தமிழ்நாட்டில் சில்லறை வணிகத்தில் அந்நிய முதலீட்டை அனுமதிக்க மாட்டோம்

தமிழ்நாட்டில் சில்லறை வணிகத்தில் அந்நிய முதலீட்டை அனுமதிக்க மாட்டோம்
ஜெயலலிதா அறிவிப்பு
தமிழ்நாட்டில் சில்லரை வணிகத்தில் அந்நிய முதலீட்டை தமிழக அரசு அனுமதிக்காது என்று முதலமைச்சர் ஜெயலலிதா அறிவித்து உள்ளார்.

சில்லரை வர்த்தகத்தில் அந்நிய நிறுவனங்கள் 51 சதவீத முதலீடு செய்ய மத்திய அரசு அனுமதி அளித்துள்ளது.

மத்திய அரசின் முடிவுக்கு நாடு முழுவதும் உள்ள வர்த்தகர்கள் கடும் எதிர்ப்பு தெரிவித்துள்ளனர்.

மிழக முதலமைச்சர் ஜெயலலிதாவும் சில்லரை வர்த்தகத்தில் அந்நிய நேரடி முதலீட்டுக்கு எதிர்ப்பு தெரிவித்துள்ளார்.

இது தொடர்பாக முதலமைச்சர் ஜெயலலிதா வெளியிட்டுள்ள அறிக்கையில் கூறியிருப்பதாவது:- சில்லறை வர்த்தகத்தில் வெளிநாட்டின் நேரடி முதலீடு (எப். டி. ஐ) 51 சதவீதம் அனுமதிக்கப்படும் என்று மத்திய அரசு திடீரென முடிவு எடுத்து அறிவித்துள்ளது.

இந்த அறிவிப்பு நாட்டின் தொன்றுதொட்டு சில்லறை வியாபாரம் செய்து வரும் வியாபாரிகள் மத்தியில் அதிர்ச்சியை ஏற்படுத்தியுள்ளது. தற்போது பாராளுமன்ற கூட்டம் நடக்கிறது. இந்த நேரத்தில் இதுபோன்ற பெரிய கொள்கை முடிவுகளை மத்திய அரசு எடுத்து அறிவித்திருப்பது பல இலட்சக்கணக்கான மக்களைப் பாதிக்கக் கூடியது ஆகும்.

அதுவும் மாநில அரசைக் கூட கலந்து ஆலோசிக்காமல், அறிவிக்கப்பட்டுள்ள இந்தச் செயல் ஐக்கிய முற்போக்குக் கூட்டணி அரசின் ‘தான்தோன்றித்தனமான போக்கைக் காட்டுகிறது.

சில்லறை விற்பனை எப். டி. ஐ. கொள்கை என்பது மிகவும் உணர்ச்சி பூர்வமான பிரச்சினையாகும். எப். டி. ஐ. கொள்கையை பல்வேறு வணிக அமைப்புகள் கடுமையாக எதிர்த்து வருகின்றன. இந்தத் திடீர் அறிவிப்பு என்பது மக்களின் உணர்வுகளை புரம்தள்ளி சீற்றத்தை ஏற்படுத்துவதாக உள்ளது.

மத்திய அரசின் இந்த முடிவுக்குக் காரணம், பணவீக்கத்தைக் கட்டுப்படுத்து வதற்கான முடிவு என்று கூறப்படுகிறது. ஆனால், பணவீக்கத்திற்கு மத்திய அரசின் தவறான கொள்கை முடிவுதான் காரணம். இதுபோன்ற பிரச்சினைக்கு தீர்வுகாண இந்தியாவில் வளங்கள் இல்லையா?

பணவீக்கத்தை கட்டுப்படுத்த நேரடி முதலீடு தீர்வாக அமையாது என்பதை மத்திய அரசு உணர வேண்டும். சரியான உட்கட்டமைப்பு மூலம்தான் இதை சரிசெய்ய முடியும். பெரும்பான்மையான நாடுகளில் உள்ள அமைப்பு சாராத சில்லறை வியாபாரம் தான் பல இலட்சம் மக்களுக்கு வாழ்வாதாரமாக இருந்தது.

இதில் பன்னாட்டு நிறுவனங்கள் நுழைந்து பாரம்பரிய சில்லறை வியாபாரிகளை அழித்துவிட்டன. உதாரணமாக, இங்கிலாந்தில் 3 பன்னாட்டு நிறுவனங்கள் மொத்த சந்தையையும் கட்டுப்படுத்துகிறது. கடந்த 10 ஆண்டுகளில் தாய்லாந்தில் 30 சதவீதம் உள்ளூர் கடைகள் மூடப்பட்டுள்ளன.

இந்தியாவில் 90 சதவீதம் அமைப்பு சாராத சில்லறை வியாபாரம்தான் நடக்கிறது.

இந்த சில்லறை வியாபாரத்தை நம்பி 4 கோடி பேர் உள்ளனர். ஆனால் எப். டி. ஐ. யை அனுமதிப்பதன் மூலம் ஒரு கோடி பேருக்கு வேலை கிடைக்கும் என்று மத்திய அரசு சொல்கிறது. சில்லறை வியாபாரிகள் எவரும் பெரிய அளவில் படித்தவர்கள் இல்லை. அவர்கள் தொழிலைச் செய்ய முடியாமல் தெருவில்தான் இருப்பார்கள்.

எனவே மத்திய அரசு எடுத்துள்ள முடிவு என்பது ஒருசில பன்னாட்டு நிறுவனங்களின் நெருக்குதலால் எடுக்கப்பட்ட தவறான முடிவு என்று நான் முழுமையாக உணருகிறேன். மத்திய அரசின் இந்த முடிவு சில்லறை வியாபாரிகளை அதிர்ச்சியில் ஆழ்த்தியுள் ளது இந்த முடிவு தங்களைப் பாதிக்கும் என்று அவர்கள் அச்சப்படுவது நியாயமானது. நாடு முழுவதும் தொழிலை நம்பியிருக்கும் தொழிலாளர்களைப் பாதிக்கும் என்பதால் இந்த முடிவைக் கடுமையாக எதிர்க்கி றேன்.