22 ஆண்டுகளில் இல்லாத கடுங்குளிர்: மேலும் சில நாட்கள் நீடிக்கும் என வானிலை மையம் தகவல்

by **நண்பன்** Wed 18 Jan 2012 - 10:38

பொங்கல் பண்டிகை தினத்தில் இருந்து சென்னையில் இரவிலும், அதிகாலையிலும்
கடுமையான குளிர் உள்ளது. மாலை 5 மணியில் இருந்தே பனி அதிகமாக பொழியத்
தொடங்கி விடுகிறது.
பொங்கலுக்கு முதல்நாள் (14-ந்தேதி) குறைந்தபட்ச வெப்பநிலை 65.84 டிகிரி
(பாரன்ஹீட்) ஆக இருந்தது. பொங்கல் தினத்தில் 65.30 டிகிரியாக குறைந்தது.
16-ந்தேதி 63.14 டிகிரியாக பதிவானது.

நேற்று இது மேலும் குறைந்து 62.42 டிகிரி ஆனது. 1990-ஆம் ஆண்டு குறைந்தபட்ச
வெப்பநிலை இதேஅளவு பதிவாகி இருந்தது. இப்போது 22 ஆண்டுகளுக்குப் பிறகு
அந்த அளவு குறைந்த வெப்பநிலை பதிவாகி இருக்கிறது.
1967 ஜனவரி 27-ந்தேதி 60.08 டிகிரியும், 1905-ம் ஆண்டு இதே காலத்தில் 57.02
டிகிரியும் குறைந்தபட்ச வெப்பநிலையாக சென்னையில் பதிவாகி உள்ளது.

கடந்த 3 நாட்களாக வானம் மிகவும் தெளிவாக இருக்கிறது. எனவே, குளிர் அதிகமாக
உள்ளது. வானம் தெளிவாக இருந்தால் குறைந்த பட்ச வெப்பம் நிலவும். அதிக
குளிர் இன்னும் சில நாட்கள் நீடிக்கும். அதன்பிறகு குறையும் என்று வானிலை
மையம் அறிவித்துள்ளது.
கர்நாடக மாநிலத்தின் உள்பகுதியில் குறைந்தபட்ச வெப்பநிலை 40.64 டிகிரியாக
பதிவாகி இருக்கிறது. மைசூரில் கடந்த 120 ஆண்டுக்கு பிறகு 45.86 டிகிரியாக
குறைந்துள்ளது.

பெங்களூரில் 19 ஆண்டுகளுக்கு பிறகு 53.60 டிகிரியாகி இருக்கிறது. பெல்காம்
உள்பட சில பகுதிகளில் 46.60 டிகிரி முதல் 48.20 டிகிரி வெப்பம் குறைந்த
பட்சமாக பதிவாகி உள்ளது.
ஆந்திர மாநிலம் அலகா பாத்தில் குறைந்தபட்ச வெப்பநிலை 39.20 டிகிரியாக
இருந்தது. 2 தினங்களுக்கு முன்பு மிகவும் குறைவாக 37.40 டிகிரி வெப்பநிலை
காணப்பட்டது. ஆந்திராவில் மேலும் ஒருநாள் இதே நிலை நீடிக்கும் என்று வானிலை
இலாகா அறிவித்துள்ளது.