இரண்டு நாள் மோதலுக்கு பின் சபாப் நகரை கைப்பற்றியது இராணுவம்

by *சம்ஸ் Tue 31 Jan 2012 - 6:28

இரண்டு நாள் மோதலுக்கு பின் சபாப் நகரை கைப்பற்றியது இராணுவம்
சிரிய சுயாதீன படையின் கட்டுப்பாட்டில் இருந்த தலைநகர் டமஸ்கஸின் சபாப் பகுதியை இராணுவம் மீண்டும் கைப்பற்றியுள்ளது.

கடந்த இரண்டு தினங்களாக நடந்த கடுமையான மோதலைத் தொடர்ந்தே சபாப் நகர் இராணுவ வசம் வந்துள்ளது. இதன் போது சிரிய இராணுவம் மேற்படி நகர் மீது தொடர்ச்சியான தாக்குதல்களை நடத்தியதாக எதிர்ப்பாளர்கள் தெரிவித்துள்ளனர்.

எனினும் சுயாதீனப் படை சபாபிலிருந்து தந்திரோபாயமாக பின்வாங்கிக் கொண்டது எனவும் தற்போது அங்கு வீடு வீடாக தேடுதல் நடத்தப்பட்டு கைது நடவடிக்கைகள் இடம் பெற்று வருவதாகவும் சுயாதீனப் படையைச் சேர்ந்த கமால் என்பவர் ராய்ட்டருக்கு தெரிவித்துள்ளார்.

எவ்வாறாயினும் தலை நகரில் அரசுக்கு எதிராக தொடர்ந்து தாக்குதல்கள் நடத்தப்படும் என சுயாதீனப் படை அறிவித்துள்ளது. தலைநகரில் இடம் பெற்ற மோதல்களில் இரண்டு தினங்களுக்குள் 26 பேர் பலியாகியுள்ளதாக எதிர்ப்பாளர்கள் தெரிவித்துள்ளனர்.

அரபு லீக் அமைப்பு சிரியாவில் தனது கண்காணிப்பு பணியை இடை நிறுத்திக் கொண்டதைத் தொடர்ந்து நேற்று முன்தினத்தில் மாத்திரம் நாடு பூராவும் இடம் பெற்ற மோதல்களில் 60 பேர் கொல்லப்பட்டுள்ளதாக அரச எதிர்ப்பாளர்கள் கூறியுள்ளனர்.

இதேவேளை கடந்த வாரத்தில் மாத்திரம் 50 க்கும் மேற்பட்ட இராணுவ வீரர்களின் இறுதிச் சடங்கு நிகழ்வுகள் இடம்பெற்றதாக அங்கிருந்து வரும் செய்திகள் தெரிவிக்கின்றன. இவர்கள் சுயாதீனப் படையுடனான மோதலில் கொல்லப்பட்டோர் என தெரிவிக்கப்படுகிறது.

சிரிய அரசுக்கு எதிராக இராணுவத்தில் இருந்து பிரிந்து செயற்படும் சுயாதீனப் படை தொடர்ந்து தாக்குதல்களை நடத்தி வருகிறது. இதன் தொடர்ச்சியாக கடந்த சனிக்கிழமை சபாப் நகரின் ஒரு சில பகுதிகளை சுயாதீனப் படை கைப்பற்றியது. இதன் போது 2000 துருப்புகள், 50 டாங்கிகள் இந்த நடவடிக்கையில் ஈடுபட்டதாக எதிர்ப்பாளர்கள் குறிப்பிட்டுள்ளனர்.

இதன் போது இரு தரப்புக்கும் இடையில் கடுமையான மோதல் ஏற்பட்டுள்ளதோடு வீதிகள் எங்கும் உடல்கள் குவிந்து கிடப்பதாக பிரிட்டனை மையமாகக் கொண்டு இயங்கும் சிரியா தொடர்பில் கண்காணித்துவரும் மனித உரிமை அமைப்பு கூறியுள்ளது.

சிரியாவில் ஊடகங்களின் செயற்பாட்டுக்கு கட்டுப்பாடுகள் விதிக்கப்பட்டிருக்கும் நிலையில் அங்கிருந்து வரும் செய்திகளை சுயாதீனமாக உறுதி செய்ய முடியவில்லை என சர்வதேச ஊடகங்கள் தெரிவித்துள்ளன.