ரூபாவின் பெறுமதி மேலும் பன்மடங்கு வீழ்ச்சி அடையும் அபாயம்: பொருளாதார நிபுணர் ஹர்ஷ டி சில்வா

by **நேசமுடன் ஹாசிம்** Tue 8 May 2012 - 13:13

ரூபாவின் பெறுமதி மேலும் பன்மடங்கு வீழ்ச்சியடையும் அபாயம் ஏற்ட்டுள்ளது. இதனால் உள்நாட்டின் அந்நிய செலாவணி வற்றிப் போய் மொத்த பொருளாதார கூறுகளும் கேள்விக்குறியாகப் போகின்றது என்று பொருளாதார நிபுணரும் ஐ.தே.க. வின் பாராளுமன்ற உறுப்பினருமான ஹர்ஷ டி சில்வா தெரிவித்தார்.
வருமானம் ஈட்டல் தொடர்பில் அரசாங்கத்திற்கு பாரிய சிக்கல்கள் உள்ளன. அது மட்டுமின்றி அரசின் செலவுகள் வருமானத்தை விட கூடுதலாகவே காணப்படுகின்றது.

இதனால் அனைத்து துறைகளிலும் வரியினை மேலும் மேலும் அதிகரிக்கச் செய்து பற்றாக்குறையினை நிவர்த்திக்க முயற்சிப்பதால் அத்தியாவசிய உணவுப் பொருட்களின் விலைகள் கட்டுக்கடங்காத வகையில் அதிகரிக்கின்றன.

இந்நிலை மேலும் தொடரும் என்றும் அவர் குறிப்பிட்டார். இது தொடர்பாக ஹர்ஷ டி சில்வா எம்.பி. தொடர்ந்தும் கூறுகையில்,

அத்தியாவசிய உணவுப் பொருட்களின் விலை ஏற்றத்தினை அரசாங்கத்தால் கட்டுப்படுத்த முடியவில்லை. பொதுமக்கள் பொருட்களின் விலையேற்றத்தால் பெரிதும் பாதிக்கப்பட்டுள்ளனர்.

உலக சந்தையில் பொருட்களின் விலை குறைவாக காணப்பட்டாலும் அதன் நன்மையினை இலங்கை மக்களால் பெற்றுக் கொள்ள முடிவதில்லை.

பொருளாதார அபிவிருத்தி தொடர்பில் அரசு கூறும் தரவுகள் உண்மைக்குப் புறம்பானவை. பொருட்களின் விலையேற்ற வேகம் 10 வீதத்தையும் தாண்டியே காணப்படுகின்றது.

குறைவான முறையில் அளவீடுகளை மேற்கொண்ட போலியான தரவுகளை பொதுமக்கள் மத்தியில் அரசாங்கம் பரப்புகின்றது.

எவ்விதமான அடிப்படையறிவும் அற்ற வகையிலேயே அரசாங்கத்தின் பொருளாதாரம் காணப்படுகின்றது.

குறிப்பாக ரூபாவின் பெறுமதியினை பாதுகாக்கத் தவறியமையால் டொலரின் பெறுமதி அதிகரித்துக் கொண்டே போகின்றது.

தற்போது ரூபாவின் பெறுமதியானது மேலும் வீழ்ச்சியடையும் நிலையே காணப்படுகின்றது. இது தேசிய பொருளாதாரத்திற்கு பாரிய சவாலாகவே அமையும் என்றார்.