கனிமொழி பிணை மனு இன்று விசாரணை

by *சம்ஸ் Fri 25 Nov 2011 - 9:26

கனிமொழி பிணை மனு இன்று விசாரணை
2ஜி வழக்கில் கைது செய்யப்பட்ட 5 கொபரேட் அதிகாரிகளுக்கு நேற்று முன்தினம் பிணை வழங்கப்பட்டது. இதையடுத்து தனது பிணை மனுவை விரைந்து விசாரிக்குமாறு திமுக எம்.பி. கனிமொழி சார்பில் டில்லி உச்ச நீதிமன்றத்தில் தாக்கல் செய்யப்பட்ட மனு ஏற்றுக் கொள்ளப்பட்டுள்ளது.

இந்த மனு மீது இன்று விசாரணை நடக்கவுள்ளது. முன்னதாக இந்த மனு வரும் டிசம்பர் 1ம் திகதி விசாரிக்கப்பட இருந்தது குறிப்பிடத்தக்கது.

2ஜி வழக்கில் கைதான திமுக எம்.பி. கனிமொழி கடந்த 6 மாதங்களாக திகார் சிறையில் உள்ளார். அவரது பிணை மனுக்கள் 4 முறை டில்லி பாட்டியாலா சிபிஐ விசாரணை நீதிமன்றத்தில் தள்ளுபடி செய்யப்பட்டு விட்டது. இந்நிலையில் அவர் மீண்டும் பிணை கோரி டில்லி உச்ச நீதிமன்றத்தில் மனு தாக்கல் செய்தார். அந்த மனு மீதான விசாரரணை வரும் டிசம்பர் மாதம் 1ம் திகதி நடக்கும் என்று உச்ச நீதிமன்றம் அறிவித்துள்ளது.

இந்நிலையில் முன்னாள் தொலைத் தொடர்புத்துறை அமைச்சர் ராசாவுடன் கூட்டு சேர்ந்து முறைகேடாக ஸ்பெக்ட்ரம் பெற்றதாக குற்றம் சாட்டப்பட்ட ஐவருக்கு நேற்று முன்தினம் பிணை வழங்கி உயர் நீதிமன்றம் உத்தரவிட்டது.

அவர்களுக்கு பிணை கிடைத்த சில மணி நேரத்திலேயே தனது பிணை மனுவை விரைந்து விசாரிக்குமாறு கனிமொழி சார்பில் டில்லி உச்ச நீதிமன்றத்தில் மனு தாக்கல் செய்தார்.

அதே போல 2 ஜி வழக்கில் கைதாகி திகார் சிறையில் உள்ள தொலைத் தொடர்புத் துறை முன்னாள் செயலர் சித்தார்த் பெகுரா, கலைஞர் தொலைக்காட்சி நிர்வாக இயக்குநர் சரத் குமார், பொலிவுட் திரைப்படத் தயாரிப்பாளர் கரீம் மொரானி, குசேகாவ்ன் நிறுவனத்தின் இயக்குநர்கள் ஆசிப் பல்வா, ராஜீவ் அகர்வால் ஆகியோரும் தங்களின் பிணை மனுக்களை விரைந்து விசாரிக்க வேண்டும் என்று நீதிமன்றத்திடம் கோரிக்கை விடுத்தனர்.

இவர்களது கோரிக்கையை டில்லி உயர் நீதிமன்றம் நேற்று ஏற்றுக் கொண்டது. இந்த மனுக்கள் மீது இன்று காலை விசாரணை நடக்கும் என நீதிமன்றம் அறிவித்துள்ளது.

இதற்கிடையே இதே 2 ஜி வழக்கில் கைதாகி திகாரில் உள்ள ஆ. ராசா இதுவரையிலும் பிணை கோரவில்லை. இந்த வழக்கில் இவர் ஒருவர் மட்டுமே சிறைவாசத்தைக் கண்டு அஞ்சாமல் தொடர்ந்து சட்டரீதியான மோதல்களில் ஈடுபட்டுள்ளார் என்பது குறிப்பிடத்தக்கது.