தீவுத்திடலில், பட்டாசு கடைகள் நேற்று திறக்கப்பட்டன

தீவுத்திடலில், 40 பட்டாசு கடைகள் நேற்று திறக்கப்பட்டன. மேலும், 35 கடைகள் இன்று திறக்கப்பட உள்ளன. மக்கள் நெருக்கம், போக்குவரத்து அதிகம் உள்ள இடங்களில், பட்டாசு கடை வைக்கக் கூடாது என, சென்னை மாநகர போலீசார் மூலம் கட்டுப்பாடு விதிக்கப்பட்டிருந்தது.
பாரிமுனையில் பட்டாசு விற்பனை செய்யக் கூடாது என்றும் போலீஸ் மூலம் கேட்டுக்கொள்ளப்பட்டிருந்தது. இதையொட்டி, சென்னை ஐகோர்ட் உத்தரவின் படி, சென்னை தீவுத்திடலில் பட்டாசு கடை வைக்க விண்ணப்பித்திருந்த 117 பேருக்கு, கடை வைக்க இடங்கள் ஒதுக்கப்பட்டன. ஆனால், பாரிமுனையில் பட்டாசு விற்பனை செய்தவர்கள், கடந்த இரண்டு நாட்களாக அதே இடத்திலேயே பட்டாசு வியாபாரத்தை தொடர இருந்தனர். அவர்களை போலீசார் எச்சரித்து, தீவுத்திடலில் பட்டாசு கடைக்கு அனுமதி வழங்கப்பட்டுள்ளது. அங்கு சென்று கடை வைத்துக்கொள்ளுங்கள் என, கேட்டுக்கொண்டனர்.

இதையொட்டி, தீவுத்திடலில் நேற்று முன்தினம் ஒரே ஒரு கடை மட்டும் திறக்கப்பட்டது. நேற்று, 39 கடைகள் திறக்கப்பட்டன. பட்டாசு கடைகள், தீவுத்திடலில் வைக்கப்பட்டிருப்பதை கேள்விப்பட்ட பொதுமக்கள், நேற்று, ஆயிரக்கணக்கானோர் வந்து பட்டாசு வாங்கிச்சென்றனர். ""தீவுத்திடலில் மேலும் 35 கடைகள் இன்று வைக்கப்பட உள்ளதாகவும், இக்கடைகளில் அனைத்து ரக பட்டாசுகளும் கிடைக்கும்,'' என்றும் பட்டாசு விற்பனையாளர்கள் கூறினர். அதே நேரத்தில், தீவுத்திடலில் மின் வசதி, தண்ணீர் வசதி செய்துதரப்படவில்லை. கடைக்காரர்களே ஜெனரேட்டர் மூலம், மின் வசதி செய்து கொண்டுள்ளனர். கழிவறை வசதிகள் செய்யப்படவில்லை. பட்டாசு கடைகளில் விபத்து ஏதும் நடந்து விடாமலிருக்க, முன்னெச்சரிக்கை நடவடிக்கையாக தீயணைப்பு வண்டிகள் மற்றும் ஆம்புலன்ஸ்கள் நிறுத்தப்பட்டுள்ளன. போலீஸ் பாதுகாப்பும் செய்யப்பட்டுள்ளது.