சிரியாவில் தொடர்ந்து மோதல்: அரபு லீக் அவசர கூட்டத்துக்கு அழைப்பு

சிரியாவில் தொடர்ந்து மோதல்: அரபு லீக் அவசர கூட்டத்துக்கு அழைப்பு
கண்காணிப்பாளர்களின் ஆரம்பக்கட்ட அறிக்கை குறித்து ஆலோசனை
சிரிய நிலவரம் குறித்து பேச்சுவார்த்தை நடத்த அரபு லீக் அமைப்பு அவசர கூட்டத்திற்கு அழைப்பு விடுத்துள்ளது.

சிரியாவில் கண்காணிப்புப் பணியில் ஈடுபட்டிருக்கும் குழுவின் ஆரம்பக்கட்ட அறிக்கை குறித்து ஆய்வு செய்யவே இந்த அவரச கூட்டம் நடத்தப்படவுள்ளதாக அரபு லீக் அமைப்பின் உதவிச் செயலாளர் நாயகம் அஹ்மட் பின் ஹெலி குறிப்பிட்டுள்ளார்.

இதன்படி வரும் சனிக்கிழமை எகிப்து தலைநகர் கெய்ரோவிலுள்ள அரபு லீக் தலைமையகத்தில் இந்தக் கூட்டம் நடைபெற்றுள்ளது. அரபு லீக் செயலாளர் நாயகம் நபில் அல் அரபியின் தலைமையில் நடைபெறவுள்ள இந்தக் கூட்டத்தில் எகிப்து, சூடான், அல்ஜீரியா, கட்டார் மற்றும் ஓமான் நாட்டு வெளி யுறவு அமைச்சர்கள் பங்கேற்கவுள்ளனர். இதன்போது சிரியாவின் நிலவரம் குறித்து தீர்க்கமான முடிவுகள் எதிர்பார்க்கப் படுகிறது.

முன்னதாகக் கடந்த திங்கட்கிழமை அரபு லீக் செயலாளர் நாயகம் நடத்திய ஊடகமாநாட்டில் சிரிய நகரங்களில் இருந்து இராணுவம் வெளியேறியதாகக் குறிப்பிட்டிருந்தார். எனினும் இதற்கு எதிர்ப்பாளர்கள் மறுப்புத் தெரிவித்துள்ளனர். இதற்கு ஆதாரமாக ஹோம்ஸ் நகரில் இராணுவத்தினர் நடமாடும் வீடியோ காட்சியையும் அவர்கள் வெளியிட்டுள்ளனர்.

அரபு லீக் கண் காணிப்பாளர்கள் கடந்த டிசம்பர் 26 ஆம் திகதி முதல் சிரியாவில் ஏற்பட்டுள்ள வன்முறைகள் தொடர்பில் கண்காணிப்புப் பணியில் ஈடுபட்டுள்ளனர். எனினும் மேற்படி கண்காணிப்பாளர்கள் குறித்து எதிர்ப்பாளர்கள் கடும் விமர்சனத்தை வெளியிட்டு வருகின்றனர்.

கண்காணிப்பாளர்களின் வருகைக்குப் பின்னர் சிரியாவில் 150 பேருக்கும் மேல் பாதுகாப்புப்படையின் தாக்குதல்களில் பலியாகியுள்ளதாக எதிர்பாளர்கள் கூறியுள்ளனர். கடந்த செவ்வாய்க்கிழமை இடம்பெற்ற தாக்குதல்களில் நாடு பூராகவும் 6 பேர் கொல்லப்பட்டதாகவும் அதில் நான்கு பேர் ஹோம்ஸ் நகரைச் சேர்ந்தவர்கள் என்றும் எதிர்ப்பாளர்கள் கூறியுள்ளனர்.

இதனிடையே சிரியாவின் அல் ரஸ்தான் பகுதியில் உள்ள எரிவாயு விநியோக குழாய் மீது தீவிரவாதிகள் தாக்குதல் நடத்தியுள்ளதாக சிறிய அரச ஊடகமான ‘சனா’ செய்தி வெளியிட்டுள்ளது. எனினும் அரபு லீக் கண்காணிப்பாளர்களை திசை திருப்புவதற்காக சிரிய அரசு இந்த தாக்குதலை நடத்தியுள்ளதாக எதிர்ப்பாளர்கள் குறிப்பிட்டுள்ளனர்.

சிரியாவில் ஊடகவியலாளர்களுக்கு கட்டுப்பாடு விதிக்கப்பட்டுள்ள நிலையில் அங்கிருந்து வரும் செய்திகளை சுயாதீனமாக உறுதி செய்ய முடியவில்லை என சர்வதேச ஊடகங்கள் குறுப்பிட் டுள்ளமை குறிப்பிடத்தக்கது.

உங்களுக்கு வேண்டும்