குடும்பக் கட்டுப்பாடு ஆபரேசனில் பெண் பலி; டாக்டர் மீது வழக்கு

by **mihlarnitha** Mon 17 Oct 2011 - 10:41

குடும்பக் கட்டுப்பாடு ஆபரேசனில் பெண் பலி; டாக்டர் மீது வழக்கு

குடும்பக் கட்டுப்பாடு ஆபரேசனில் பெண் இறந்ததால் உறவினர்கள் மறியலில் ஈடுபட்டனர். டாக்டர் மீது வழக்குப்பதிவு செய்யப்பட்டது. நாகர்கோவில் அருகே உள்ள பள்ளம் வடக்கு தெருவை சேர்ந்தவர் ஜெகன் (36). மீனவர். இவரது மனைவி சியாமளா (32). இவர்களுக்கு 2 குழந்தைகள் உள்ளனர். குடும்ப கட்டுப்பாட்டு அறுவை சிகிச்சை செய்து கொள்வதற்காக நாகர்கோவில் புன்னை நகரில் உள்ள தனியார் மருத்துவமனைக்கு சியாமளாவை ஜெகன் அழைத்து சென்றார். நேற்று முன்தினம் சியாமளாவுக்கு அறுவை சிகிச்சை நடந்தது. அறுவை சிகிச்சை முடிந்த தும் மாலை வரை டாக்டர்கள் எந்த பதிலும் கூறவில்லை. திடீரென மாலை யில் சியாமளா இறந்து விட்டதாக டாக்டர்கள் கூறினர். இதை கேட்டதும் சியாமளாவின் உறவினர்கள் அதிர்ச்சி அடைந்தனர்.

டாக்டர்களின் கவனக்குறைவால் சியாமளா இறந்திருக்கிறார். இதற்கு காரணமான டாக்டரை கைது செய்ய வேண்டும். மருத்துவமனை மீது நடவடிக்கை எடுக்க வேண்டும். அதுவரை உடலை வாங்க போவதில்லை என கூறி உறவினர்கள் மருத்துவமனை முன் திடீர் மறியலில் ஈடுபட்டனர். மருத்துவமனை மீது திடீரென கற்களும் வீசப்பட்டன. இதில் மருத்துவமனை ஜன்னல் கண்ணாடிகள் உடைந்தன. பதற்றம் அதிகரிக்கவே அதிரடிப்படை போலீசார் வரவழைக்கப்பட்டனர். தொடர்ந்து பேச்சுவார்த்தை நடத்திய போலீசார், சம்பந்தப்பட்ட மருத்துவமனை மீது வழக்கு பதிவு செய்யப்படும் என தெரிவித்தனர்.

இதையடுத்து சியாமளாவின் கணவர் ஜெகன் அளித்த புகாரின் பேரில் மர்ம சாவு என போலீசார் வழக்குப்பதிவு செய்தனர். இதில் சந்தேக எதிரி என மருத்துவமனையின் மருத்துவ அதிகாரி பெயரை சேர்த்தனர். இதையடுத்து பொதுமக்கள் போராட்டத்தை கைவிட்டு கலைந்து சென்றனர். பிரேத பரிசோதனைக்காக ஆசாரிப்பள்ளம் அரசு மருத்துவமனைக்கு, சியாமளாவின் உடல் கொண்டு செல்லப்பட்டது. இரவு 8 மணிக்கு தொடங்கிய போராட்டம் 10 மணிக்கு மறியலாக உருவெடுத்து, அதிகாலை 3 மணிக்கு முடிவுக்கு வந்தது.

அதிக மயக்க மருந்தால் விபரீதம்

குடும்ப கட்டுப்பாட்டு அறுவை சிகிச்சைக்காக அனுமதிக்கப்பட்ட சியாமளாவுக்கு, மயக்க மருந்து கொடுத்ததில் தான் பிரச்னை என சந்தேகிக்கப்படுகிறது. உரிய மருத்துவர் இல்லாமல், சாதாரண மருத்துவர் மூலம் மயக்க மருந்து அளிக்கப்பட்டதே சியாமளாவின் இறப்புக்கு காரணமாக இருக்கலாம் என கூறப்படுகிறது. பிரேத பரிசோதனை முடிவுக்கு பிறகே இது பற்றி எதையும் உறுதியாக கூற முடியும் என போலீசார் தெரிவித்தனர். பிரேத பரிசோதனை வீடியோவில் பதிவு செய்யப்பட்டது.

.....