திகார் ஜெயிலில் இருந்து கனிமொழி இன்று விடுதலை

by **நண்பன்** Tue 29 Nov 2011 - 9:33

2ஜி ஸ்பெக்ட்ரம் வழக்கில் கனிமொழி எம்.பி. கைது செய்யப்பட்டு மே.
20-ந்தேதி டெல்லி திகார் ஜெயிலில் அடைக்கப்பட்டார். இந்த வழக்கில் தன்னை
ஜாமீனில் விடுதலை செய்யக்கோரி பாட்டியலா விசேஷ கோர்ட்டிலும், டெல்லி
ஐகோர்ட்டிலும், சுப்ரீம் கோர்ட்டிலும் 5 முறை மனு தாக்கல் செய்யப்பட்டது.
நேற்று டெல்லி ஐகோர்ட்டு கனிமொழிக்கு ஜாமீன் வழங்கி உத்தரவிட்டது.

அவருடன்
கலைஞர் டி.வி. நிர்வாக இயக்குனர் சரத்குமார், பாலிவுட் தயாரிப்பாளர் கரீம்
மொரானி, குசேவ்கான் பழங்கள் மற்றும் காய்கறிகள் விற்பனை நிறுவன
இயக்குனர்கள் ராஜீவ் அகர்வால், ஆசிப் பல்வா ஆகியோருக்கும் ஜாமீன்
கிடைத்தது. ஐகோர்ட்டில் ஜாமீன் கிடைத்தபோது கனிமொழி டெல்லி சி.பி.ஐ.
சிறப்பு கோர்ட்டில் இருந்தார். ஜாமீன் கிடைத்தது பற்றி அவரிடம்
தெரிவிக்கப்பட்டதும் மகிழ்ச்சி அடைந்தார்.

அருகில்
இருந்த கணவர் அரவிந்தனும் கனிமொழியின் கைகளை பற்றியபடி வாழ்த்து
தெரிவித்தார். பின்னர் முன்னாள் மத்திய மந்திரி ஆ. ராசா வாழ்த்து
தெரிவித்தார். தி.மு.க. நிர்வாகிகளும், தொண்டர்களும் திரண்டு இருந்தனர்.
அவர்களும் வக்கீல்களும் கனிமொழிக்கு வாழ்த்து கூறினார்கள். அதே நேரத்தில்
சென்னையில் இருந்தபடி ஜாமீன் மனு விசாரணை பற்றிய தகவல் களை
கேட்டுக்கொண்டிருந்தார் கருணாநிதி.

ஜாமீன் கிடைத்தது
பற்றி அறிந்ததும் கனிமொழியிடம் போனில் தொடர்பு கொண்டு பேசினார்.
தந்தையிடம் பேசியதும் கனிமொழி உற்சாகம் அடைந்தார். டெல்லி ஐகோர்ட்டு ஜாமீன்
வழங்கினாலும் அதற்கான ஆவணங்கள் விசாரணை நீதிமன்றத்துக்கு உரிய நேரத்தில்
வந்து சேரவில்லை. ஐகோர்ட்டு உத்தரவு நகல்களை நீதிபதி ஓ.பி. சைனியிடம்
சமர்பித்து அலுவல் நேரமான மாலை 5 மணிக்குள் விடுதலை உத்த ரவை பெறவேண்டும்.
ஆனால் மாலை 5 மணி வரை உத்தரவு நகல்கள் வரவில்லை. வக்கீல்கள் வேண்டுகோளை
ஏற்று நீதிபதி ஓ.பி. சைனியும் 5.15 மணி வரை காத்திருந்தார்.

அப்படியும்
உத்தரவு வரவில்லை. இதனால் வேறு வழியின்றி கனிமொழி ஜெயிலுக்கு
அனுப்பப்பட்டார். அவரை எம்.பி.க்கள் டி.ஆர். பாலு, டி.கே.எஸ். இளங்கோவன்,
திருச்சி சிவா, வசந்தி ஸ்டான்லி ஆகியோரும் சந்தித்து வாழ்த்து
தெரிவித்தனர். நேற்று இரவையும் கனிமொழி ஜெயிலில் கழித்தார். இன்று காலையில்
உத்தரவு நகல்கள் சிறப்பு நீதிமன்றத்தில் சமர்பிக்கப்படுகிறது. இன்று
மாலைக்குள் கனிமொழி விடுதலை செய்யப்படுவார்.

கனிமொழி
தினமும் விசாரணை கோர்ட்டில் ஆஜராக வேண்டி இருப்பதால் வருகிற சனி அல்லது
ஞாயிற்றுக்கிழமை சென்னை திரும்புவார் என்று எதிர்பார்க்கப்படுகிறது.
சென்னைக்கு வரும்போது, அவருக்கு உற்சாக வரவேற்பு கொடுக்க தி.மு.க. வினர்
ஏற்பாடு செய்து வருகிறார்கள்.

மாலை மலர்