நீண்ட நேரம் தூங்குவதற்கு நல்லதொரு சாட்டு!

June 12th, 2012 அன்று பிரசுரிக்கப்பட்டது.

நீண்ட நேரம் தூங்கிவிட்டீர்களென்பதற்கு நல்லதொரு சாட்டாக இது இருக்கப்போகின்றது. 6 மணித்தியாலத்திற்கும் குறைவாகத் தூங்கினால் நல்லதொரு சுகதேகியான ஒருவருக்குக்கூடப் பக்கவாதம் ஏற்படும் அபாயம் அதிகரிக்கும் என்கின்றனர் ஆய்வாளர்கள்.

5000 இற்கும் மேற்பட்ட 45 இற்கும் 65 வயதிற்குமிடைப்பட்டவர்களில் இப்பரிசோதனை 3 வருடங்களாகச் செய்துபார்க்கப்பட்டது.

இதில் 6 மணித்தியாலங்களிற்கும் குறைவாக நித்திரை கொள்பவர்களது ஒருபக்க உடலில் விறைப்பு அல்லது பலவீனம், பார்வைக் குறைபாடு அல்லது தம்மைப் பற்றி வாயாலோ அல்லது எழுத்துமூலமாகவோ விளக்கமுடியாத தன்மையுள்ள அறிகுறிகள் காணப்பட்டன.

அலபாமா பல்கலைக்கழக விஞ்ஞானிகளால் நித்திரை போதாமையின் தாக்கம் பாரிய விளைவெனக் கூறப்படுகின்றது. இப்பரிசோதனையின்போது பங்குபற்றியவர்கள் 5 பிரிவுகளாகப் பிரிக்கப்பட்டு 6 மாதத்திற்கொரு தடவை அவர்களது அறிகுறிகளைப் பதியுமாறு பணிக்கப்பட்டனர்.

இதுபோலவே வோர்விக் பல்கலைக்கழகத்தில் இடம்பெற்ற ஆய்விலும் பக்கவாதத்திற்கு நித்திரையின்மையும் காரணமெனக் கண்டுபிடிக்கப்பட்டிருந்தது.

மூச்சுப் பிரச்சினை இருப்பது நித்திரையின்மையை ஏற்படுத்துமென்பதும் இதனால் பக்கவாதம் ஏற்படுத்துமென்பதும் முன்னரே கண்டுபிடிக்கப்பட்டிருந்த விடயமாகும்.

கடந்த வருடம் வோர்விக் பல்கலைக்கழகத்தில் ஆயிரக்கணக்கானவர்களிடம் மேற்கொள்ளப்பட்ட சோதனையிலும் நித்திரையின்மையே பக்கவாதத்திற்கும் இதய நோய்க்கும் காரணமெனக் கூறப்பட்டது.

ஆனால் பக்கவாதத்தின் ஆரம்ப அறிகுறிகள் எப்போதுமே அலட்சியப்படுத்தப்படுவதால் அதுபற்றியே ஆராயப்பட்டிருந்தது.