பாக். ஜனாதிபதிக்கு எதிரான வழக்;கு குறித்து சுவிட்சர்லாந்துக்கு கடிதம்

பாக். ஜனாதிபதிக்கு எதிரான வழக்;கு குறித்து சுவிட்சர்லாந்துக்கு கடிதம்
பாகிஸ்தான் அதிபர் ஆசிப் அலி சர்தாரிக்கு எதிரான ஊழல் வழக்கை திரும்பத் தொடங்க சுவிட்சர்லாந்துக்கு கடிதம் எழுதும்படி பிரதமர் யூசுப் ரஸா கிலானிக்கு உச்ச நீதிமன்றம் உத்தரவிட்டுள்ளது.

பிரதமர் கிலானிக்கு எதிரான நீதிமன்ற வழக்கிலேயே இந்த உத்தரவு அளிக்கப்பட்டுள்ளது. அதிபர் சர்தாரிக்கு எதிரான ஊழல் வழக்கை மீண்டும் விசாரிப்பது குறித்து சுவிட்சர்லாந்து நாட்டு அரசுக்கு கடிதம் எழுதினால் பிரதமர் கிலானிக்கு எதிரான நீதிமன்ற அவமதிப்பு வழக்கு முடிவுக்கு வந்துவிடும் என்று தலைமை நீதிபதி இஃப்திகார் செளத்ரி தெரிவித்தார்.

யாரும் சட்டத்திற்கு மேலானவர்கள்அல்ல என்றும் அவர் தெரிவித்தார். ஊழல் வழக்கில் தொடர்புடையவர் பிரதமரின் கட்சித் தலைவராக இருந்தாலும், சட்டத்துக்கு அப்பாற்பட்டவர் அல்ல என்றும் தலைமை நீதிபதி தெரிவித்தார்.

முறைகேடாக எடுத்துச் செல்லப்பட்ட 60 மில்லியன் அமெரிக்க டொலர் மதிப்பிலான பணம், சுவிட்சர்லாந்துக்கு கடிதம் எழுதுவதன் மூலமே பாகிஸ்தானுக்கு மீண்டும் திரும்பி வரும் என்று 8 நீதிபதிகள் கொண்ட அமர்வு கருத்துத் தெரிவித்தது.

மேலும் கிலானியின் மேல் முறையீட்டு மனுவில் உள்ள ஆட்சேபகரமான பகுதிகள் சிலவற்றை நீக்கும்படியும் நீதிபதிகள் உத்தரவிட்டனர்.

இந்தப் பகுதிகளில் முஷாரப்பின் ஆட்சிக் காலத்தில் கைது செய்யப்பட்ட நீதிபதிகள் சிலரை கிலானி விடுவித்தது குறித்து குறிப்பிடப்பட்டிருந்தது.

மேலும் நீதிமன்ற அவமதிப்பு வழக்கில் தண்டிக்கப்பட்டால் சிறைக்கு செல்வது கிலானி என்ற தனி மனிதர்தானே தவிர, பிரதமர் அல்ல என்றும் கிலானியின் வழக்குரைஞர் ஆஷான் தெரிவித்தார். இது குறித்து ஆட்சேபம் தெரிவித்த தலைமை நீதிபதி பிரதமர் தனக்கென்று சில உயர்ந்த நன்னெறிகளை உடையவராக இருக்க வேண்டும் என்றும், ஆனால் மேன் முறையீட்டு மனுவில் நீதிமன்றத் தீர்ப்பின் மீது நிர்ப்பந்தம் செலுத்தும் வகையில் கிலானி கருத்துத் தெரிவித்துள்ளதாகவும் தெரிவித்தார். இதற்குப் பதிலளித்த வழக்குரைஞர் ஆஷான், சந்தேகத்தின் பலனை கிலானி பெற வேண்டும் என்று தெரிவித்தார்.

முன்னதாக ஜர்தாரி மீதான ஊழல் வழக்கில் மறு விசாரணை செய்ய அரசுக்கு உச்ச நீதிமன்றம் உத்தரவிட்ட போது அதற்கு பிரதமர் கிலானி மறுத்துவிட்டார். இதை நீதிமன்றத்தை அவமதிக்கும் செயலாகக் கருதிய நீதிமன்றம் பெப்ரவரி 13 ஆம் திகதி நேரில் ஆஜராகும்படி கிலானிக்கு உத்தரவிட்டது. பின்னர் கிலானியின் வேண்டுகோளை ஏற்று பெப்ரவரி 9ம் திகதியே விசாரணைக்கு ஏற்றது. இவ்வழக்கிலேயே மேற்கண்ட தீர்ப்பை நீதிபதிகள் வழங்கினர்.