பின்லேடன் குறித்து பாக். மருத்துவர் தகவல் அளித்ததாக அமெ. ஒப்புதல்

பின்லேடன் குறித்து பாக். மருத்துவர் தகவல் அளித்ததாக அமெ. ஒப்புதல்
ஒசாமா பின்லேடன் பதுங்கியிருந்தது குறித்து பாக். மருத்துவர் ஷகில் அப்ரிதிதான் தகவல் அளித்தார் என்று அமெரிக்க பாதுகாப்புச் செயலாளர் லியோன் பனெட்டா தெரிவித்துள்ளார்.

பாகிஸ்தானில் பின்லேடன் பதுங்கியிருந்தது குறித்து தங்களுக்கு யார் தகவல் கொடுத்தது என்பதை அமெரிக்கா இப்போது முதல் தடவையாக வெளிப்படையாகக் கூறியுள்ளது.

அபோட்டாபாதில் இராணுவப் பாதுகாப்புமிக்க பகுதியில் மறைமுக வாழ்க்கை வாழ்ந்து வந்த ஒசாமா பின்லேடனை அமெரிக்க விமானப் படை கடந்த ஆண்டு சுட்டுக்கொன்றது. இத்தாக்குதல் பாகிஸ்தானை அதிர்ச்சிக்குள்ளாக்கியது.

இதையடுத்து பாகிஸ்தான் அரசு மேற்கொண்ட விசாரணையில் ஒசாமா பின்லேடன் பதுங்கியிருந்தது குறித்து டொக்டர் ஷகில் அப்ரிதி அமெரிக்காவுக்கு தகவல் அளித்தது தெரியவந்தது. இதனால் அவர் மீது தேசத்துரோக வழக்குப் பதிவு செய்து சிறையில் அடைத்தது.

பயங்கரவாதத்தால் அமெரிக்காவும், பாகிஸ்தானும் கடுமையாகப் பாதிக்கப்பட்டுள்ளன. இதனால் பயங்கரவாதத்தை அடியோடு ஒழிக்க இரு நாடுகளும் பொதுவான நிலைப்பாட்டைக் கொண்டுள்ளன.

இரு நாடுகளின் இந்த நடவடிக்கைக்கு உதவும் வகையில் தான் டொக்டர் ஷகில் முக்கிய தகவலை அளித்தார். அவரது இந்தச் செயலை பாகிஸ்தான் பாராட்டியிருக்கவேண்டும்.

அதைவிடுத்து அவரை கைது செய்து சிறையில் தள்ளியது எவ்விதத்திலும் ஏற்கத்தக்கதல்ல. அதில் நியாயமும் இல்லை. பாகிஸ்தானின் இந்த நடவடிக்கையும், பயங்கரவாதத்துக்கு எதிரான அதன் நிலைப்பாடும் ஒன்றுக்கொன்று முரண்பாடாக உள்ளன.

இதைப் பார்க்கும்போது பயங்கரவாதத்தை ஒழிக்க வேண்டும் என்ற உண்மையான எண்ணம் பாகிஸ்தானுக்கு இல்லையோ என்ற சந்தேகம் எழுகிறது என்றும் பனெட்டா கூறியுள்ளார்.