அரபு லீக் கண்காணிப்பாளர்களை சிரியாவில் இருந்து வெளியேறுமாறு கோரிக்கை

by *சம்ஸ் Tue 3 Jan 2012 - 6:32

அரபு லீக் கண்காணிப்பாளர்களை சிரியாவில் இருந்து வெளியேறுமாறு கோரிக்கை
சிரியாவில் தொடர்ந்தும் வன்முறைகள் நீடிக்கும் நிலையில் அரபு லீக் கண்காணிப்பாளர்களை அங்கிருந்து வெளியேறும்படி அரபு லீக் அமைப்பின் ஆலோசனைக் குழு கோரிக்கை விடுத்துள்ளது.

“அரபு லீக் கண்காணிப்பு பணியில் ஈடுபட்டிருக்கும் நிலையிலும் சிரிய துருப்புகள் அப்பாவி பொது மக்கள் மீது தாக்குதல் நடத்துகிறது. இதனால் கண்காணிப்பு குழுவினர் அங்கிருந்து வெளியேற வேண்டும்” என்று அரபு லீக் பாராளுமன்றத்தின் சபாநாயகரும், அதன் ஆலோசனைக் குழு உறுப்பினருமான அலி சலாம் அல் தக்பாசி வெளியிட்டுள்ள அறிக்கையில் குறிப்பிடப்பட்டுள்ளது. அத்துடன் இது தொடர்பில் அரபு லீக் வெளியுறவு அமைச்சர்கள் உடனடியாக கூடி தீர்மானம் எடுக்க வேண்டும் எனவும் அவர் கோரியுள்ளார்.

எனினும் சிரியாவில் திட்டமிட்டபடி கண்காணிப்பு பணிகள் தொடரும் என்றும் நிறைவேற்றுக் குழுவுக்கே அதனை நிறுத்தும் அதிகாரம் இருப்பதாகவும் அரபு லீக் அமைப்பு நேற்று முன்தினம் வெளியிட்ட உத்தியோகபூர்வ அறிவிப்பில் குறிப்பிடப்பட்டுள்ளது.

சிரியாவில் தொடரும் வன்முறைகளை முடிவுக்கு கொண்டுவரும் அரபு - லீக் தீர்வுத் திட்டத்தில் சிரிய அரசு கைச்சாத்திட்டதைத் தொடர்ந்து அரபு லீக் கண்காணிப்பாளர்கள் அங்கு சென்று கண்காணிப்பு பணியில் ஈடுபட்டு வருகின்றனர்.

எனினும் சிரியாவில் வன்முறைகள் நீடிப் பதாக எதிர்ப்பாளர்கள் குறிப்பிட்டுள்ளனர். அரபு லீக் கண்காணிப்பாளர்கள் சிரியா சென்ற முதல் இதுவரை 150 க்கும் மேற்பட்டோர் கொல்லப்பட்டுள்ளதாகவும் எதிர்ப்பாளர்கள் குறிப்பிட்டுள்ளனர்.

இந் நிலையில் அரபு லீக் கண்காணிப்பாளர்கள் மீது கடும் விமர்சனம் எழுந்துள்ளது. குறிப்பாக கண்காணிப்பு குழுவின் தலைவர் சூடானின் ஜெனரல் முதபா அல் டாபி சிரிய அரசுக்கு சார்பாக செயற்படுவதாக எதிர்ப்பாளர்கள் குற்றஞ்சாட்டியுள்ளனர்.