கூடங்குளம் பிரச்சினை மாநில அரசால் ஒரேநாளில் தீர்க்கக் கூடியது அல்ல: ஜெயலலிதா பேட்டி

உள்ளாட்சி தேர்தலில் போட்டியிடும் அ.தி.மு.க. வேட்பாளர்களை ஆதரித்து முதல்- அமைச்சர் ஜெயலலிதா நேற்று திருநெல்வேலி, தூத்துக்குடி, மதுரை ஆகிய மாவட்டங்களில் சூறாவளி பிரசாரம் மேற்கொண்டார். அவர் பிரசாரம் செய்த இடங்களில் எல்லாம் மக்கள் கூட்டம் அலைமோதியது.

மூன்று மாவட்டங்களிலும் பிரசாரத்தை முடித்துவிட்டு மாலை விமானம் மூலம் சென்னை திரும்பினார். போயஸ் கார்டனில் உள்ள அவரது வீட்டுக்கு முன்பு நிருபர்கள் அவரிடம் பேட்டி கண்டனர். அவரிடம் கேட்கப்பட்ட கேள்விகளும் அதற்கு அவர் அளித்த பதில்களும் வருமாறு:-

கேள்வி: கூடங்குளம் பிரச்சினையில் தமிழக அரசின் அடுத்தகட்ட நடவடிக்கை என்ன?

பதில்: இந்த பிரச்சினை தொடர்பாக பிரதமர் மன்மோகன்சிங் எழுதிய கடிதம் இன்னும் என் கைக்கு கிடைக்கவில்லை. இதற்கு முன்பாக கடந்த 4-ந் தேதி பிரதமர் எழுதிய கடித விவரங்களை பத்திரிகைகளிலும், தொலைக்காட்சிகளிலும் பார்த்து தெரிந்துகொண்டேன்.

அந்த கடிதம் 3 நாளுக்கு பின்னரே எனக்கு கிடைத்தது. தற்போது பிரதமர் எழுதியுள்ளதாக கடிதம் முதலில் எனக்கு கிடைக்கட்டும். அதன்பிறகு அதுகுறித்து சொல்கிறேன்.

கேள்வி: கூடங்குளம் அணுமின் நிலைய போராட்டக்குழுவினருக்கு என்ன சொல்ல விரும்புகிறீர்கள்? அணு மின் நிலையத்திற்குள் வேலை செய்யச் சென்ற தொழிலாளர்களை பொதுமக்கள் தடுத்து நிறுத்தி உள்ளனர். பிரச்சினை தீவிரமாகிக் கொண்டிருக்கிறதே?

பதில்: மாநில அரசால் ஒரேநாள் இரவில் தீர்க்கக்கூடிய பிரச்சினை அல்ல இது. இந்த பிரச்சினைக்கு தீர்வு காண்பதற்கு சற்று காலதாமதம் ஆகலாம். மிகவும் உணர்ச்சிப்பூர்வமான, சிக்கல்மிகுந்த இந்த பிரச்சினை குறித்து இதற்கு மேல் கருத்துச்சொல்ல விரும்பவில்லை.

கேள்வி: சங்கர்ராமன் கொலை வழக்கில் காஞ்சி சங்கராச்சாரியாருக்கு தொடர்பு இருப்பதாக புதிதாக பல திருப்பங்கள் ஏற்பட்டு உள்ளன. டேப் ஆதாரங்கள் இருப்பதாக குற்றச்சாட்டுகள் எழுந்துள்ளன. மறு விசாரணை நடத்தப்பட வேண்டும் என்ற கோரிக்கையும் எழுந்துள்ளது. ஆட்சி மாறி இருப்பதாக அவர்கள் சொல்கிறார்கள். இந்த பிரச்சினையில் அரசு என்ன செய்யப் போகிறது?

பதில்: தற்போது இந்த வழக்கு நீதிமன்ற விசாரணையில் உள்ளது. எனவே, அதுபற்றி விவாதிக்க விரும்பவில்லை.

கேள்வி: 2ஜி ஸ்பெக்ட்ரம் ஊழல் வழக்கில் பிரதமரின் கடிதத்தையும் மத்திய அரசு கருத்தில் கொள்ள வேண்டும் என்று சுப்ரீம் கோர்ட்டு கூறி இருக்கிறது. இதில் மத்திய அரசு ஏன் அமைதியாக இருக்கிறது என்றும் சுப்ரீம் கோர்ட்டு கேட்டுள்ளதே?

பதில்: இந்த விஷயத்தை சுப்ரீம் கோர்ட்டு கையில் எடுத்திருக்கிறது. இந்த நிலையில் அதுகுறித்து நான் கருத்துச் சொன்னால் அது நன்றாக இருக்காது.

கேள்வி: நேற்று சுப்ரீம் கோர்ட்டு மூத்த வக்கீல் பிரசாந்த் பூஷன் தாக்கப்பட்டார். இன்று அன்னா ஹசாரேவின் ஆதரவாளர்கள் மீண்டும் தாக்கப்பட்டு உள்ளார்களே?

பதில்: அன்னா ஹசாரேவின் ஆதரவாளர்கள் தாக்கப்பட்ட சம்பவம் குறித்து எனக்கு தெரியாது. மூத்த வக்கீல் பிரசாந்த் பூஷன் மீது நேற்று நடந்த தாக்குதல் கடும் கண்டனத்துக்குரியது. ஒரு நாகரீகமான சமுதாயத்தில் இதுபோன்ற தாக்குதல்களுக்கு இடம் இல்லை. மேற்கண்டவாறு முதல்-அமைச்சர் ஜெயலலிதா பேட்டி அளித்தார்.