கொல்கத்தா தனியார் மருத்துவமனை தீ விபத்து; மருத்துவமனை உரிமையாளர்கள் 6 பேர் சரண்

by *சம்ஸ் Mon 12 Dec 2011 - 6:25

கொல்கத்தா தீ விபத்தில் 89 பேர் பலியானார்கள். இதற்கு காரணமான மருத்துவமனை உரிமையாளர்கள் 6 பேர் பொலிஸில் சரண் அடைந்தனர். அவர்கள் இன்று நீதிமன்றத்தில் ஆஜர்படுத்த இருக்கின்றனர். மேலும், மருத்துவமனையின் 2 கட்டிடங்களுக்கு சீல் வைக்கப்பட்டது.

மேற்கு வங்க மாநிலத் தலைநகர் கொல்கத்தாவில் உள்ள அம்ரி மருத்துவ மனையின் அடித்தளத்தில் வெள்ளி அதிகாலை 3.30 மணி அளவில் திடீர் என்று தீப்பிடித்தது. இதில் மருத்துவ மனையில் சிகிச்சை பெற்ற நோயாளிகள் 85 பேரும், மருத்துவமனை ஊழியர்கள் 4 பேரும் பலியாகியுள்ளனர். தீப்பிடித்த வுடன் மருத்துவமனை அதிகாரிகள் அந்த இடத்தை விட்டு ஓடிவிட்டனர்.

இவ்வளவு பெரிய தீவிபத்தில் நோயாளிகள் மட்டும் தான் பலியாகியுள் ளனர். நோயாளிகள் மூச்சுத் திணறி சாகட்டும் என்று விட்டுவிட்டு ஓடிவிட்டனர் என்று ஒரு நோயாளியின் உறவினர் ஆவேசமாகக் கூறினார்.

இந்த விபத்தால் ஆத்திரமடைந்த உறவினர்கள் மருத்துவமனை பொருட்களை அடித்து நொறுக்கினர். இறந்தவர்கள் குடும்பத்திற்கு தலா ரூ. 5 இலட்சம் இழப்பீடு கொடுக்கப்படும் என்று மருத்துவமனை நிர்வாகம் அறிவித்துள்ளது.

மேலும், மருத்துவமனையில் தீயணைப்பு உபகரணங்கள் எதுவும் வைக்கப்படவில்லை. நிர்வாகத்தின் இந்த பொறுப்பற்ற தன்மைக்கு காரணமான மருத்துவமனை உரிமையாளர்கள் 6 பேர் பொலிஸில் தாங்களே சரண் அடைந்தனர்.