தம்புள்ளை மஸ்ஜித் விவகாரத்திற்காக அரசிலிருந்து முஸ்லிம் காங்கிரஸ் விலகாது

by **முனாஸ் சுலைமான்** Sun 29 Apr 2012 - 20:18

தம்புள்ளை மஸ்ஜித் விவகாரத்த்தைக் காரணம் காட்டி ஸ்ரீலங்கா முஸ்லிம் காங்கிரஸ் இந்த அரசிலிருந்து விலக மாட்டாது என்று முஸ்லிம் காங்கிரஸ் தலைவரான அமைச்சர் ரவூப் ஹக்கீம் உறுதியாகத் தெரிவித்தார்.

நேற்று இடம்பெற்ற கட்சியின் உச்ச பீட கூட்டத்திலேயே அவர் இதனைத் தெரிவித்தார். மிகவும் பரபரப்பான சூழ்நிலையில் கூடிய உச்ச பீடம் தம்புள்ளை மஸ்ஜித் விவகாரம், கிழக்கு மாகாண சபைத் தேர்தல் உள்ளிட்ட பல்வேறு விடயங்கள் குறித்து ஆராய்ந்தது. இதன்போது காரசாரமான விவாதங்களும் இடம்பெற்றுள்ளன.

தம்புள்ளை மஸ்ஜித் விவகாரத்தில் எவ்வித விட்டுக் கொடுப்புக்கும் இடமளிக்கக் கூடாது என அங்கு வலியுறுத்தப்பட்டது. அதேவேளை அரசு இந்த விடயத்தில் நியாயமாக நடந்து கொள்ளாவிடின் அரசிலிருந்து முஸ்லிம் காங்கிரஸ் விலக வேண்டும் என்று சில உறுப்பினர்கள் உரத்துக் குரல் எழுப்பினர்.

எனினும் அதனைக் காரணம் காட்டி அரசை விட்டு வெளியேறுவதானது சமூகத்திற்கும் கட்சிக்கும் ஆரோக்கியமானதாக இருக்காது என முஸ்லிம் காங்கிரஸ் தலைவரான அமைச்சர் ரவூப் ஹக்கீம் தெரிவித்தார்.

அத்துடன் தம்புள்ளை மஸ்ஜித் விவகாரத்தினால் முஸ்லிம் காங்கிரஸ் அரசை விட்டு விலக நேரிடலாம் என்ற கருத்தை மறுதலித்த தலைவர் ஹக்கீம், இனிமேல் கட்சியின் ஏகோபித்த தீர்மானம் எதுவுமின்றி இவ்வாறான அறிக்கைகளை வெளியிடுவதை அனைவரும் தவிர்த்துக் கொள்ள வேண்டும் என்றும் பணிப்புரை விடுத்தார்.

அதேவேளை கிழக்கு மாகாண சபைத் தேர்தல் பற்றி ஆராயப்பட்ட போது, நமது கட்சி தனித்தே போட்டியிட வேண்டும் என்று பெரும்பாலான உறுப்பினர்கள் வலியுறுத்தினர். அதற்குப் பதிலளித்த அமைச்சர் ரவூப் ஹக்கீம்; கிழக்கு மாகாண சபைத் தேர்தலில் எமது கட்சி தனித்தே போட்டியிட வேண்டும் என்கின்ற எண்ணத்துடனேயே நானும் உள்ளேன். எனினும் அரசுடன் இணைத்து போட்டியிடுமாறு கேட்கப்பட்டால், எமது நிபந்தனைகள் ஏற்றுக் கொள்ளப்பட்டு உடன்படிக்கை கைச்சாத்திட அரசு முன்வர வேண்டும் என்று தெரிவித்தார்.

எவ்வாறாயினும் தேர்தல் அறிவிக்கப்பட்ட பின்னரே நாம் அது பற்றித் தீர்மானிக்க முடியும் என்றும் அவர் கூறினார். ஆனால் அத்தேர்தலுக்காக நாம் இப்போதிருந்தே தயாராக வேண்டும் என்றும் அமைச்சர் ரவூப் ஹக்கீம் இதன்போது வலியுறுத்தினார்.

அதேவேளை கிழக்கு மாகாண சபைத் தேர்தல் பற்றி ஆராயப்பட்டபோது, கிழக்கை சேர்ந்தவரே முதலமைச்சராக வர வேண்டும் என்று பிரதிச் செயலாளர் நாயகம் சட்டத்தரணி நிசாம் காரியப்பர் கல்முனையில் வெளியிட்ட சர்ச்சைக்குரிய அறிக்கை தொடர்பில் அங்கு எதுவும் பேசப்படவில்லை.

இந்த விடயம் பற்றி கட்சியின் உச்சபீட கூட்டத்தில் சூடு கிளம்பும் எனவும் நிசாம் காரியப்பர் மீதான ஒழுக்காற்று நடவடிக்கைக்கு தீர்மானம் எடுக்கப்படும் எனவும் அதன் நிமித்தம் அவர் கட்சியில் இருந்து இடை நிறுத்தப்படலாம் என்றும் கட்சி முக்கியஸ்தர்களினால் ஏற்கனவே தகவல்கள் தெரிவிக்கப்பட்டிருந்தமை குறிப்பிடத்தக்கது.

இவ்வாறு பரபரப்பான சூழ்நிலையில் கூடிய உச்ச பீடத்தில் காரசாரமான விவாதங்கள் இடம்பெற்ற போதிலும் பிரதிச் செயலாளர் சட்டத்தரணி நிசாம் காரியப்பர் தொடர்பிலான விடயம் எதுவும் சபைக்கு எவராலும் முன் மொழியப்படவில்லை எனத் தெரிவிக்கப்படுகிறது.