சில்லறை வர்த்தக அன்னிய முதலீடு பிரச்சினையில் குழப்பம்: மம்தா பானர்ஜpயும் அரசும் மாறுபட்ட தகவல்

by *சம்ஸ் Mon 5 Dec 2011 - 6:23

சில்லறை வர்த்தக அன்னிய முதலீடு பிரச்சினையில் குழப்பம்: மம்தா பானர்ஜpயும் அரசும் மாறுபட்ட தகவல்
சில்லரை வர்த்தகத்தில் அன்னிய முதலீட்டை அனுமதித்த மத்திய அரசின் முடிவு ஒத்தி வைக்கப்பட்டு விட்டதாக மேற்கு வங்க முதல்வர் மம்தா பானர்ஜி சனிக்கிழமை அறிவித்தார். ஆனால் “அன்னிய முதலீடு விவகாரத்தை ஒத்திவைப்பது குறித்து இன்னும் முடிவு எடுக்கவில்லை” என மத்திய அரசு தரப்பில் தெரிவிக்கப்பட்டது. இதனால் இந்த விவகாரத்தில் சனிக்கிழமை கடும் குழப்பம் நிலவியது.

சில்லறை வர்த்தகத்தில் அன்னிய முதலீட்டை அனுமதிப்பதாக மத்திய அமைச்சரவை கடந்த வாரம் முடிவு எடுத்தது. இதற்கு எதிர்க் கட்சிகள் மட்டும் அல்லாமல் மத்திய அரசில் அங்கம் வகிக்கம் திரிணமுல் காங்கிரஸ் உள்ளிட்ட கட்சிகளும் கடும் எதிர்ப்பு தெரிவித்தன. மத்திய அரசின் இந்த முடிவால் கடந்த ஒன்பது நாட்களாக பாராளுமன்றம் முடங்கியது. இந்த முட்டுக்கட்டையை விலக்குவதற்கு மத்திய அரசு தொடர்ந்து முயற்சித்து வருகிறது.

முதல் கட்டமாக கூட்டணி கட்சியான திரிணமுல் காங்கிரசை, சமாதானப்படுத்தும் முயற்சி மேற்கொள்ளப்பட்டது. சனிக்கிழமை கொல்கட்டாவுக்கு வந்த மத்திய நிதி அமைச்சர் பிரணாப் முகர்ஜி, அங்கு மருத்துவமனையில் அனுமதிக்கப்பட்டுள்ள முதல்வர் மம்தாவின் தாயாரின் உடல் நிலை குறித்து விசாரித்தார். இதன் பின் மம்தாவுடன் ஆலோசனை நடத்தினார். சில்லரை வர்த்தகத்தில் அன்னிய முதலீடு அனுமதி விவகாரம் தொடர்பாக அவர் பேசியதாக தகவல் வெளியானது.

இதையடுத்து பத்திரிகையாளர்களிடம் மம்தா பானர்ஜி கூறியதாவது: சில்லறை வர்த்தக விவகாரம் தொடர்பாக பிரணாப் முகர்ஜி என்னிடம் கருத்து கேட்டார். மத்திய அரசு தன் முடிவை வாபஸ் வாங்க வேண்டும் என்பதில் நாங்கள் உறுதியாக இருக்கிறோம் என அவரிடம் கூறினேன். இது குறித்து தொலைபேசியிலும் என்னிடம் இரண்டு முறை கருத்து கேட்டார். இதைத் தொடர்ந்து இந்த விவகாரத்தில் ஒருமித்த கருத்து ஏற்படும் வரை சில்லறை வர்த்தகத்தில் அன்னிய முதலீட்டை அனுமதிக்கும் முடிவை ஒத்திவைப்பதாக பிரணாப் தெரிவித்தார். இதனால் இந்த பிரச்சினை தற்காலிகமாக முடிவுக்கு வந்துள்ளது. இவ்வாறு மம்தா கூறினார்.

சில்லறை வர்த்தகத்தில் அன்னிய முதலீட்டை அனுமதித்த மத்திய அரசின் முடிவு நாடு முழுவதும் பரபரப்பாக பேசப்பட்டு வருகிறது. இந்நிலையில் மத்திய அரசு இந்த முடிவை ஒத்திவைப்பதாக அறிவிப்பை வெளியிட்டால் அது தொடர்பான அதிகாரபூர்வ அறிவிப்பு, மத்திய அமைச்சர்கள் அல்லது பிரதமரிடமிருந்து தான் வரவேண்டும். ஆனால் கூட்டணி கட்சி தலைவர் இந்த முடிவை அறிவித்தது. அரசியல் வட்டாரத்தில் ஆச்சர்யத்தை ஏற்படுத்தியது.

இதைத் தொடர்ந்து மத்திய வர்த்தக அமைச்சர் ஆனந்த் சர்மா கூறுகையில், “சில்லறை வர்த்தகத்தில் அன்னிய முதலீட்டை அனுமதித்த மத்திய அரசின் முடிவை ஒத்தி வைப்பது தொடர்பாக இன்னும் எந்த முடிவும் எடுக்கவில்லை” என்றார். இதனால் இந்த விவகாரத்தில் தொடர்ந்து குழப்பம் நீடித்து வருகிறது.