இலங்கைக்கு எதிரான தீர்மானத்தை இந்தியா ஆதரிக்க கோரி சென்னை ஐ.ஐ.டி மாணவர்கள் உண்ணாவிரதம்

சென்னை, மார்ச் 18-

இலங்கைக்கு எதிரான அமெரிக்க தீர்மானத்துக்கு ஆதரவாக இந்தியா ஓட்டு அளிக்கவேண்டும் என்பதை வலியுறுத்தி சென்னை ஐ.ஐ.டி. மாணவர்கள் உண்ணாவிரத போராட்டத்தை மேற்கொண்டனர். இன்று கவர்னர் மாளிகையை முற்றுகையிடப்போவதாக மாணவர் அமைப்பு அறிவித்துள்ளது.

இலங்கை மீது பொருளாதார தடையை ஐ.நா. விதிக்கவேண்டும். இலங்கை அதிபர் ராஜபக்சேவை கொடுங்கோலனாக அறிவிக்க வேண்டும். ஐ.நா.சபையில் இலங்கைக்கு எதிராக அமெரிக்கா கொண்டு வரும் தீர்மானத்தை மத்திய அரசு ஆதரிக்க வேண்டும் உட்பட பல்வேறு கோரிக்கைகளை வலியுறுத்தி தமிழகம் முழுவதும் மாணவர்கள் தொடர் உண்ணாவிரத போராட்டம் நடத்தி வருகின்றனர்.

இதையடுத்து தமிழகம் முழுவதும் கல்லூரிகள் காலவரையற்ற விடுமுறை விடப்பட்டது. மாணவர் விடுதிகள் அனைத்தும் இழுத்து மூடப்பட்டது. ஆனாலும் உண்ணாவிரத போராட்டத்தை மாணவர்கள் கைவிடாமல் தொடர்ந்து ஈடுபட்டு வருகின்றனர்.

சென்னை அடையாறில் உள்ள தமிழ்நாடு டாக்டர் அம்பேத்கார் சட்டப்பல்கலைக்கழக மாணவர்கள் 12 பேர் கடந்த 11-ந்தேதி முதல் தொடர் உண்ணாவிரத போராட்டத்தில் ஈடுபட்டு வருகின்றனர். தெலுங்கு மொழியை தாய் மொழியாக கொண்ட மாணவி மாசானி மோனிஷா மற்றும் 12 மாணவர்கள் 7-வது நாளாக தொடர்ந்து போராட்டத்தில் ஈடுபட்டு வருவதால், மயங்கிய நிலையில் இருந்தனர்.

தமிழ்நாடு அரசு இசைக்கல்லூரியில் படிக்கும் 5 மாணவிகள் உட்பட 14 மாணவர்கள் 3-வது நாளாக நேற்று உண்ணாவிரத போராட்டத்தில் ஈடுபட்டனர். இசைக்கல்லூரி மற்றும் மாணவர்களின் விடுதிகள் இழுத்து மூடப்பட்டுள்ளதால், கல்லூரிக்கு வெளியில் பந்தல் அமைத்து மாணவர்கள் போராட்டத்தில் ஈடுபட்டுள்ளனர். கல்லூரிக்குள் உள்ள கழிவறையைக்கூட பயன்படுத்த அனுமதிக்காததால், மாணவிகள் கடுமையாக பாதிக்கப்பட்டுள்ளனர்.

சென்னை நந்தனம் கலைக்கல்லூரி மாணவர்கள் கடந்த 3 நாட்களாக உண்ணாவிரத போராட்டத்தில் ஈடுபட்டு வந்தனர். 18 கல்லூரிகளின் மாணவர்கள் ஒன்றாக இணைந்து தொடங்கியுள்ள தமிழ் ஈழத்திற்கான மாணவர்கள் போராட்ட குழுவை சேர்ந்தவர்கள், நந்தனம் கலைக்கல்லூரி மாணவர்களிடம் போராட்டத்தை கைவிடும்படி கேட்டுக்கொண்டனர். இந்த அமைப்பை சேர்ந்த மாணவர்கள் இன்று (திங்கட்கிழமை) கவர்னர் மாளிகையை முற்றுகையிட்டு போராட்டத்தை நடத்தவுள்ளதாக அறிவித்துள்ளனர்.

இதையடுத்து இந்த அமைப்பின் கோரிக்கையை ஏற்று நந்தனம் கலைக் கல்லூரி மாணவர்கள் நேற்று மதியம் போராட்டத்தை கைவிட்டனர். 3 நாட்களாக போராட்டத்தில் ஈடுபட்டு உடல்நலம் பாதிக்கப்பட்ட மாணவர்கள் 108 ஆம்புலன்ஸ் வேனில், ராயப்பேட்டை அரசு ஆஸ்பத்திரிக்கு சிகிச்சைக்காக அழைத்து செல்லப்பட்டனர்.

இதுகுறித்து நந்தனம் கல்லூரி மாணவர் இளையராஜா நிருபர்களிடம் கூறும்போது, "மாணவர்களின் போராட்டத்தை ஒடுக்க மத்திய, மாநில அரசுகள் செயல்படுகின்றது. இதை கண்டித்து கவர்னர் மாளிகையை நாளை (இன்று) முற்றுகையிடுவோம்" என்றார்.

இதற்கிடையில், சென்னை ஐ.ஐ.டி. மாணவர்கள் நேற்று ஒரு நாள் அடையாள உண்ணாவிரத போராட்டத்தில் ஈடுபட்டனர். இலங்கைக்கு எதிராக ஐ.நா.சபையில் கொண்டு வரப்படும் தீர்மானத்துக்கு இந்தியா ஆதரிக்க வேண்டும், இலங்கையில் நடந்துள்ளது இன அழிப்பு போர், ராஜபக்சேவை போர் குற்றவாளி என்று அறிவித்து, சர்வதேச நீதிமன்றம் மூலம் விசாரணை நடத்தி அவரை தண்டிக்க வேண்டும் என்ற வாசகங்களை தமிழ், இந்தி, ஆங்கிலம் உட்பட பல மொழிகளில் எழுதப்பட்டிருந்த பதாகைகளை கையில் வைத்திருந்தனர்.

இந்த போராட்டத்தில் ஐ.ஐ.டி.யில் படிக்கும் தமிழ் மாணவர்கள் மட்டுமல்லாமல், அனைத்து மாநிலத்தை சேர்ந்த மாணவர்களும் கலந்து கொண்டார்கள். காலை 8 மணிக்கு தொடங்கிய போராட்டம், மாலை 4 மணி வரை நடந்தது. பின்னர் இலங்கையில் நடந்துள்ள போர் குற்றம், அங்குள்ள தமிழர்கள் படுகொலை செய்யப்பட்ட விதம், தனி ஈழம் அமைக்க வேண்டிய சூழ்நிலை ஆகியவைகள் குறித்து மாணவர்களுடன் கலந்துரையாடல் நடந்தது. பின்னர் உண்ணாவிரதம் இருக்கும் ஐ.ஐ.டி. வளாகத்தில் மாணவர்கள் ஊர்வலமாக வந்தனர்.