2 இலட்சம் கிலோ கழிவு தேயிலை பேலியகொடையில் சிக்கியது

by *சம்ஸ் Fri 27 Jan 2012 - 9:54

2 இலட்சம் கிலோ கழிவு தேயிலை பேலியகொடையில் சிக்கியது
சந்தைக்கு விட பொதி செய்யப்பட்ட வேளை பொலிஸ் முற்றுகை
ஸாதிக் ஷிஹான்
பாவனைக்கு உதவாத சுமார் இரண்டு இலட்சம் கிலோ எடையுள்ள கழிவுத் தேயிலை தூள்களை களஞ்சியப்படுத்தியிருந்த நான்கு களஞ்சியசாலைகளை பேலியகொடை, பொதியகொட பிரதேசத்தில் பொலிஸ் விசேட அதிரடிப் படையினர் முற்றுகையிட்டுள்ளனர்.

சுமார் ஒரு கோடியே 20 இலட்சம் ரூபா பெறுமதியான இந்த தேயிலை தூள்களை வெளிநாட்டுக்கு ஏற்றுமதி செய்யும் நோக்குடன் பொதிசெய்யப்பட்டுக் கொண்டிருந்த நிலையிலேயே இவற்றை விசேட அதிரடிப் படையினர் கைப்பற்றியுள்ளனர்.

பொலிஸ் விசேட அதிரடிப் படையினருக்கு கிடைக்கப்பெற்ற தகவல்களை அடுத்து மேற்படி களஞ்சியங்களை முற்றுகையிட்ட பொலிஸார் குற்றப்புலனாய்வு பிரிவு பொலிஸாரின் உதவியுடன் மேலதிக நடவடிக்கைகளை மேற்கொண்டுள்ளனர்.

குற்றப் புலனாய்வு பிரிவுக்கு பொறுப்பான பிரதிப் பொலிஸ் மா அதிபர் ஜயந்த குலதிலக்கவின் ஆலோசனைக்கமைய கடந்த 21ஆம் திகதி அந்தப் பிரதேசத்திற்கு

விரைந்த சி. ஐ. டியினர் மிகவும் சூட்சுமமாக மேற்கொண்ட நடவடிக்கையின் மூலம் நான்கு களஞ்சியசாலைகளையும் கண்டுபிடித்து முற்றுகையிட்டுள்ளனர்.

நான்கு களஞ்சியசாலைகளையும் தீவிரமாக சோதனையிட்ட சி. ஐ. டியினர் அங்கு களஞ்சியப்படுத்தப்பட்டிருந்த மனித பாவனைக்கு உதவாத சுமார் 2 இலட்சம் கிலோ எடையுள்ள தேயிலை தூள்கள் பொதி செய்யப்பட்ட நிலையிலும், பொதி செய்வதற்காக குவித்து வைக்கப்பட்டிருந்த நிலையிலும் மீட்டுள்ளனர்.

நான்கு களஞ்சியசாலைகளில் ஒரு களஞ்சிய சாலையே இலங்கை தேயிலை சபையின் கீழ் பதிவு செய்யப்பட்டுள்ளதுடன் ஏனைய மூன்று களஞ்சியசாலைகளும் பதிவு செய்யப்படாது சட்டவிரோதமாக இயங்கியவை என சி. ஐ. டி.யினர் தெரிவித்தனர்.

சி. ஐ. டியினர் வேண்டுகோளுக்கிணங்க களஞ்சியசாலைக்கு வருகை தந்த இலங்கை தேயிலை சபை அதிகாரிகள் சகல களஞ்சியசாலைகளிலும் உள்ள தேயிலைகளை பரிசோதனைக்குட் படுத்தினர்.

முற்றுகையிடப்பட்ட பிரதேசத்திற்கு பெருந் தொகையான ஊடகவியலாளர்களும் அழைத்துச் செல்லப்பட்டனர்.

பாவனைக்கு உதவாக தேயிலை தூள்கள் பொதி செய்யும், நோக்குடனும், கலப்படம் செய்யும் நோக்குடனும் மலைபோல் குவிக்கப்பட்டிருந்ததை காணக்கூடியதாக இருந்தது.

தூய்மையான இலங்கை தேயிலை என்று அச்சிடப்பட்ட பொதிகளில் மேற்படி கலப்படம் செய்யப்பட்ட தேயிலைகளை பொதி செய்திருந்ததையும் காணக்கூடியதாக இருந்தது.

ஏற்றுமதி நிறுவனம் (கார்கோ) ஒன்றுக்குச் சொந்தமான நான்கு களஞ்சியசாலைகளே குத்தகைக்கு எடுத்து அதிலிருந்தே பொதிசெய்யும் நட வடிக்கைகளை மேற்கொண்டு வந் துள்ளமை ஆரம்பக்கட்ட விசார ணைகளிலிருந்து தெரிய வந்துள்ளது. சட்டவிரோதமாக தேயிலைகளை கலப்படம் செய்து வெளிநாடுகளுக்கு ஏற்றுமதி செய்த இந்த நிறுவனத்திற்கு எதிராக கடுமையான சட்ட நடவடிக்கை எடுக்கப்படும் என்று சி. ஐ. டியினர் தெரிவித்தனர்.

இதுபோன்ற செயல்களின் மூலம் இலங்கை தேயிலையின் பெயருக்கும் பெரும் பாதிப்பு ஏற்பட வாய்ப்புக்கள் உள்ளதாக தெரிவித்த அவர் நீண்ட காலமாக திட்டமிட்ட நடவடிக்கையின் மூலமே விசேட அதிரடிப் படையினர் இந்த களஞ்சியசாலையை கண்டு பிடித்துள்ளனர் என்றும் சுட்டிக்காட் டினார்.