உயர்தரப் பரீட்சை பெறுபேறுகள் தொடர்பில் ஆராய மற்றுமொரு நிபுணர் குழு

May 14th, 2012 அன்று பிரசுரிக்கப்பட்டது.

கடந்த ஆண்டு வெளியான கல்விப் பொதுத்தராதர உயர்தரப் பரீட்சை பெறுபேறுகள் தொடர்பில் எழுந்துள்ள பிரச்சினை குறித்து ஆராய்வதற்கான மற்றுமொரு நிபுணர் குழுவை நியமிக்க தீர்மானித்துள்ளதாக உயர்கல்வி அமைச்சர் எஸ்.பீ.திஸாநாயக்க தெரிவிக்கின்றார்.

ஜனாதிபதி வழங்கிய ஆலோசனைக்கு அமைய எதிர்வரும் தினங்களில் இந்த நிபுணர் குழு நியமிக்கப்படும் என அமைச்சர் குறிப்பிட்டார்.

இந்தப் பிரச்சினை தொடர்பில் புத்திஜீவிகள் மற்றும் நீதிமன்றம் உள்ளிட்ட தரப்பினரின் கருத்துக்களை கவனத்திற் கொண்டே இந்த தீர்மானம் எடுக்கப்பட்டுள்ளதாக உயர்கல்வி அமைச்சர் கூறினார்.

இரண்டு பாடவிதானங்களின் அடிப்படையில் மாணவர்கள் உயர்தர பரீட்சையை எதிர்நோக்கியிருந்தமையினால், அவர்களை பல்கலைக்கழகங்களில் இணைத்துக் கொள்வதற்காக பல்கலைக்கழக மானியங்கள் ஆணைக்குழு விசேட குழுவொன்றை நியமித்திருந்ததாகவும் அவர் குறிப்பிட்டார்.

அவ்வாறு நியமிக்கப்பட்ட குழுவினால் திட்டமொன்று வகுக்கப்பட்டு தம்மிடம் கையளிக்கப்பட்டதாகவும் அவர் சுட்டிக்காட்டினார்.

இந்தநிலையில் இந்தத் திட்டம் குறித்து பல்வேறு தரப்பிலிருந்து பல விமர்சனங்கள் எழுந்துள்ளதாகவும், இவ்வாறு எழுந்த விமர்சனங்கள் தொடர்பில் தாம் அதிக கவனம் செலுத்தியதாகவும் அமைச்சர் கூறினார்.

இதற்கமைவாகவே மற்றுமொறு நிபுணர் குழுவை நியமித்து இந்த விடயம் குறித்து ஆராயுமாறு ஜனாதிபதி தமக்கு ஆலோசனை வழங்கியதாகவும் உயர்கல்வி அமைச்சர் எஸ்.பி.திஸாநாயக்க குறிப்பிட்டார்.