 Oct 2011 - 6:36

சிர்த் நகரின் 70 வீதமான பகுதி கிளர்ச்சியாளர்கள் வசம்
பானி வலீதிலும் முன்னேற்றம்
லிபியாவில் கடாபி ஆதரவுப் படை வசம் எஞ்சியுள்ள சிர்த் மற்றும் பானி வலீத் நகரங்கள் இன்னும் ஒருசில தினங்களில் விடுவிக்கப்படும் என இடைக்கால அரசின் தலைவர் முஸ்தபா அப்தல் ஜலீல் அறிவித்துள்ளார். இதில் கடாபியின் பிறந்தகமான சிர்த் நகரை கைப்பற்றுவதற்கு இறுதிக் கட்ட மோதலை முடிக்கிவிட்டுள்ளதாக அவர் குறிப்பட்டார்.

சிர்த் நகரின் அல்காசி பிராந்தியத்தை முழுமையாக கட்டுப்பாட்டில் கொண்டு வந்துள்ளதாக கிளர்ச்சியாளர்கள் அறிவித்துள்ளனர். இதில் சிர்த் நகர பல்கலைக்கழகம், இப்ன் சீனா மருத்துவமனை மற்றும் கடாபி படையின் கட்டளைத் தளமாக பயன்படுத்தப்பட்ட அபுகன்டவுகு மாநாட்டு மண்டபம் ஆகிய முக்கிய தளங்களை கிளர்ச்சியாளர்கள் நேற்று கைப்பற்றினர். இதனைத் தொடர்ந்தே முஸ்தபா அப்தல் ஜலீல் மேற்படி அறிவிப்பை வெளியிட்டுள்ளார்.

சிர்த் நகர மோதல் தீவிரமடைந்துள்ள நிலையில் கடாபி ஆதரவுப் படையின் 15 பேரை கைது செய்ததாக கிளர்ச்சியாளர்கள் குறிப்பிட்டுள்ளனர். இவர்களின் பெரும்பாலானோர் மொரித்தானிய நாட்டு கூலிப்படையினர் என கிளர்ச்சியாளர்கள் குறிப்பிட்டுள்ளனர்.

எனினும் சிர்த் நகரில் தொடர்ச்சியாக மோதல்கள் இடம்பெற்று வருவதாக அங்கிருக்கும் அல் ஜkரா செய்தியாளர் குறிப்பிட்டுள்ளார். இடைக்கால அரசு சிர்த் நகரின் 70 வீதமான பகுதியை கைப்பற்றியுள்ளனர். எனினும் கடாபி ஆதரவாளர்கள் வசமுள்ள 30 வீத பகுதியை கைப்பற்ற கிளர்ச்சியாளர்கள் கடுமையாக போராட வேண்டி இருக்கும். இந்த பகுதிகளை கைப்பற்ற அவர்கள் வீதிக்கு வீதி மோதலில் ஈடுபடவேண்டி ஏற்படும் என அல் ஜாkரா செய்தியாளர் குறிப்பிட்டுள்ளார்.

சிர்த் நகரில் நேற்று இடம்பெற்ற மோதலில் 10 கிளர்ச்சியாளர்கள் கொல்லப்பட்டுள்ளதோடு 100 க்கும் மேற்பட்டோர் காயமடைந்துள்ளனர். எனினும் இந்த பகுதியில் சிக்குண்டுள்ள பொதுமக்கள் குறித்த உறுதியான தகவல்கள் எதுவும் வெளியாகவில்லை. சிர்த் நகரில் இருந்து கடந்த ஒரு சில தினங்களில் ஆயிரக்கணக்கான பொது மக்கள் வெளியேறிய நிலையில் அங்கு இன்னும் பலர் சிக்குண்டுள்ளதாக நம்பப்படுகிறது.

இதேவேளை, கடாபி ஆதரவுப்படை வசம் எஞ்சியுள்ள மற்றொரு நகரான பானி வலீதிலும் கிளர்ச்சியாளர்கள் முன்னேற்றம் கண்டுள்ளனர். பாலைவன நகரான பானி வலீதின் முகப்பில் அமைந்துள்ள முதலாவது பள்ளிவா சலையும், விமான நிலையத்தையும் கிளர்ச்சியாளர்கள் கைப்பற்றியுள்ளனர்.