பெண் நீதிபதிக்கு பரிசாக செருப்பு கொடுத்தவர் கைது

திருவனந்தபுரம்: மனைவியிடமிருந்து விவாகரத்து கோரி தாக்கல் செய்த வழக்கை தள்ளுபடி செய்ததால் ஆத்திரமடைந்த முதியவர் கண்ணூர் குடும்ப நல நீதிமன்ற பெண் நீதிபதிக்கு பரிசாக செருப்பு கொடுத்தது பரபரப்பை ஏற்படுத்தியது. இதையடுத்து போலீசார் அவரை கைது செய்தனர். கேரள மாநிலம் கண்ணூர் எளயாவூர் பகுதியை சேர்ந்தவர் வி.வி.பிரபாகரன் (62). இவர் ‘ஜனகீய பிரகதிகரணவேதி‘ என்ற அமைப்பின் தலைவராக உள்ளார். அரசுத்துறைகள் மூலமோ, தனி அமைப்புகளாலோ யாருக்காவது ஏதாவது வகையில் சிரமம் ஏற்பட்டால் இந்த அமைப்பு அவர்களுக்கு ஆதரவாக குரல் கொடுக்கும். இந்நிலையில் இந்த அமைப்பின் தலைவரான பிரபாகரனுக்கே பெரும் சிக்கல் ஏற்பட்டது. பிரபாகரனுக்கும் அவரது மனைவிக்கும் கருத்து வேறுபாடு இருந்து வந்தது. 5 வருடங்களுக்கு முன் விவாகரத்து கோரி கண்ணூர் குடும்ப நல நீதிமன்றத்தில் வழக்கு தொடர்ந்தார். இந்த வழக்கில் வாய்தா மேல் வாய்தாவாக போய் கடந்த மாதம் தீர்ப்பு வழங்கப்பட்டது. நீதிபதி பிரசன்னகுமாரி, பிரபகாரனின் விவாகரத்து வழக்கை தள்ளுபடி செய்து உத்தரவிட்டார். மனைவியிடமிருந்து எப்படியும் விவாகரத்து கிடைத்துவிடும் என பிரபாகரன் மிகுந்த நம்பிக்கையில் இருந்தார். ஆனால் தீர்ப்பு எதிராக அமைந்தது அவருக்கு கடும் ஆத்திரத்தை ஏற்படுத்தியது. இந்நிலையில் மகளிர் தினமான நேற்று முன்தினம் பிரபாகரன் கையில் ஒரு பார்சலுடன் குடும்ப நல நீதிமன்றத்திற்கு சென்றார். அப்போது நீதிபதி பிரசன்ன குமாரி வழக்கு விசாரணையில் மும்முரமாக இருந்தார். ஒரு வழக்கு விசாரணை நடந்து கொண்டிருக்கும் போதே நீதிமன்ற அரங்கத்திற்குள் நுழைந்த அவர் , நீதிபதிக்கு மகளிர் தினத்தை முன்னிட்டு ஒரு பரிசு கொண்டு வந்திருப்பதாக சத்தம் போட்டு கூறினார். பின்னர் அந்த பார்சலை அவர் நீதிபதியிடம் கொடுக்க முயன்றார். காவலுக்கு நின்று கொண்டிருந்த போலீசாரிடம் பிரபாகரனை வெளியேற்றுமாறு நீதிபதி பிரசன்னகுமாரி உத்தரவிட்டார். போலீசார் பிரபாகரனை வெளியேற்றி விட்டு அவரிடமிருந்த பார்சலை கைப்பற்றி பரிசோதித்தபோது அதில் 2 செருப்புகள் இருந்தது தெரியவந்தன. இதைப்பார்த்த அங்கிருந்த வக்கீல்கள் அதிர்ச்சியடைந்தனர். நீதிபதிக்கு செருப்பு கொடுப்பதா என்று கூறி பிரபாகரனை வக்கீல்கள் தாக்கினர். இது குறித்து அறிந்ததும் கூடுதல் போலீசார் நீதிமன்றத்திற்கு விரைந்து வந்தனர். பின்னர் போலீசார் பிரபாகரனை கைது செய்து போலீஸ் நிலையத்திற்கு கொண்டு சென்றனர்.

தினகரன்