மனித தோற்றமும் அதன் காலமும்...

மனிதத் தோற்றம் பற்றி நம்மிடையே உள்ள வெவ்வோறு சமயங்களும் கோட்பாடுகளும் வெவ்வேறான கருத்துக்களை கொண்டிருக்கின்றன, பண்டைய கிரேக்க தத்துவங்களும் பழைய விஞ்ஞானங்களும் மனிதனின் தோற்றம் பற்றி பிறிதொரு கருத்தை கொண்டுள்ளன,

அதே நேரம் குரங்கிலிருந்து மனிதன் தோன்றினான் என்பன போன்ற பரிநாமவாத்தக் கோட்பாடுடையவர்களும் உள்ளனர், இத்தகைய கருத்துக்களுக்கு முற்றிலும் மாற்றமான கருத்தையே இஸ்லாம் கொண்டிருக்கிறது.

இப்பிரபஞ்சம் தோன்றிய உடன் மனித வர்க்கமும் உதயமாகி விட்டது எனக் கூற இயலாது, மனிதன் என்று சொல்லும் வகையில் இல்லாமல் இருந்த காலம் மனிதனுக்கும் இருந்தது. இதனை அருள்மறை பின்வருமாறு எடுத்துக் காட்டுகின்றது.

“மனிதினின் மீது காலத்திலிருந்து ஒரு நேரம் கிட்டமாக வந்தது, (அதில் இன்னதென்று குறிப்பிட்டு எடுத்துச் சொல்லக்கூடிய எப்பொருளாகவும் அவன் (மனிதன்) இருக்கவில்லை” (அல் குர்ஆன் - 76:1)

வேதம் கொடுக்கப்பட்ட யூத, கிறிஸ்தவர்களும் மனித உற்பத்திக்கு ஆரம்பகாலம் ஒன்று உண்டென்று ஏற்றிருக்கின்றனர். மனித உற்பத்தி ஏற்ப்பட்டு இன்றைக்கு ஏறக்குறைய 7000 ஆண்டுகள் ஆகின்றன என்று அவர்கள் கூறுகின்றனர்.

இந்து மதத்தை சார்ந்தவர்களும், பாரசீகர்களும், மனித உற்பத்தி ஏற்பட்டு இலட்சக்கணக்கான ஆண்டுகளாகின்றன என்று கூறுகின்றனர். “மனிதன் குரங்கில் இருந்து தோன்றினான்” என்ற பரிணாம வளர்சிக்கொள்கை இன்னமும் ஒரு “கோட்பாடு” என்ற அளவிலேயே இருந்து வருகின்றது.
அதாவது இது ஒரு விஷயத்தை விளக்குவதற்காக கற்பனையாக செய்துகொண்ட கணிப்பு அல்லது அனுமானமே யன்றி, காலத்தின் சோதனையை கடந்து வந்த உண்மையல்ல.

விஞ்ஞானிகள் தாலாட்டும் பரிணாமக்கொள்கையில் உண்மை இருப்பதாக இருந்தால், மனிதக் குரங்கையும் ஆபிரிக்கக் கண்டத்தில் வாழும் வாலில்லாக் குரங்குகளையும் பரிணாம வளர்ச்சிப் பாதையைப் பின்பற்றி மனிதர்களாக மாறுவதில் இருந்து தடுத்தது எது?

இந்த மாற்றத்தை அடைவதற்கு போதிய காலங்கள் அவை வாழ்ந்தே இருக்கின்றன, பல லட்சம் ஆண்டுகள் அவை வாழ்ந்தாகி விட்டன, எனினும் ஏன் அவை அந்த மாற்றத்தை அடைய வில்லை?

“கோட்பாடுகள்” என்பவை நிருபிக்கப் பட்ட விஞ்ஞான உண்மைகள் அல்ல. இவை வெறும் அனுமானங்களே! காலப்போக்கில் ஒரு கோட்பாடு உண்மை என்று நிருபிக்கப்பட்டாலும் படலாம், அல்லது நிருபிக்கப்படாமல் பொய் என்று புறக்கணிக்கப்படலாம். இதனயே “கோட்பாடுகள்” எனச் சொல்வார்கள். (“மனிதன் எப்படி தோன்றினான்” – பி.ஆயிஷா லெமு)

மனித உற்பத்தி பரிணாம வளர்ச்சியின் அடிப்படையில் தோற்றம் பெறுவதற்கு அறவே சாத்தியமில்லை, என்னெனில் குரங்கில் இருந்து மனிதன் தோன்றினான் என்றால் அந்த மனித இனமும் பல கோடி ஆண்டுகள் வாழ்ந்தாகி விட்ட இந்நிலையில் இன்று வாழும் மனிதனில் இருந்து பரிணாம வளர்ச்சி என்ற ஒன்று ஏற்படாமல் இருப்பதில் இருந்து இது மிகவும் தவறான கருத்தாகும் என்பது உறுதியானது.

பரிணாமக் கோட்பாட்டினர் உட்பட அணைத்து தரப்பினர்களும் “மனித இனத்திற்கு தோற்றக் காலம் என்று ஒன்று உண்டு” என்பதை ஏற்றுக் கொள்வதை நாம் அவதானிக்கலாம்.

மனித உற்பத்தியானது நபி ஆதம் (அலை) அவர்களில் இருந்து தான் ஆரம்பம் ஆகின்றது என்று உலகில் பெரும் பான்மையான மனிதர்கள் உணர்ந்து கொள்ள உறுதியாக முடிவாயிருப்பதற்கு இஸ்லாமிய மூலாதாரங்களும் முன் வைப்புகளும் வலுவான ஆதாரங்களாகும்.



தொடரும்...

“முஸ்லிம் பூர்வீகம்” (M.M.M.நூறுல்ஹக்) நூலில் இருந்து