சத்து என்றால் என்ன?

ஆரோக்கியமான வாழ்வுக்கு புரோட்டீன், கொழுப்பு, கார்போ ஹைட்ரேட், வைட்டமின்கள், தாதுப்பொருட்கள் என பலவிதமான சத்துக்கள் தேவைப்படுகின்றன. இவை சரியான அளவுக்கு கிடைத்தால் தான் நமது உடம்பால் பலவிதமான இயக்கங்களை சரிவர மேற்கொள்ள முடியும்.

இவை தினந்தோறும் நாம் சாப்பிடும் பால் பொருட்கள், இறைச்சி உணவுகள், தாவர எண்ணெய்கள், எண்ணெய் கொட்டைகள், பழங்கள், காய்கறிகள் என பலவிதமான உணவுப்பொருட்கள் மூலம் நமக்கு கிடைக்கின்றன.

உடம்புக்கு தேவையான அனைத்து சத்துக்களும், நாம் சாப்பிடும் உணவுப் பொருட்கள் மூலம் கிடைப்பதால், அந்த சாப்பாட்டில் எல்லாவிதமான சத்துக்களும் சரி விகிதத்தில் இருப்பதை உறுதி செய்ய வேண்டும். உணவுகளை பொறுத்தமட்டில், நமக்கு தேவையான அளவுக்கு சத்துக்கள் இருக்க வேண்டும். எல்லாவிதமான சத்துக்களும் இருக்க வேண்டும். ஒன்று இருந்து மற்றொன்று இல்லையென்று ஆகி விடக்கூடாது. இதற்கு நல்ல உணவுப் பழக்கம் இருக்க வேண்டும்.

வயிற்றை நிரப்புவதற்காக ஏதோ கண்ணில் பட்டதை சாப்பிடக் கூடாது. உடல் இயக்கத்துக்கு தேவையான சத்துக்கள் இருக்கிறதா? என்று பார்த்து விட்டு சாப்பிட வேண்டும். சரிவிகித சத்துப் பொருட்களால் உடம்புக்கு என்றுமே ஆபத்து இல்லை. ஆனால் தேவையில்லாத உணவுகளை சாப்பிடும் போது தான் சிக்கலே ஆரம்பிக்கும்

ஊட்டச் சத்துக்கள்

மாவுப் பொருட்கள் உடலுக்கு தேவையான ஆற்றலை வழங்குகின்றன. அரிசி, கிழங்குகள், தானியங்கள் ஆகியவற்றில் மாவுப் பொருட்கள் அதிகமாக உள்ளன. அரிசிச் சோறு, கோதுமை மற்றும் வேறு தானியங்களில் செய்த பண்டங்கள், உருளைக்கிழங்கு போன்றவற்றை குழந்தையின் உணவில் சிறிதளவு சேர்த்துக் கொள்ளலாம்.

பொதுவாக சிறு குழந்தையின் உணவில் மாவுப்பொருள், கொழுப்பு ஆகியவற்றை விட புரதச் சத்து நிறைந்த உணவுப் பொருட்களை அதிகமாக சேர்த்துக் கொள்வது மிகவும் நல்லது. அதே சமயம் மாவுப் பொருட்கள் கொழுப்பு ஆகியனவும் குழந்தைகளுக்கு போதுமான அளவில் கிடைக்குமாறு பார்த்துக் கொள்ள வேண்டும்.

இது தவிர கால்சியம், பாஸ்பரம், இரும்பு, செம்பு போன்ற சில தாதுப் பொருட்களும் குழந்தையின் ஆரோக்கியமான வளர்ச்சிக்கு தேவைப்படுகின்றன. கால்சியமும், பாஸ்பரமும் குழந்தையின் பல் மற்றும் எலும்புகளின் வளர்ச்சிக்கு மிகவும் அவசியம். இரும்பு, செம்பு போன்றவை ரத்த விருத்திக்கு தேவைப்படுகின்றன.

பால், அவரைக்காய் போன்றவற்றில் கால்சியம் அதிகமாக இருக்கிறது. உப்பு, பால், கோழி இறைச்சி போன்றவற்றில் பாஸ்பரம் அதிகமாக உள்ளது. கீரை, அவரைக்காய், பட்டாணி ஆகியவற்றில் இரும்புச் சத்து அதிக அளவில் இருக்கிறது.