பாகிஸ்தானிடம் மன்னிப்பு கேட்க அமெ. மறுப்பு; நேட்டோ பின்வாங்கியது

by *சம்ஸ் Mon 5 Dec 2011 - 6:17

பாகிஸ்தானிடம் மன்னிப்பு கேட்க அமெ. மறுப்பு; நேட்டோ பின்வாங்கியது
நேட்டோ தாக்குதல் விவகாரத்தில், பாகிஸ்தானிடம் மன்னிப்புக் கோர முடியாது என அமெரிக்கா உறுதியாகக் கூறியுள்ளது. அதேநேரம், பாக். படைகள் தாக்குதல் நடத்தினால், நேட்டோவும் பதிலடி கொடுக்கத் தயங்காது என பென்டகன் கூறியுள்ளது. இந்நிலையில், நேட்டோ படைகள். ஆப்கான்-பாக். எல்லையில் பதற்றமான இடங்களில் இருந்து சிறிது விலகி இருக்கும்படி உத்தரவிடப்பட்டுள்ளது.

நேட்டோ தாக்குதல் விவகாரத்தில், அமெரிக்கா நடந்த சம்பவத்திற்கு வருத்தம் தெரிவித்தது. ஆனால், அந்த வருத்தம் மட்டும் போதாது, விளைவுகள் மோசமாக இருக்கும் என பாக். இராணுவம் எச்சரித்திருந்தது.

இது குறித்து அமெரிக்க வெளியுறவு அமைச்சக செய்தித் தொடர்பாளர் மார்க் டோனர், வெளியிட்ட அறிக்கையில் இச்சம்பவம் மிகவும் வருந்துவதற்கு உரியது தான் பாபகிஸ்தானின் இறையாண்மையை அமெரிக்கா மதிக்கிறது. ஆனால், அதற்காக மன்னிப்புக் கோர முடியாது. நடந்தது என்ன என்பது பற்றி இன்னும் விபரங்கள் வர வேண்டியுள்ளன. இதுகுறித்து விசாரணையும் நடந்து வருகிறது என்றார்.

இந்நிலையில் ஆப்கான் - பாக் எல்லையில் குவிக்கப்பட்டிருந்த நேட்டோ படைகள், எல்லையில் பதற்றமான இடங்களில் இருந்து விலகி நிற்கும்படி அமெரிக்கா மற்றும் நேட்டோ படைகளுக்கான தளபதி ஜோன் அலன் தெரிவித்தார். இதற்கிடையில், நேட்டோ மீண்டும் தாக்குதல் நடத்தும் பட்சத்தில், பதிலடி கொடுக்கத் தயங்க வேண்டாம் என பாக். இராணுவ வீரர்களுக்கு அறிவுறுத்தப்பட்டுள்ளதாக, பிரதமர் கிலானி கூறியுள்ளார்.

பாக். பாராளுமன்றத்தின் தேசிய பாதுகாப்புக்கான நிலைக் குழுவில் பேசிய அவர், பொறுமைக்கும் ஓர் எல்லை உண்டு ஒத்துழைப்பு என்பது ஒருவழிப் பாதையல்ல. தாக்குதல் நடந்தால், பதிலடி கொடுக்கும்படி வீரர்களுக்கு அறிவுறுத்தப்பட்டுள்ளது என்றார்.

அமெரிக்காவும் பாக். வீரர்கள் பதிலடி கொடுப்பது குறித்து நேற்றுமுன்தினம் பேட்டியளித்த பென்டகன் செய்தித் தொடர்பாளர் ஜோன் கிர்பி, தன்னைப் பாதுகாப்பதற்கு பாகிஸ்தான் நடவடிக்கை எடுத்துக் கொள்ள உரிமை உண்டு. அதையே அமெரிக்காவும் செய்யும் என்றார்.