தேடப்படும் தீவிரவாதிகள் பட்டியலில் முல்லா ஒமரின் பெயர் நீக்கம்

by *சம்ஸ் Fri 30 Dec 2011 - 9:56

தேடப்படும் தீவிரவாதிகள் பட்டியலில் முல்லா ஒமரின் பெயர் நீக்கம்
தலிபான் தலைவர் முல்லா ஒமர் பெயரை, அமெரிக்கப் புலனாய்வுத் துறையான, எப்.பி.ஐ,. தனது பட்டியலில் இருந்து சத்தமில்லாமல் நீக்கியுள்ளது. இத்தகவல் வெளியானதும், அவர் தனது பட்டியலில் சேர்க்கப்படவேயில்லை என, எப்.பி.ஐ. மழுப்பலான விளக்கமும் அளித்துள்ளது.

ஆப்கானிஸ்தானில் தலிபான்களின் ஆட்சி நடந்த போது, அதன் தலைவராக இருந்தவர் முல்லா ஒமர். அமெரிக்கா, ஆப்கன் மீது படையெடுத்து, தலிபான்களின் ஆட்சியைக் கவிழ்த்த பின், அந்நாட்டின் வெளியுறவு அமைச்சகத்தின் “நீதிக்கான் விருது” (ஆர்.ஜே.எப்.,) என்ற பட்டியலில், முல்லா ஒமர் தேடப்படும் பயங்கரவாதியாகச் சேர்க்கப்பட்டார். அவரது தலைக்கு 10 மில்லியன் டொலர் விலையை வெளியுறவு அமைச்சகம் நிர்ணயித்தது.

இந்நிலையில், பாகிஸ்தானில் இருந்து வெளிவரும், “தி எக்ஸ்பிரஸ் டிரிபியூன்” பத்திரிகை, வெளியிட்டிருந்த செய்தி ஒன்றில் எம்.பி.ஐ.டீ. யின் தேடப்படும் பயங்கரவாதிகள் பட்டியலில் இருந்து, முல்லா ஒமரின் பெயர் நீக்கப்பட்டுள்ளது என்றும், இத்தகவலை எம்.பி.ஐ.யின் இணையத்தளத்தில் இருந்தே எடுத்திருப்பதாகவும் தெரிவிக்கப்பட்டது.

இது குறித்து நேற்று விளக்கம் அளித்த, எப்.பி.ஐ. செய்தித் தொடர்பாளர், “முல்லா ஒமர் ஒரு காலத்திலும், எப்.பி.ஐ. பட்டியலில் சேர்க்கப்பட்டதில்லை ஆனாலும், வெளியுறவு அமைச்சகப் பட்டியலில் உள்ளார். அதனால், அவர் எப்.பி.ஐ. பட்டியலில் இருந்து நீக்கப்பட்டாரா என்ற கேள்விக்கே இடமில்லை என தெரிவித்தார்.