வில்லன், குணச்சித்திர வேடங்களில் 40 ஆண்டுகள் முத்திரை பதித்த டி.எஸ்.பாலையா

by **நண்பன்** Sat 15 Oct 2011 - 10:59

தமிழ்ப்பட உலகில், வில்லனாகவும், குணச்சித்திர வேடங்களிலும் 40 ஆண்டுகள்
கொடி கட்டிப் பறந்தவர், டி.எஸ். பாலையா. இவருடைய சொந்த ஊர் திருநெல்வேலி.
எம்.ஜி.ஆர். நடித்த முதல் திரைப்படமான "சதிலீலாவதி"தான்
பாலையாவுக்கும் முதல் படம். 1934-ல் வெளிவந்த இந்தப் படத்தில் வில்லனாக
பாலையா அறிமுகமானார். அப்போது பாலையாவுக்கு 20 வயது.

அம்பிகாபதி

1937-ம்
ஆண்டு, எம்.கே.தியாகராஜ பாகவதர் நடித்த "அம்பிகாபதி" படத்தில், தளபதியாக
(வில்லன்) டி.எஸ். பாலையா நடித்தார். ஆரம்ப காலத்தில் பாலையாவுக்கு புகழ்
தேடித்தந்த படம் இது. இதில், பாகவதரும், பாலையாவும் கத்திச்சண்டை
போடுவார்கள்! 1940-ம் ஆண்டு முதல், பி.யு.சின்னப்பா புகழ் பெற்று
விளங்கினார். அவர் நடித்த பெரும்பாலான படங்களில் பாலையாதான் வில்லன்.

கதாநாயகன்

மாடர்ன்
தியேட்டர்ஸ் படங்களிலும் டி.எஸ்.பாலையா தொடர்ந்து இடம் பெற்றார்.
உலகப்போரை பின்னணியாக வைத்து, மாடர்ன் தியேட்டர்ஸ் டி.ஆர்.சுந்தரம்
"சித்ரா" என்ற படத்தைத் தயாரித்தார். அதில் டி.எஸ்.பாலையா கதாநாயகனாக
நடித்தார். கதாநாயகி கே.எல்.வி.வசந்தா. பாலையா கதாநாயகனாக நடித்த மற்றொரு
படம் "வெறும் பேச்சல்ல". 1956-ல் வெளியான இப்படத்தில் பாலையா "கவ்பாய்"
வேடத்தில் வருவார். அவருக்கு ஜோடி பத்மினி! ஆச்சரியமாக இருக்கிறதல்லவா?

அறிஞர்
அண்ணா கதை -வசனம் எழுதிய "வேலைக்காரி" படத்தில், கதாநாயகன்
கே.ஆர்.ராமசாமியின் நண்பனாக, முக்கிய வேடத்தில் பாலையா நடித்தார்.
அண்ணாவின் "ஓர் இரவு" படத்தில் வில்லனாக நடித்தார். ஏவி.எம். தயாரித்த படம்
இது.

எம்.ஜி.ஆருடன்

எம்.ஜி.ஆர்.
கதாநாயகனாக நடித்த முதல் படம் "ராஜகுமாரி." ஜுபிடர் பிக்சர்ஸ் தயாரித்த
இப்படத்தில், வில்லனாக பாலையா நடித்தார். இப்படத்தில் எம்.ஜி.ஆரும்,
பாலையாவும் போட்ட கத்திச்சண்டை மிகப்பிரபலம். தொடர்ந்து எம்.ஜி.ஆர்.
படங்களிலும், சிவாஜிகணேசன் படங்களிலும் வில்லனாக நடித்தார்.

குணச்சித்திர வேடம்

இதன்
பிறகு குணச்சித்திர வேடங்களில் நடிக்கத் தொடங்கினார். இவற்றில்
பெரும்பாலானவை நகைச்சுவை கலந்தவை. ஸ்ரீதர் தயாரித்த முழு நீள நகைச்சுவை
படமான "காதலிக்க நேரமில்லை" பாலையாவின் சிறந்த நகைச்சுவை நடிப்புக்கு
எடுத்துக்காட்டு. இப்படத்தில், ஒரு திகில் கதையை நாகேஷ் கூற, அப்போது
பாலையா காட்டும் முகபாவம் எவரும் மறக்க முடியாத ஒன்று.

"திருவிளையாடல்"
படத்தில் வடநாட்டு பாகவதராக வந்து, "ஒரு நாள் போதுமா...!" என்று பாடி,
ரசிகர்களைக் கவர்ந்தார். "தில்லானா மோகனாம்பாள்" படத்தில் தவில்
வித்துவானாக நடித்தார்.

பாகவதர், சின்னப்பா,
எம்.ஜி.ஆர்., சிவாஜிகணேசன், ஜெமினி கணேசன் ஆகிய சூப்பர் ஸ்டார்களுடன்
இணைந்து நடித்த பாலையா, 40 ஆண்டுகளில் சுமார் 200 படங்களில் நடித்துள்ளார்.

பிரசன்னா

படங்களில்
நடனம் மட்டுமே ஆடிவந்த லலிதா- பத்மினி சகோதரிகள், முதன் முதலாக "பிரசன்னா"
என்ற மலையாள படத்தில் கதாபாத்திரம் ஏற்று நடித்தனர்.

பட்சிராஜா தயாரித்த இப்படத்தின் கதாநாயகன் பாலையா என்பது குறிப்பிடத்தக்கது.

குடும்பம்

டி.எஸ்.பாலையாவின்
குடும்பம் மிகவும் பெரியது. இவருக்கு 3 மனைவிகள். முதல் மனைவி பெயர்
பத்மாவதி. இவருக்கு சாய்பாபா, அரவிந்தன், சோனையா, ரகுராம், கணேஷ் ஆகிய 5
மகன்கள். துர்க்கா, தேவி என்ற 2 மகள். 2-வது மனைவி பெயர் லீலா (இவர்
டி.எஸ்.பாலையா மரணம் அடைவதற்கு 4 ஆண்டுகளுக்கு முன்பு இறந்து விட்டார்.)
அம்புஜம், பொன்னி, சிவகாமி, ரமா என்ற 4 மகள்கள். நாகராஜன், முனிபாலன் என்ற 2
மகன்கள். 3-வது மனைவி பெயர் நவநீதம். இவர் நடிகை சந்திரகாந்தாவின்
அக்காள். இவருக்கு மனோகரி என்ற மகள்.

61 வயதில் மரணம்

சென்னை
தி.நகரில் வசித்து வந்த டி.எஸ்.பாலையாவுக்கு, 61 வயது நிரம்பியபோது
உடல்நிலை பாதிக்கப்பட்டது. நெஞ்சுவலி, மாரடைப்பு போன்றவற்றால்
அவதிப்பட்டார். 20-12-1972 அன்று டி.எஸ்.பாலையாவுக்கு மீண்டும் மாரடைப்பு
ஏற்பட்டது. உடனே அவரை வீடு அருகில் உள்ள தனியார் ஆஸ்பத்திரியில்
சேர்த்தனர். என்றபோதிலும் மறுநாள் (21-ந்தேதி) அதிகாலை அவர் மரணம்
அடைந்தார்.

மகனும் நடிகர்

அவருக்கு
பிறகு அவரது மகன் ஜுனியர் பாலையா என்ற பெயரில் சினிமா படங்களில் நடித்து
வருகிறார். இவரது குரலும் பாலையா குரலாக எதிரொலிக்கிறது.