மழை கழிவு நீரால் சென்னையில் எலி காய்ச்சல்

சென்னையில் பெய்து வரும் மழையால் சாக்கடை கால்வாயும் மழை நீர் கால்வாயும் நிரம்பி வழிகிறது. நகரின் பல்வேறு இடங்களில் ஓடும் கூவமும் நிரம்பி செல்கின்றன. வீடுகளில் உள்ள செப்டிக் டேங்க் நிரம்பி மழை நீரில் கலந்து ஓடுகின்றன. இதனால் எலி காய்ச்சல் பாதிப்பு அதிகரித்துள்ளது.

லெப்டே பைரசிஸ் என்று சொல்லக் கூடிய எலி காய்ச்சல் பாக்ட்ரீயா மூலம் இந்த பாதிப்பை ஏற்படுத்துகிறது. தனியார் மருத்துவமனைகளில் எலி காய்ச்சல் பாதித்து சிகிச்சை பெறுபவர்களின் எண்ணிக்கை அதிகமாக உள்ளது. மேலும் கடந்த சில வருடங்களாக எலி காய்ச்சல் நோய் சென்னையில் அதிகரித்து வருகிது.

சாக்கடை நீர் தேங்கி நிற்பதும், முறையாக கழிவு நீர் செல்லாமல் அடைப்பு ஏற்பட்டு சாலையில் ஓடுவதாலும் இந்நோய் அதிகரித்து வருகிறது. ரெயில்வே சுரங்கப்பாதைகள், சாலையோரம் தெருக்களில் தேங்கி நிற்கும் கழிவு நீரில் மக்கள் நடந்து செல்லும் போது எலி காய்ச்சல் பாக்டீரியா தாக்குகிறது.

கழிவு நீரில் எலியின் சிறுநீர், மலம் கலப்பதன் மூலம் இந்நோய் தாக்குகிறது. எலியின் சிறுநீரில் இருந்து பாக்ட்ரீயா வெளியே வருகிறது. கால் பகுதியில் ஒட்டிக் கொள்ளும் அவை அதன் வழியே ரத்தத்தில் கலந்து விடும். எலி காய்ச்சல் பாக்டீரியா குறித்து முன்னாள் பொது சுகாதாரத் துறை இயக்குனர் டாக்டர் இளங்கோ கூறியதாவது:-

எலியின் சிறுநீரகத்தில் இருந்து வெளியே வரும் பாக்டீரியாவின் தலை நுணி பகுதி ஊசி மாதிரி இருக்கும். அது காலிலி ஒட்டிக் கொண்டு மனித ரத்தத்தில் கலந்து விடும். முதலில் கல்லீரலுக்கு சென்று அதன் செயல் திறனை காட்டும். காய்ச்சல், பசியாத தன்மை, உடல் வலி, போன்ற அறிகுறி எலி காய்ச்சலுக்கு ஏற்படும்.

இறுதி கட்டமாக மஞ்சள் காமாலைக்கு உரிய அறிகுறியான நாக்கு, கண் பகுதியில் மஞ்சள் நிறம் காணப்படும். அடுத்ததாக சிறுநீரகத்தை பாதிக்கும். சிறுநீர் போகும் அளவு குறையும். சிலர் எலி காய்ச்சல் என்பதை அறியாமல் மஞ்சள் காமாலைக்குரிய நாட்டு வைத்திய சிகிச்சை மேற்கொள்கிறார்கள். அது தவறு. எலி காய்ச்சல் பாதித்தவர்களுக்கு ஒரு வாரத்திற்கு ஆண்டிபயாடிங் கொடுத்தால் போதும். நோய் சுகமாகிவிடும். எலி காய்ச்சலை கவனிக்காமல் விட்டால் கல்லீரல், சிறுநீரகம் பாதித்து உயிர் இழப்பும் ஏற்படும்.

1976-ம் ஆண்டு தான் தமிழ்நாட்டில் சென்னையில் எலி காய்ச்சல் இருப்பது கண்டுபிடிக்கப்பட்டது. ஸ்டான்லி மருத்துவ மனையில் பணியாற்றிய டாக்டர் ஒருவர் இந்நோய் பாதித்து உயிர் இழந்தார். மழை நீரில் செருப்பு போடாமல் நடப்பதை தவிர்க்க வேண்டும். அப்படி நடந்து சென்றால் உடனே சோப்பு போட்டு கால்களை கழுவ வேண்டும். இப்படி செய்தால் எலி காய்ச்சல் பாதிப்பில் இருந்து தவிர்க்கலாம். மேலும் இந்நோய் அறிகுறி இருந்தால் உடனே டாக்டரை சந்தித்து பரிசோதனை செய்து கொள்ள வேண்டும்.

இவ்வாறு அவர் கூறினார்.

இதுபற்றி சென்னை மாநகராட்சி சுகாதார அதிகாரி டாக்டர் குகானந்தம் கூறுகையில், எலி காய்ச்சல் பாதிப்பு பெரிதாக இல்லை. மாநகராட்சி ஆஸ்பத்திரியில் ஒரு கேஸ் கூட பதிவாக வில்லை. தனியார் மருத்து வமனைகளில் எத்தனை பேர் பாதிக்கப்பட்டு இருக்கிறார்கள் என்ற விவரம் தெரியவில்லை என்றார்.