இலங்கை கிரிக்கெட் வீரர்களுக்கு சம்பளம் வழங்குமாறு தென்னாபிரிக்க வீரர்கள் கோரிக்கை

இலங்கை கிரிக்கெட் வீரர்களுக்கு சம்பளம் வழங்குமாறு தென்னாபிரிக்க வீரர்கள் கோரிக்கை
இலங்கை கிரிக்கெட் அணி வீரர்களுக்கு 8 மாதங்களாக சம்பளம் கொடுக்கப் படாதுள்ளமை குறித்து தென்னாபிரிக்க கிரிக்கெட் வீரர்கள் கண்டனம் தெரிவித்துள்ளனர்.

தென்னாபிரிக்காவில் இலங்கை அணி விரைவில் 3 டெஸ்ட் போட்டி களிலும் 5 ஒருநாள் சர்வதேச போட்டி களிலும் விளையாடவுள்ளது. இந் நிலையில், தென்னாபிரிக்க டெஸ்ட் அணித் தலைவர் கிறேம் ஸ்மித் ஒருநாள் போட்டிகளுக்கான அணித்தலைவர் டி வில்லியர்ஸ் ஆகியோர் இலங்கை வீரர்களுக்கு ஆதரவாக குரல் கொடுத்துள்ளனர்.

திலகரட்ன டில்ஷான் மற்றும் இலங்கையிலுள்ள எமது ஏனைய சக தொழிற்சார் கிரிக்கெட் வீரர்களுக்கு இவ்விடயத்தில் எமது ஆதரவை தெரிவிக்க விரும்புகிறோம்

என தென்னாபிரிக்க கிரிக்கெட் வீரர்கள் சங்கம் வெளியிட்ட ஊடக குறிப்பொன்றில் கிறேம் ஸ்மித் தெரிவித்துள்ளார். கடந்த 8 மாதங்களாக அவர்களின் சம்பளங்கள் வழங்கப்படாதுள்ள நிலையில் அவர்கள் இங்கு கடினமான டெஸ்ட் மற்றும் ஒருநாள் சுற்றுப்போட்டியில் பங்குபற்றுவது சிறந்ததல்ல என அவர் கூறியுள்ளார்.

கிரிக்கெட்டில் இந்த தொழிற்சார் யுகம், நிலவும்போது இப்படியான விடயங்கள் நடைபெறக்கூடாது. இவ்வளவுக்கு மத்தியில் மார்ச் மாதத்திலிருந்து தொடர்ந்து நாட்டுக்காக விளையாடிவரும் இலங்கை கிரிக்கெட் வீரர்கள் பாராட்டுக்குரியவர்கள்.

இப்பிரச்சினை விரைவில் தீரும் என நாம் நம்புகிறோம் என ஒரு நாள் போட்டிகளுக்கான அணித்தலைவர் டி வில்லியர்ஸ் தெரிவித்துள்ளார்.

உலகக்கிண்ணப் போட்டிகளை நடத்தியமைக்காக சர்வதேச கிரிக்கெட் கவுன்ஸிலிடமிருந்து (ஐ.சி.சி.) 43 இலட்சம் டொலர்களை ஸ்ரீலங்கா கிரிக்கெட் நிறுவனம் எதிர்பார்த்துள்ளது.

ஆனால் தனது கணக்குத் தணிக்கை முடிந்த பின்னரே அப்பணம் இலங்கைக்கு வந்துசேரும் எனவும் இலங்கை கிரிக்கெட் வீரர்களுக்கு சம்பளம் வழங்குவது ஸ்ரீலங்கா கிரிக்கெட்டின் பொறுப்பாகும் எனவும் ஐ.சி.சி. தெரிவித்துள்ளது.

இலங்கை அணி வீரர்களுக்கு சம்பளம் கிடைப்பதை உறுதிப்படுத்துவதில் உதவி கோரி சர்வதேச கிரிக்கெட் வீரர்கள் சங்கங்களின் சம்மேளனத்துடனும் இலங்கை கிரிக்கெட் வீரர்கள் சங்கம் தொடர்பு கொண்டிருந்தது.

இந்நிலையில் இலங்கை அணியின் தென்னாபிரிக்க சுற்றுலா ஆரம்பமாகும் முன்னர் இவ்விவகாரத்தில் முன்னேற்றம் ஏற்படும் என தான் நம்புவதாக சர்வதேச கிரிக்கெட் வீரர்கள் சங்கங்களின் சம்மேளனத்தின் பிரதம நிலைவேற்று அதிகாரி டொனி ஐரிஸ் கூறியுள்ளார்.

இலங்கை அணி வீரர்களின் சம்பள பாக்கியில் 40 சதவீதம் விரைவில் வழங்கப்படும் என விளையாட்டுத்துறை அமைச்சர் மஹிந்தானந்த அளுத்கமகே கடந்தவாரம் நாடாளுமன்றத்தில் தெரிவித்திருந்தமை குறிப்பிடத்தக்கது.

இது கொடுமை கொடுமையிலும் பெரும் கொடுமை

நேசமுடன் ஹாசிம் wrote:இது கொடுமை கொடுமையிலும் பெரும் கொடுமை