சர்வதேச சூப்பர் சீரிஸ் ஆக்கி: இந்திய அணிகள் தோல்வி

9 பேர் கொண்ட அணிகள் பங்கேற்ற சர்வதேச சூப்பர் சீரிஸ் ஆக்கி போட்டி (வழக்கமான ஆட்டத்தில் 11 பேர் இடம் பெறுவார்கள்) ஆஸ்திரேலியாவில் உள்ள பெர்த் நகரில் நடந்தது. இதன் ஆண்கள் பிரிவில் இறுதிப் போட்டியில் ஆஸ்திரேலிய அணி 5-3 என்ற கோல் கணக்கில் நிïசிலாந்தை வீழ்த்தி சாம்பியன் பட்டத்தை தனதாக்கியது.

முன்னதாக நடந்த வெண்கலப்பதக்கத்துக்கான ஆட்டத்தில் இந்திய அணி 1-4 என்ற கோல் கணக்கில் பரம எதிரியான பாகிஸ்தானிடம் மோசமான தோல்வியை சந்தித்தது. பெண்கள் பிரிவில் இறுதிப் போட்டியில் ஆஸ்திரேலியா-இந்தியா அணிகள் மோதின. இதில் சவுந்தர்யா 9-வது நிமிடத்தில் கோல் அடித்ததால் இந்தியா 1-0 என்ற கணக்கில் முன்னிலை பெற்றது.

இந்த நிலை நீண்ட நேரம் நீடிக்கவில்லை. அதன் பின்னர் ஆஸ்திரேலிய அணி வலுவான பதிலடி கொடுத்தது. அந்த அணி வீராங்கனைகள் ஹோப் முன்ரோ (10-வது நிமிடம்), கெல்லி ஒயிட் (14-வது நிமிடம்), மர்னி ஹட்சன் (20-வது நிமிடம்), ஆஷ்லிக் நெல்சன் (21-வது நிமிடம்) ஆகியோர் அடுத்தடுத்து கோல் அடித்தனர்.

பின்னர் இந்திய அணியால் கோல் எதுவும் திருப்ப முடியவில்லை. முடிவில் ஆஸ்திரேலிய அணி 4-1 என்ற கோல் கணக்கில் இந்தியாவை தோற்கடித்து சாம்பியன் பட்டத்தை வென்றது. இந்திய அணி வெள்ளிப்பதக்கம் பெற்றது.