கூட்டணி கட்சிகளிடம் பிரதமர் மன்மோகன் சிங் பேச்சு

by *சம்ஸ் Sat 3 Dec 2011 - 6:27

கூட்டணி கட்சிகளிடம் பிரதமர் மன்மோகன் சிங் பேச்சு
சில்லறை வர்த்தகத்தில் அன்னிய முதலீடு விவகாரம் தொடர்பாக, ஐக்கிய முற்போக்கு கூட்டணி கட்சிகளான தி.மு.க. மற்றும் திரிணமுல் காங்கிரஸ் தலைவர்களுடன் பிரதமர் மன்மோகன் சிங் நேற்று ஆலோசனை நடத்தினார். அப்போது இந்தப் பிரச்சினையில் அரசுக்கு ஆதரவாகச் செயல்பட வேண்டும் என கேட்டுக் கொண்டுள்ளார்.

மல்டி பிராண்ட் சில்லறை வர்த்தகத்தில் 51 சதவீதம் மற்றும் சிங்கிள் பிராண்ட் சில்லறை வர்த்தகத்தில் 100 சதவீதம் அன்னிய நேரடி முதலீட்டை அனுமதிக்க, மத்திய அரசு முடிவு செய்தது.

இதற்கு மத்தியில் ஆளும் ஐக்கிய முற்போக்கு கூட்டணியில் இடம்பெற்றுள்ள தி.மு.க. திரிணமுல் காங்கிரஸ் உட்பட பல்வேறு கட்சிகளும் எதிர்ப்பு தெரிவித்து வருகின்றன. இதனால், தொடர்ந்து எட்டாவது நாளாக நேற்றும் பாராளுமன்றம் முடங்கியது.

அதே நேரத்தில் இந்தப் பிரச்சினையில் ஒத்திவைப்பு தீர்மானம் கொண்டு வர பா.ஜ. உறுதியாக இருப்பதால் அதைச் சமாளிக்க அரசு கடும் பிரயத்தனம் செய்து வருகிறது. இதன் ஒரு பகுதியாக தி.மு.க மற்றும் திரிணமுல் காங்கிரஸ் தலைவர்களுடன், பிரதமர் மன்மோகன் சிங் நேற்று ஆலோசனை நடத்தினார்.

அப்போது, திரிணமுல், காங்கிரஸ் தலைவர்கள் இந்த விஷயத்தில் எங்களின் நிலை ஒன்று தான் அன்னிய முதலீடு குறித்து சபையில் விவாதம் நடத்தப்பட வேண்டும் சர்ச்சைக்குரிய இந்த முடிவை வாபஸ் பெற வேண்டும் என்றனர். இதை பிரதமரைச் சந்தித்த பின் நிருபர்களிடம் பேசிய திரிணமுல் காங்கிரஸ் தலைவர் சுதிப் பந்தோபாதயாயும் உறுதி செய்தார்.

தி.மு.க. தரப்பில் பங்கேற்ற தலைவர்கள், சில்லறை வர்த்தகத்தில் அன்னிய முதலீடு குறித்து பாராளுமன்றத்தில் விரிவாக விவாதம் நடத்தப்பட வேண்டும். இந்தப் பிரச்சினை தொடர்பான ஒத்திவைப்பு தீர்மானம் விவாதத்திற்கு வந்த பின், அதன் மீது என்ன முடிவு எடுப்பது என்பதை பின்னர் தீர்மானிப்போம் என்றனர். தேசிய மாநாட்டுக் கட்சித் தலைவர்களும் இந்தக் கூட்டத்தில் பங்கேற்றனர்.

இதன்பின், அவர்களிடம் பேசிய பிரதமர் மன்மோகன் சிங், அன்னிய முதலீடு விவகாரத்தில் மத்திய அரசு எடுத்த முடிவில் எந்த மாற்றமும் இல்லை. அதில், அரசு உறுதியாக இருக்கும் எனக் கூறியுள்ளார். அன்னிய முதலீட்டு அனுமதியை வாபஸ் பெறுவது தொடர்பாக எந்த விதமான உறுதி மொழியையும் அவர் அளிக்கவில்லை.

அதேநேரத்தில் இந்தப் பிரச்சினை தொடர்பாக பா.ஜ. கொண்டு வரும் ஒத்திவைப்பு தீர்மானத்திற்கு எதிராக, அதாவது அரசுக்கு ஆதரவாக வாக்களிக்க வேண்டும் என கூட்டணிக் கட்சியினரிடம் வேண்டி கேட்டுக் கொண்டுள்ளார். கூட்டத்திற்குப் பின் நிருபர்களிடம் பேசிய தி.மு.க பாராளுமன்ற கட்சித் தலைவர் டி. ஆர். பாலு, சில்லறை வர்த்தகத்தில் அன்னிய முதலீடு பிரச்சினையில் எங்கள் கட்சி அரசின் முடிவுக்கு எதிராக உள்ளது. அரசின் முடிவை ஆதரிக்காது என்றார்.