இலங்கைக்கு எதிரான தீர்மானத்தை ஆதரிக்க இந்திய அரசு தயங்குவது ஏன்?: ஜி.கே.மணி கேள்வி

வேலூர், மார்ர். 8-

பா.ம.க. மாநில தலைவர் ஜி.கே.மணி வேலூரில் இன்று நிருபர்களுக்கு பேட்டி அளித்தார். அப்போது அவர் கூறியதாவது:-

உலக மகளிர் தினம் இன்று கொண்டாடப்படுகிறது. பெண்கள் இல்லாமல் உலகம் இல்லை பெண்களுக்கு முக்கியத்துவம் தரவேண்டும். பெண்களுக்கு சம உரிமை சமவாய்ப்புதர பா.ம.க. தொடர்ந்து போராடி வருகிறது.

ஜ.நா. மனித உரிமை ஆணையத்தில் அமெரிக்கா கொண்டுவரும் தீர்மானத்தில் இந்தியாவின் நிலையை உலகமே எதிர்பார்க்கிறது. நாடாளுமன்றத்தில் பாரதீய ஜனதா, சமாஜ்வாடி உள்ளிட்ட எதிர்கட்சிகள் வலிமையான போராட்டத்தில் ஈடுபட்டுள்ளன.

இலங்கை பிரச்சினையில் உண்மை, நீதியின் அடிப்படையில் இந்தியா தனது நிலைபாட்டை மாற்றி கொள்ள வேண்டும். ஐ.நா. மனித உரிமை ஆணையத்தில் உள்ள 46 நாடுகளில் 30 நாடுகள் அமெரிக்கா கொண்டு வரும் தீர்மானத்தை ஆதரிக்க போவதாக தகவல் வந்து உள்ளது. இந்த தீர்மானம் வலிமையானதா? இலங்கை தமிழர் பிரச்சினைக்கு தீர்வு காணும் வகையில் உள்ளதா என்பதை பார்க்க வேண்டும்.

இலங்கையில் ராஜபக்சே அரசு தமிழர்களை கொன்று குவித்ததற்கான ஆதாரம் உள்ளது. பல ஆதாரங்கள் இருந்தும் இந்திய அரசு தயங்குவது ஏன்? குலம்பெயர்ந்த தமிழர்களும், இலங்கையில் உள்ள தமிழர்களும் தமிழ் நாட்டை, இந்தியாவை எதிர் நோக்கி உள்ளனர்.

தமிழகத்தில் உள்ள அனைத்து கட்சிகளும் பொது நலஅமைப்புகள், மாணவர்கள், திரைப்பட துறையினர் ஒன்று சேர்ந்து போராட வேண்டும். தமிழர்களின் உணர்வை இந்திய அரசு உணரும் வகையில் இந்த போராட்டம் அமைய வேண்டும்.

இவ்வாறு அவர் கூறினார்.