மாணவர்களிடம் நன்கொடை வசூலிக்கும் உயர் கல்வி நிறுவனங்களுக்கு ரூ.1 கோடி அபராதம்

மாணவர்களிடம் நன்கொடை வசூலிக்கும் உயர் கல்வி நிறுவனங்களுக்கு ரூ.1 கோடி அபராதம் விதிக்கும் அதிரடி சட்டம் விரைவில் அமலுக்கு வர உள்ளது.
மேலும், தகுதி இல்லாத ஆசிரியர்களை நியமித்தால் கடும் நடவடிக்கை எடுப்பதற்கான புதிய விதிமுறையும் இந்த மசோதாவில் சேர்க்க அனுமதி அளிக்கப்பட்டுள்ளது. மருத்துவம், தொழில்நுட்பம் மற்றும் பல்கலைக் கழகங்களில் மாணவர்களிடம் நன்கொடை (கேபிடேஷன் பீஸ்) வசூலிக்கப்படுகிறது.

மேலும், பல்வேறு முறைகேடுகளும் நடக்கின்றன. இதை தடுப்பதற்காக, ‘தொழில்நுட்ப கல்வி நிலையங்கள், மருத்துவ கல்வி நிலையங்கள் மற்றும் பல்கலைக் கழகங்கள் சட்டம் & 2010’ என்ற மசோதாவை நாடாளுமன்றத்தில் கடந்த ஆண்டு மே மாதம் அரசு தாக்கல் செய்தது. இது, மத்திய மனிதவள மேம்பாட்டு துறைக்கான நாடாளுமன்ற நிலைக்குழுவின் பரிசீலனைக்கு அனுப்பப்பட்டது. இதை ஆராய்ந்த நிலைக்குழு, மசோதாவில் 48 திருத்தங்களை செய்ய பரிந்துரை செய்தது. இதில், 41 பரிந்துரைகளை மத்திய அமைச்சரவை ஏற்றுள்ளது. 7 பரிந்துரைகளை நிரா கரித்துள்ளது.

மாணவர்களிடம் நன்கொடை வசூலிக்கும் உயர் கல்வி நிலையங்களுக்கு ரூ. 50 லட்சம் அபராதம் விதிக்கும்படி பழைய மசோதாவில் கூறப்பட்டு இருந்தது. இதை ரூ. 1 கோடியாக உயர்த்தும் பரிந்துரைக்கு ஒப்புதல் அளிக்கப்பட்டு உள்ளது. மாணவர்களின் பிரச்னையை தீர்ப்பதற்காக தனி அமைப்பை உருவாக்கவும், கல்லூரி கையேடுகளில் மாணவர்களுக்கு அளிக்கப்படும் வாக்குறுதிகளை நிறைவேற்றாவிட்டால் கல்லூரி நிர்வாகம் மீது நடவடிக்கை எடுக்கும் பரிந்துரைக்கும் ஒப்புதல் அளிக்கப்பட்டுள்ளது.

மேலும், போதிய தகுதிகள் இல்லாத ஆசிரியர்களை நியமிக்க தடை விதிப்பதற்கான புதிய பிரிவும் இந்த மசோதாவில் சேர்க்கப்பட்டுள்ளது. இந்த மசோதாவின் பெயரை ‘உயர் கல்வி நிலையங்கள் சட்டம் & 2011’ என்று பெயர் மாற்றம் செய்யவும் அனுமதி வழங்கப்பட்டுள்ளது. விவசாய கல்வி நிலையங்கள் மாநில அரசுகளின் கட்டுப்பாட்டில் இருப்பதால், அது இந்த சட்டத்தில் சேர்க்கப்படவில்லை.
1. நிலைக்குழு பரிந்துரை செய்த திருத்தங்கள் 48.
2. மத்திய அமைச்சரவை ஏற்ற திருத்தங்கள் 41.
3. விவசாய கல்வி இந்த மசோதா வரம்பில் வராது.
4. மசோதா பெயர் மாற்றப்பட்டுள்ளது.

நல்ல விசயம் நடைமுறையில் வரட்டும் தகவலுக்கு நன்றி