காவிரி படுகை வயல்களில் மத்திய நிபுணர் குழு ஆய்வு

காவிரி படுகை வயல்களில்
மத்திய நிபுணர் குழு ஆய்வு



காவிரி படுகை வயல்களில் மத்திய நிபுணர் குழு நேற்று முன்தினம் ஆய்வுசெய்தது. பல
இடங்களிலும் பயிர்கள் கருகி போயிருந்ததை கண்டது. மோசமான நிலை குறித்து உச்ச
நீதிமன்றத்தில் நேற்று அறிக்கை தந்தது. தமிழகத்தில் பருவ மழை பொய்த்தது. மேட்டூர்
அணை வறண்டது. கொஞ்சமாவது காவிரியில் தண்ணீர் விடும்படி அளிக்கப்பட்ட காவிரி நதி
நீர்ஆணையகத்தின் உத்தரவு உச்ச நீதிமன்ற இடைக்கால தீர்ப்பு எதையும் அமுல்படுத்த
கர்நாடக அரசு மறுத்துவிட்டது.
இந்நிலையில் தமிழகத்துக்கு தண்ணீர் திறந்துவிடக் கோரி உச்ச நீதிமன்றத்தில்
தொடரப்பட்ட வழக்கில் பரபரப்பான உத்தரவு பிறப்பிக்கப்பட்டது. காவிரி ஆணைய உத்தரவை
அரசிதழில் வெளியிட ஒரு வாரம் கெடு விதித்தது. மேலும் காவிரி படுகை மாவட்டங்களில்
ஆய்வு செய்து மத்திய நீர் வளத்துறை நிபுணர் குழு நேற்று அறிக்கை தாக்கல் செய்யவும்
நீதிபதிகள் உத்தரவிட்டனர்.
இதைத் தொடர்ந்து மத்திய வேளாண்துறை துணை ஆணையர் (பயிர்கள்) பி. கே. ஷா தலைமையிலான
மத்திய நீர் வளத்துறை தலைமை பொறியாளர்கள் மகேந்திரன் ஜேக்கப், செயற் பொறியாளர்
தங்கமணி ஆகியோரைக் கொண்ட குழுவினர் நேற்று முன்தினம் திருச்சி வந்தனர். அங்கு இந்த
குழுவுடன் தமிழக அரசின் வருவாய் நிர்வாக ஆணையர் ஸ்ரீதர், வேளாண்மைத் துறை செயலாளர்
சந்தீப் சக்சேனா உட்பட அதிகாரிகள் சந்தித்துப் பேசினர். சுமார் ஒன்றரை மணி நேரம்
இந்த ஆலோசனை நடந்தது.
வழக்கமாக எவ்வளவு பரப்பில் பயிர் சாகுபடி செய்யப்படும் எவ்வளவு பரப்பில் சாகுபடி
நடைபெறவில்லை சாகுபடி செய்ததில் எவ்வளவு பரப்பில் பயிர்கள் கருகியது. தண்ணீர்
தற்போது கிடைத்தாலும் காப்பாற்ற முடியும் நிலையில் உள்ள பயிர்களின் பரப்பு போன்ற
விவரங்களை அவர்களுக்கு எடுத்து கூறினர்.

கருகிய வயல்களின் புகைப்பட ஆதாரங்களையும்
அப்போது காட்டினர். பின்னர் திருச்சி காட்டூர் பாப்பாக்குறிச்சி பகுதியில்
குழுவினர் ஆய்வு செய்தனர். வயலில் இறங்கி பயிர்களை பார்த்தனர் தஞ்சை மாவட்டம்
பூதலூர் அடுத்த கோவில்பத்து கிராமத்தில் வறண்டு கிடந்த சம்பா சாகுபடி வயலை
பார்வையிட்டனர். அப்போது மத்திய வேளாண் துறை துணை ஆணையர் பிரதீப்குமார் ஷா காய்ந்து
போன பயிர்களை சாம்பிளுக்கு வாங்கி வைத்துக்கொண்டார்.
தொடர்ந்து குணமங்கலம், ராயந்தூர், பாப்பாநாடு அடுத்த ஆடநல்லூர், மதுக்கூர் அடுத்த
சொக்கனாபுரம் ஆகிய கிராமங்களில் வரண்டு கிடந்த வயல்களை பார்வையிட்டனர்.
பாதிப்புகள் குறித்து தஞ்சை மாவட்டம் குணமங்கலத்தில் மத்திய குழுவினரிடம் கலெக்டர்
பாஸ்கரன் விளக்கி கூறுகையில்; இப்பகுதியில் 438 ஏக்கர் சம்பா பயிர்கள் தண்ணீர்
இன்றி பாதிக்கப்பட்டுள்ளது. 135 நாள் பயிரான ஏடிடி 36 நெல் ரகம்
பயிரிடப்பட்டுள்ளது. தற்போது இப்பயிர்களுக்கு 105 நாட்களாகிறது.

இங்கு
ஆற்றுப்பாசனம் மட்டும்தான் போர் வசதி கிடையாது.
இப்பயிர்களுக்கு தண்ணீர் கிடைத்தால்தான் பிழைக்கும் என்றார்.

நன்றி தினகரன்