இஸ்ரேலுக்கு ஆதரவளிக்க கூடாதென அங்கத்துவ நாடுகளுக்கு ஐரோப்பிய ஒன்றியம் அறிவுரை

சட்டவிரோத குடியேற்றம்

இஸ்ரேலுக்கு ஆதரவளிக்க கூடாதென அங்கத்துவ
நாடுகளுக்கு ஐரோப்பிய ஒன்றியம் அறிவுரை



கிழக்கு ஜெரூசலத்தில் இஸ்ரேலின் கட்டுமானங்கள் எதிர்கால இரு தேச தலைநகரை அமைக்கும்
திட்டத்தை தந்திரோபாயமாக தடுக்கும் முயற்சி என ஐரோப்பிய ஒன்றியம் குற்றம்
சாட்டியுள்ளது.
ஐரோப்பிய ஒன்றியத்தின் 2012 ஜெரூசலம் தொடர்பான அறிக்கையை ஏ.எப்.பி. செய்திச் சேவை
வெளியிட்டுள்ளது. அதில் கிழக்கு ஜெரூசலத்தில் மேற்கொள்ளப்படும் குடியிருப்புகள் இரு
தேச தீர்வுக்கு பெரும் முட்டுக்கட்டை என குறிப்பிடப்பட்டுள்ளது.
அதேபோன்று இஸ்ரேலின் சட்டவிரோத குடியிருப்புகளுக்கு நேரடியாகவோ மறைமுகமாகவோ தமது
அங்கத்துவ நாடுகள் எந்த ஒத்துழைப்பும் வழங்கக் கூடாது என ஐரோப்பிய ஒன்றியம் அறிவுரை
வழங்கியுள்ளது. எனினும் இந்த அறிக்கைக்கு மறுப்பு வெளியிட்டுள்ள இஸ்ரேல், ஐரோப்பா
தனது ராஜதந்திர செயற்பாடுகளில் தோல்வியடைந்துள்ளது என குற்றம் சாட்டியுள்ளது.

“இராஜதந்திர செயற்பாடு உறவுகளை வலுப்படுத்த வேண்டும் பிரிக்கக்கூடாது” என இஸ்ரேல்
வெளியுறவு அமைச்சின் பேச்சாளர் ஏ.எப்.பிக்கு கூறியுள்ளார். இஸ்ரேல் கிழக்கு
ஜெரூசலத்தில் 5000 சட்டவிரோத குடியிருப்புகளை அமைக்க திட்டமிட்டதைத் தொடர்ந்து
ஐரோப்பிய ஒன்றியத்திற்கும் இஸ்ரேலுக்கும் இடையிலான உறவில் அண்மைக்காலமாக விரிசல்
ஏற்பட்டுள்ளது. இந்நிலையிலேயே இஸ்ரேலின் சட்டவிரோத குடியிருப்புகள் தொடர்பில்
ஐரோப்பிய ஒன்றியம் 15 பக்க அறிக்கையை வெளியிட்டுள்ளது.
பலஸ்தீனம் தனது எதிர்கால தலைநகர் என கூறும் கிழக்கு ஜெரூசலத்தின் ஹார் ஹொமா, கிலோ
மற்றும் கிவாட் ஆகிய பகுதிகளில் இஸ்ரேல் கட்டுமானங்களை அமைத்து வருகிறது.
இதனால் கிழக்கு ஜெரூசலம் இந்த ஆண்டு இறுதிக்குள் பெத்லஹாமில் இருந்து
துண்டிக்கப்படும் அபாயம் உள்ளது.

“இந்த மூன்று பகுதிகளிலும் இடம்பெறும்
கட்டுமானங்கள் அரசியல் தந்திரோபாயம் கொண்டது. இதன் மூலம் எதிர்கால இருநாட்டு தலைநகர்
திட்டத்தை தடுக்கிறது” என ஐரோப்பிய ஒன்றியம் அறிக்கையில் கூறப்பட்டுள்ளது.
27 நாடுகளைக் கொண்ட ஐரோப்பிய ஒன்றிய இஸ்ரேலின் பிரதான ஏற்றுமதி மற்றும் இறக்குமதி
சந்தைகளாகும்.

நன்றி தினகரன்