முன்னாள் புலி உறுப்பினர்கள் 368 பேர் சமூகத்தில் இணைவு

முன்னாள் புலி உறுப்பினர்கள் 368 பேர் சமூகத்தில் இணைவு




மகேஸ்வரன் பிரசாத்

தீபாவளித் திருநாளை முன்னிட்டு புனர்வாழ்வளிக்கப்பட்ட முன்னாள் விடுதலைப் புலி
உறுப்பினர்கள் 368 பேர் நேற்றைய தினம் சமூக வாழ்வில் இணைக்கப்பட்டனர். இந்த நிகழ்வு
கொழும்பு இராமகிருஷ்ண மிஷன் மண்டபத்தில் இடம்பெற்றது.

இளைஞர் ஒருவர், பிரதமர் டி.எம். ஜயரட்ன, அமைச்சர்களான சந்திரசிறி கஜதீர, டக்ளஸ் தேவானந்தா ஆகியோர் முன்னிலையில் ஒப்படைக்கப்படுகிறார். அருகில் சிரேஷ்ட ஆலோசகர் சதீஷ் குமாரும் காணப்படுகிறார். (படம்: தெஹிவளை, கல்கிஸ்ஸை தினகரன் நிருபர்)

பிரதமர் டி.எம்.ஜயரட்ன, புனர்வாழ்வு மற்றும் சிறைச்சாலைகள் மறுசீரமைப்பு அமைச்சர்
சந்திரசிறி கஜதீர, பாரம்பரிய மற்றும் சிறுகைத்தொழில் முயற்சி அபிவிருத்தி அமைச்சர்
டக்ளஸ் தேவானந்தா, புனர்வாழ்வு மற்றும் சிறைச்சாலைகள் மறுசீரமைப்பு அமைச்சின்
செயலாளர் திஸாநாயக்க, வடமாகாண ஆளுனர் ஜீ.ஏ.சந்திரசிறி, மேல்மாகாண ஆளுனர் அலவி
மெளலானா, நீதியமைச்சின் செயலாளர் சுகத கம்லத், புனர்வாழ்வு ஆணையாளர் மேஜர் ஜெனரல்
சந்தன ராஜகுரு, சிறைச்சாலைகள் ஆணையாளர் கொடிப்பிலி உள்ளிட்ட அதிகாரிகள் பலர்
கலந்துகொண்டனர்.

தீபாவளித் திருநாளை முன்னிட்டு புனர்வாழ்வளிக்கப்பட்ட 368 பேரின்
வாழ்க்கையிலும் ஒளிவீசவேண்டும் என்ற நோக்கத்தின் அடிப்படையிலேயே இவர்களை விடுவிக்கத்
தீர்மானித்ததாக புனர்வாழ்வு மற்றும் சிறைச்சாலைகள் மறுசீரமைப்பு அமைச்சு தெரிவித்தது.
வர்ண அலங்காரங்களால் அலங்கரிக்கப்பட்டிருந்த மேடைக்கு பிரதமர் உள்ளிட்ட பிரமுர்கள்
மங்கள வாத்தியத்துடன் அழைத்துவரப்பட்டு, மங்கல விளக்கேற்றலுடன் விழா ஆரம்பமானது.
இம்முறை தீபாவளியை 368 புனர்வாழ்வளிக்கப்பட்டவர்கள் தமது குடும்பங்களுடன்
சந்தோசமாகக் கொண்டாடவிருப்பதாக நேற்றைய நிகழ்வில் உரையாற்றிய போது குறிப்பிட்ட
புனர்வாழ்வு மற்றும் சிறைச்சாலைகள் மறுசீரமைப்பு அமைச்சர் சந்திரசிறி கஜதீர,
எஞ்சியுள்ள ஆயிரத்துக்கும் அதிகமானவர்கள் எதிர்வரும் 3 அல்லது நான்கு மாதங்களில்
தமது குடும்பங்களுடன் இணைக்கப்படுவார்கள் என்று குறிப்பிட்டார்.
நான்காகக் காணப்படும் புனர்வாழ்வு நிலையங்களை எதிர்வரும் 4 மாதங்களில் இரண்டாகக்
குறைப்பதற்குத் தாம் தீர்மானித்திருப்பதாகவும், புனர்வாழ்வளிக்கப்பட்டு
விடுவிக்கப்பட்ட இளைஞர் யுவதிகளின் திறைமைகளை மேலும் வளர்ப்பதற்கு ஏதுவாக
வவுனியாவிலுள்ள புனர்வாழ்வு நிலையக் கட்டடங்களை நிரந்தமாக வைத்திருப்பதற்குத்
தீர்மானித்திருப்பதாகவும் அமைச்சர் தெரிவித்தார்.

புனர்வாழ்வளிக்கப்பட்டவர்களில் பல
திறமையான இளைஞர்கள் இருக்கின்றனர். அண்மையில் மாத்தறையில் நடைபெற்ற கிரிக்கெட்
போட்டி மற்றும் கொழும்பில் நடைபெற்ற உதைபந்தாட்டப் போட்டிகளில் பல இளைஞர்கள் தமது
திறமைகளை வெளிக்காட்டியுள்ளனர். தேசிய அணியில் இடம்பெறக்கூடிய திறமையுடையவர்கள்
காணப்படுவதாக இலங்கை கிரிக்கெட் வீரர் சனத் ஜெயசூரியவும் கூறியிருந்தார்.

இந்த
நிலையில் தேசிய கிரிக்கெட் அணிக்கு புனர்வாழ்வளிக்கப்பட்டவர்களில் மூவரை
இணைப்பதற்கான நடவடிக்கைகளையும் தாம் முன்னெடுத்திருப்பதாகவும் தனதுரையில் அவர்
குறிப்பிட்டார்.
இதுமாத்திரமன்றி திறைமையுள்ள இளைஞர் யுவதிகளின் வாழ்க்கையை மேலும் வளமானதாக
அமைப்பதற்கு குறைந்த வட்டியில் கடன்களை வழங்கவும் தமது அமைச்சு நடவடிக்கை
எடுத்துள்ளது என்றும், தொடர்ச்சியாக இவர்களுக்கு உதவிகளை வழங்க நடவடிக்கைகள்
எடுக்கப்பட்டிருப்பதாகவும் அமைச்சர் சந்திரசிறி கஜதீர தெரிவித்தார். இந்தநிகழ்வில்
வரவேற்புரை நிகழ்த்திய புனர்வாழ்வு ஆணையாளர் மேஜர் ஜெனரல் சந்தன ராஜகுரு,
புனர்வாழ்வு நடவடிக்கைகளுக்காக அரசாங்கம் இதுவரை 1.7 பில்லியன் ரூபாய்களைச்
செலவிட்டிருப்பதாகச் சுட்டிக்காட்டினார்.
புனர்வாழ்வளிக்கப்பட்டவர்களில் ஆயிரத்துக்கும் அதிகமானவர்கள் க.பொ.த. உயர்தர மற்றும்
சாதாரணதரப் பரீட்சைகளில் தோற்றியுள்ளனர். இதற்கு இந்து மாமன்றம் உதவிகளை
வழங்கியிருந்ததாகவும் அவர் குறிப்பிட்டார்.
இந்நிகழ்வில் புனர்வாழ்வு மற்றும் சிறைச்சாலைகள் மறுசீரமைப்பு அமைச்சின் செயலாளர்
திஸநாயக்க, பிரதமர் டி.எம்.ஜயரட்ண ஆகியோர் உரையாற்றியிருந்தனர். பெற்றோருடன்
மீளிணைக்கப்பட்ட 368 பேரும் தமது சொந்த இடங்களுக்குச் செல்வதற்கு நேற்று வவுனியாவில்
விசேட பயண ஏற்பாடுகளும் செய்யப்பட்டிருந்தன.


தினகரன்