நியுசிலாந்துக்கு எதிரான 20க்கு 20 தொடர்;: தொடரைக் கைப்பற்றியது இங்கிலாந்து

இங்கிலாந்து அணிக்கும், நியூசிலாந்து அணிக்குமிடையிலான 3 போட்டிகள் கொண்ட டுவென்டி டுவென்டி தொடரை இங்கிலாந்து அணி கைப்பற்றியுள்ளது. நேற்று இடம்பெற்ற 3ஆவது போட்டியில் இங்கிலாந்து அணி 10 விக்கெட்டுகளால் இலகுவான வெற்றியைப் பெற்றது.

வெலிங்டனில் இடம்பெற்ற இப்போட்டியில் நாணயச்சுழற்சியில் வெற்றிபெற்ற இங்கிலாந்து அணி முதலில் துடுப்பெடுத்தாடத் தீர்மானித்தது.

இதன்படி முதலில் துடுப்பெடுத்தாடிய நியூசிலாந்து அணி 20 ஓவர்களில் 8 விக்கெட்டுக்களை இழந்து 139 ஓட்டங்களை மாத்திரம் பெற்றது.

ஆரம்பம் முதலே மெதுவாக ஆடிய அவ்வணி 3.3 ஓவர்களில் 17 ஓட்டங்களைப் பெற்றிருந்த போது தனது முதலாவது விக்கெட்டை இழந்தது. அதன் பின்னர் 2ஆவது விக்கெட்டுக்காக 45 ஓட்டங்கள் பகிரப்பட்ட போதிலும் தொடர்ந்து களமிறங்கிய வீரர்கள் சிறப்பாக ஆடாத நிலையில் அவ்வணி தடுமாறியிருந்தது.

துடுப்பாட்டத்தில் நியூசிலாந்து அணி சார்பாக மார்ட்டின் கப்ரில் 55 பந்துகளில் 59 ஓட்டங்களையும் பிரென்டன் மெக்கலம் 20 பந்துகளில் 26 ஓட்டங்களையும் பெற்றனர். பந்து வீச்சில் இங்கிலாந்து அணி சார்பாக ஸ்ருவேர்ட் ப்ரோட் 15 ஓட்டங்களுக்கு 3 விக்கெட்டுகளையும் ஜேட் டெர்ண்பக் 36 ஓட்டங்களுக்கு 3 விக்கெட்டுகளையும் ஜோ ரூட் ஜேம்ஸ் ட்ரெட்வெல் ஆகியோர் தலா ஒரு விக்கெட்டையும் கைப்பற்றினர்.

140 ஓட்டங்களை வெற்றி இலக்காகக் கொண்டு துடுப்பெடுத்தாடிய இங்கிலாந்து 12.4 ஓவர்களில் விக்கெட் எதனையும் இழக்காது வெற்றி இலக்கை அடைந்தது.

ஆரம்பம் முதலே அதிரடியாக ஆடிய இங்கிலாந்து அணி, நியூசிலாந்துப் பந்துவீச்சாளர்களுக்கு வாய்ப்பெதனையும் வழங்கியிருக்கவில்லை.

துடுப்பாட்டத்தில் இங்கிலாந்து அணி சார்பாக அலெக்ஸ் ஹேல்ஸ் 42 பந்துகளில் ஆட்டமிழக்காமல் 80 ஓட்டங்களையும் மைக்கல் லம்ப் 34 பந்துகளில் ஆட்டமிழக்காமல் 53 ஓட்டங்களையும் பெற்றனர்.

இந்த வெற்றியையடுத்து 3 போட்டிகள் கொண்ட இத்தொடரை இங்கிலாந்து அணி 2-1 என்ற கணக்கில் கைப்பற்றியுள்ளமை குறிப்பிடத்தக்கது.

வாழ்த்துக்கள் ... :!+: