சிறையில் கைதிகள் தயாரிக்கும் சப்பாத்தி விற்பனைக்கு

by **நேசமுடன் ஹாசிம்** Wed 30 Nov 2011 - 17:15

திருவனந்தபுரம் மத்திய சிறையில் கைதிகள் தயாரிக்கும் சப்பாத்தியை வெளி நபர்களுக்கு விற்பனை செய்வது தொடங்கியுள்ளது. கேரளாவில் உள்ள சிறைகளில் கைதிகளுக்கு சமீப காலம் வரை கோதுமை உருண்டை தான் உணவாக வழங்கப்பட்டு வந்தது.
இந்நிலையில் கடந்த இடது முன்னணி ஆட்சிக் காலத்தில் தான் கைதிகளுக்கு சப்பாத்தி வழங்க உத்தரவிடப்பட்டது. இதன்படி கைதிகளுக்கு காலை மற்றும் இரவில் சப்பாத்தி வழங்கப்படுகிறது. திருவனந்தபுரம் பூஜப்புராவிலுள்ள மத்திய சிறையில் 3,000க்கும் மேற்பட்ட கைதிகள் உள்ளனர்.

இவர்களுக்கு சப்பாத்தி தயார் செய்து கொடுப்பதற்காக ரூ.2.64 லட்சம் செலவில் ஒரு நவீன இயந்திரம் அமைக்கப்பட்டது. கோவையைச் சேர்ந்த துரை என்ஜினீயரிங் ஒர்க்ஸ் என்ற நிறுவனம் இந்த இயந்திரத்தை அமைத்துக் கொடுத்தது. ஒரு மணிநேரத்தில் 1500 முதல் 2000 சப்பாத்தி வரை இந்த இயந்திரம் மூலம் தயாரிக்கலாம். இந்நிலையில் கைதிகள் தயாரிக்கும் சப்பாத்தியை ஆர்டரின் பேரில் விற்பனை செய்ய தீர்மானிக்கப்பட்டது.

திருவனந்தபுரம் மத்திய சிறையில் நடைபெற்ற விழாவில் சப்பாத்தி விற்பனையை பிரபல நடிகர் சேரன் மற்றும் இயக்குனர் வசந்த் ஆகியோர் தொடங்கி வைத்தனர். இது குறித்து சிறை கண்காணிப்பாளர் பிரதீப் கூறுகையில், ‘‘இந்த இயந்திரம் மூலம் கைதிகள் தயாரிக்கும் சப்பாத்தி ஆர்டரின் பேரில் வெளிநபர்களுக்கு விற்பனை செய்யப்படும். 30 கிராம் எடையுள்ள ஒரு சப்பாத்தியின் விலை ரூ.2 ஆகும். விரைவில் பேக்கரி பொருட்களும் தயாரித்து விற்பனை செய்ய தீர்மானிக்கப்பட்டுள்ளது. கேரளாவில் திருவனந்தபுரம் மத்திய சிறையில் தான் இந்த திட்டம் முதல்முதலாக அமுல்படுத்தப்பட்டுள்ளது. விரைவில் திருச்சூர், கண்ணூர் மற்றும் கோழிக்கோடு மத்திய சிறைகளிலும் கைதிகள் தயாரிக்கும் சப்பாத்தி விற்பனைக்கு கொண்டுவரப்படும்’’ என்றார்.